MBNR: నవాబుపేట కేంద్రంలోని కస్తూరిభా గాంధీ పాఠశాల విద్యార్థులకు గత 20 రోజులుగా ఉపాధ్యాయులు రాక, చదువు చెప్పే వారు లేక విద్యార్థులు ఆందోళనకు దిగారు. ఇంకా ఎన్ని రోజులు ఎదురు చూడాలని, వార్షిక పరీక్షలు దగ్గర వచ్చాయని విద్యార్థులు వాపోయారు. మమ్మల్ని చదువులకు దూరం చేయవద్దని తహసీల్దార్ శ్రీనివాసులు, ఎంపీడీవో జయరాం నాయక్, ఎస్సై విక్రమ్‌లను కోరారు.
NZB: పెండింగ్‌లో ఉన్న ఫీజు రీయింబర్స్‌మెంట్ విడుదల చేయాలని బీసీ సంక్షేమ సంఘం జిల్లా అధ్యక్షుడు నరాల సుధాకర్, విద్యార్థి సంఘం జిల్లా అధ్యక్షుడు సంతోష్ డిమాండ్ చేశారు. ఈ మేరకు జనవరి 8న బీసీ విద్యార్థి సమర శంఖారావం నిర్వహించనున్నట్లు పేర్కొన్నారు. ఇందుకు సంబంధించిన వాల్ పోస్టర్లను శనివారం కేర్ డిగ్రీ కళాశాలలో ఆవిష్కరించారు.
NLG: వేప చెట్టులో రావి చెట్టు కొమ్మలు పెరిగి ఉండడంతో ఈ అద్భుత దృశ్యాన్ని శనివారం కోదాడ పట్టణ ప్రజలు ఆసక్తికరంగా తిలకించారు. ఈ సంఘటన కోదాడ మెయిన్ రోడ్ పక్కనే అంజలి టీ స్టాల్ ఎదురుగా ఉన్న వేప చెట్టులో కనిపించింది. ఒక వృక్షం, మరొక వృక్షానికి పొంతన లేని విధంగా కనిపించడం ఆశ్చర్యకరంగా ఉన్నది. ఈ వింత దృశ్యాన్ని చూసిన కొందరు ప్రజలు సెల్ ఫోన్‌లో బంధించారు.
BDK: భద్రాద్రి కొత్తగూడెం జిల్లా ప్రజలకు ఎస్పీ రోహిత్ రాజ్ శనివారం పలు సూచనలు చేశారు. ఇటీవల సైబర్ నేరగాళ్ల మోసాలు అధికంగా పెరిగిపోయాయని, ప్రజలు అప్రమత్తంగా ఉండాలన్నారు. ఎవరైనా ఫోన్ చేసి డబ్బులు అడిగితే పంపి మోసపోవద్దన్నారు. ఎవరైనా అలా ఫోన్ చేస్తే వెంటనే 1930ను సంప్రదించాలని కోరారు.
NRML: నిర్మల్ జిల్లా కేంద్రంలో తమను క్రమబద్ధీకరించాలంటూ కేజీబీవీ ఉపాధ్యాయులు నిరవధిక దీక్ష చేపట్టగా… శనివారం ముధోల్ ఎమ్మెల్యే రామారావు పటేల్ దీక్షా స్థలికి వచ్చి వారికి మద్దతు తెలిపారు. ఎమ్మెల్యే మాట్లాడుతూ.. ఉద్యోగులు తమను క్రమబద్ధీకరించాలని పోరాటం చేస్తుంటే ప్రభుత్వం పట్టించుకోవడం లేదని విమర్శించారు. ప్రభుత్వం స్పందించాలని డిమాండ్ చేశారు.
WGL: వరంగల్కు నేషనల్ అసోసియేషన్ ఆఫ్ సాఫ్ట్‌వేర్ అండ్ సర్వీస్ కంపెనీస్(NASSCOM) శుభవార్త చెప్పింది. HYD తర్వాత వరంగల్ నగరం గ్లోబల్ కేపబిలీటీ సెంటర్ల(జీసీసీ)కు డెస్టినేషన్‌లుగా మారనున్నాయని తెలిపింది. జిల్లాలో ఐటీ ఇండస్ట్రీకి అవసరమైన ఇంజినీరింగ్ కాలేజీలు, మానవ వనరులు అందుబాటులో ఉన్నట్లు పేర్కొంది.
JGL: కోరుట్ల మండలంలోని కల్లూరు కస్తూర్బా గాంధీ విద్యాలయ బాలికలు శనివారం నిరసన వ్యక్తం చేశారు. పాఠశాలకు చెందిన ఉపాధ్యాయులు సమ్మెకు వెళ్లడంతో అధికారులు తాత్కాలికంగా ప్రభుత్వ పాఠశాల ఉపాధ్యాయులను కేటాయించారు. దీంతో తమ ఉపాధ్యాయులు తమకే కావాలని బాలికలు పాఠశాల ఆవరణలో బైటాయించి నిరసన తెలిపారు. పాఠశాల యాజమాన్యం విద్యార్థులకు నచ్చజెప్పి క్లాసులకు పంపించారు.
HYD: ఈసీఐఎల్ చౌరస్తాలోని ఓ ఆస్పత్రిలో చికిత్స పొందుతున్న మల్లాపూర్ డివిజన్‌కు చెందిన కార్మిక సంఘం నాయకుడు మారుతీరావును ఉప్పల్ ఎమ్మెల్యే బండారి లక్ష్మారెడ్డి శనివారం పరామర్శించారు. మెరుగైన వైద్య సేవలు అందించాలని డాక్టర్లకు సూచించారు. ఈ కార్యక్రమంలో మల్లాపూర్ డివిజన్ కార్పొరేటర్ దేవేందర్ రెడ్డి, కాసం మహిపాల్ రెడ్డి తదితరులు పాల్గొన్నారు.
PDPL: ఆసుపత్రి భవన నిర్మాణ పనులను త్వరగా పూర్తిచేయాలని పెద్దపల్లి ఎమ్మెల్యే చింతకుంట విజయరమణారావు కాంట్రాక్టర్‌కు సూచించారు. శనివారం జిల్లా కేంద్రంలో చేపట్టిన ఆసుపత్రి భవన నిర్మాణ పనులను పరిశీలించారు. పనుల్లో నాణ్యత ప్రమాణాలు పాటించాలని కాంట్రాక్టర్‌కు సూచించారు. ఎమ్మెల్యే వెంట ఆసుపత్రి సూపరింటెండెంట్ డాక్టర్ శ్రీధర్, కాంగ్రెస్ నాయకులు ఉన్నారు.
JGL: ధర్మపురి మండలంలోని జైన, మగ్గిడి గ్రామాల్లోని పిఎసిఎస్ సెంటర్లో వరి ధాన్యం కొనుగోలు కేంద్రాన్ని కలెక్టర్ బి. సత్యప్రసాద్ ఆకస్మికంగా తనిఖీ చేశారు. ఈ సందర్భంగా కలెక్టర్.. ధాన్యం ఎంత మొత్తంలో వస్తుంది? ధాన్యానికి సంబంధించిన తేమ ఏ విధంగా ఉంది? అని పరిశీలించారు. అనంతరం సిబ్బందికి పలు సూచనలు చేశారు.
NZB: ఆర్మూర్ ప్రొహిబిషన్ మరియు ఎక్సైజ్ పోలీస్ స్టేషన్ పరిధిలో వివిధ కేసులలో పట్టుబడిన ద్విచక్ర వాహనాలకు ఈనెల 30వ తేదీన వేలంపాట నిర్వహిస్తున్నట్లు ఎక్సైజ్ శాఖ సీఐ స్టీవెన్‌సన్ తెలియజేశారు. వాహన వేలంలో పాల్గొనే వ్యక్తులు 25% అప్సెట్ ప్రైస్ జమ చేసి ఎక్సైజ్ కార్యాలయం నందు నిర్వహించు వేలంపాటలో పాల్గొనాలని సూచించడం జరిగింది.
WNP: కలెక్టర్ కార్యాలయంలో మక్తల్ ఎమ్మెల్యే శ్రీహరి ఆధ్వర్యంలో రెవెన్యూ సాధన సమితి సభ్యులు కలెక్టర్ ఆదర్శ్ సురభిని కలిసి శనివారం వినతి పత్రం అందజేశారు. వారు మాట్లాడుతూ.. ఆత్మకూరులో అన్ని వసతులు ఉన్నాయని రెవెన్యూ డివిజన్‌గా ఏర్పాటు చేయాలని కోరారు. ఈ కార్యక్రమంలో రెవెన్యూ డివిజన్ సాధన సమితి సభ్యులు, ఆత్మకూరు మండల కాంగ్రెస్ నాయకులు పాల్గొన్నారు.
HYD: ఖైరతాబాద్‌లోని ప్రధాన సర్కిల్ వద్ద నగర అందాలను పెంచే విధంగా తీసుకోవాల్సిన చర్యల గురించి శనివారం జీహెచ్ఎంసీ అధికారులు సర్కిల్‌ను సందర్శించారు. పారిశుద్ధ్య చర్యలను పరిశీలించిన వారు సంతృప్తి వ్యక్తం చేశారు. అనంతరం సర్కిల్ పరిధిలో సుందరీకరణ చర్యలకు సంబంధించిన అంశాలపై స్థానిక అధికారులతో చర్చించారు.
NRPT: మరికల్ మండలం ఇబ్రహీంపట్నం గ్రామంలోని ప్రాథమిక పాఠశాలను శనివారం తహసీల్దార్ జమీల్ పరిశీలించారు. ఈ సందర్భంగా విద్యార్థులకు అందిస్తున్న మధ్యాహ్న భోజనాన్ని పరిశీలించి ఆయన మాట్లాడారు. మెనూ ప్రకారం విద్యార్థులకు నాణ్యమైన భోజనాన్ని అందించాలని సిబ్బందికి సూచించారు.
KMM: మద్యం తాగి వాహనాలు నడిపితే చట్టరీత్యా చర్యలు తీసుకుంటామని కారేపల్లి సీఐ తిరుపతిరెడ్డి శనివారం హెచ్చరించారు. టూ వీలర్ వాహనదారులు మితిమీరిన వేగంతో వాహనాలు నడపొద్దని సూచించారు. మూల మలుపుల వద్ద జాగ్రత్త వహించాలన్నారు. టూ వీలర్ వాహనాలపై త్రిబుల్ రైడింగ్ చేయరాదన్నారు. పోలీస్ నిబంధనలకు వ్యతిరేకంగా వ్యవహరించిన వారిపై చర్యలు తీసుకుంటామని హెచ్చరించారు.
