మరో పది రోజుల్లో హిస్టరీ క్రియేట్ చేసేందుకు రెడీ అవుతోంది ఆర్ఆర్ఆర్ మూవీ. ఏ ముహూర్తాన రాజమౌళి ఈ ప్రాజెక్ట్ మొదలు పెట్టారో గానీ.. అవార్డుల పంట పండుతోంది. ఇప్పటికే ఎన్నో అవార్డులు ఆర్ఆర్ఆర్ ఖాతాలో పడిపోయాయి. ఇంకొన్ని రోజులు పోతే.. ఆర్ఆర్ఆర్ పేరు మీదే అవార్డ్స్ ఇచ్చేలా ఉన్నారు హాలీవుడ్ ప్రముఖులు. అంతలా ఆర్ఆర్ఆర్‌కు ఫిదా అయిపోయారు. ముఖ్యంగా నాటు నాటు సాంగ్‌కు సినీ, రాజకీయ నాయకులు అదిరిపోయే స్టెప్పులెస్తున్నారు. దాంతో సోషల్ మీడియాలో నాటు నాటు మోత మోగుతునే ఉంది. అయితే ఇప్పుడు యావత్ ప్రపంచాన్ని ఉర్రూతలూగించేందుకు నాటు నాటు సాంగ్ రెడీ అవుతోంది. తాజాగా ఈ సాంగ్ ఓ అరుదైన అవకాశాన్ని అందుకుంది. ఇప్పటికే ఆస్కార్ నామినేషన్స్‌లో చోటు దక్కించుకుంది నాటు నాటు. మార్చి 12న 95వ అకాడమీ అవార్డ్స్ వేడుక గ్రాండ్‌గా జరగనుంది. ఈ ఈవెంట్‌లో నాటు నాటు సాంగ్ లైవ్ పర్ఫార్మెన్స్ ఇచ్చేందుకు రెడీ అవుతోంది చిత్ర యూనిట్. ఈ సాంగ్ ఒరిజినల్ వెర్షన్, తెలుగులో పాట పాడిన సింగర్స్.. కాల భైరవ, రాహుల్ సిప్లిగంజ్.. ఆస్కార్ వేదిక పై లైవ్ పర్ఫార్మెన్స్ ఇవ్వబోతున్నారు. ఆస్కార్ స్టేజి పై లైవ్ పెర్ఫార్మెన్స్ ఇచ్చేందుకు రాహుల్ సిప్లిగంజ్, కాల భైరవలకు అకాడమీ నుంచి అధికారికంగా ఆహ్వానం అందింది. అకాడమీ వారు ట్విట్టర్ ద్వారా ఈ విషయాన్ని ప్రకటించారు. దీంతో రాహుల్ సిప్లిగంజ్, కాల భైరవకి అభినందనలు వెల్లువెత్తుతున్నాయి. ఇక ఆస్కార్ వేడుకలో చరణ్, తారక్‌తో పాటు రాజమౌళి, కీరవాణి, చంద్రబోస్ సందడి చేయనున్నారు. మొత్తంగా ఆర్ఆర్ఆర్ చరిత్ర సృష్టిస్తోంది.
