సీఎం కేసీఆర్‌పై టీ పీసీసీ చీఫ్ రేవంత్ రెడ్డి ఫైరయ్యారు. ఇచ్చిన హామీలు నెరవేర్చకుంటే వచ్చే ఎన్నికల్లో ఓట్లు అడిగే హక్కు లేదన్నారు. ఈ మేరకు సీఎం కేసీఆర్‌కు బహిరంగ లేఖ రాశారు. ప్రజలకు కేసీఆర్ ఇచ్చిన హామీలు, బడ్జెట్‌లో నిధుల కేటాయింపు తదితర అంశాలను లేఖలో ప్రస్తావించారు. రైతులకు రూ.లక్ష రుణ మాఫీ చేస్తామని ఇచ్చిన హామీ ఇప్పటికీ నెరవేరలేదన్నారు. గత నాలుగేళ్లలో రెండు విడతలు కలిపి రూ.3,881 కోట్లు రుణమాఫీ చేసినట్లు తెలిపారు. ఇంకా రూ.20,857 కోట్ల రుణమాఫీ కోసం రైతులు ఎదురు చూస్తున్నారని చెప్పారు.
దళిత సామాజిక వర్గానికి తీరని అన్యాయం చేస్తున్నారని రేవంత్ రెడ్డి ఆరోపించారు. తొలి దళిత సీఎం, కుటుంబానికి మూడు ఎకరాల భూమి అంటూ హామీలు ఇచ్చారని తెలిపారు. ఒక్క హామీ నెరవేర్చలేదని మండిపడ్డారు. ఇప్పుడు దళితబంధు పేరుతో ఆ వర్గాలను మరోసారి వంచించేందుకు సిద్ధమయ్యారని విమర్శించారు. పథకం అమలు తీరు చూస్తే ఊరికో కోడి ఇంటికో ఈక అన్నట్లు తయారైందని మండిపడ్డారు. పాలమూరు రంగారెడ్డి ప్రాజెక్టును ఉద్దేశపూర్వకంగా నీరు కార్చినట్టు కనిపిస్తోందని చెప్పారు.
రూ.35,200 కోట్లతో ప్రారంభించిన ప్రాజెక్టు అంచనా వ్యయం ప్రస్తుతం రూ.60వేల కోట్లకు చేరిందని వివరించారు. గత బడ్జెట్‌లో చేసిన కేటాయింపులు రూ.1,225 కోట్లు మాత్రమేనని చెప్పారు. ఇలా కేటాయిస్తే ప్రాజెక్టు మరో 70ఏళ్లకు కూడా పూర్తి కాదన్నారు. డబుల్ బెడ్ రూమ్ ఇళ్లపై గత తొమ్మిది ఏళ్లుగా ఊరిస్తేనే ఉందన్నారు. సొంత జాగా ఉన్న వాళ్లకు ఇల్లు కట్టుకోవడానికి రూ.3 లక్షలు ఇస్తామనే హామీ ఏమైందని నిలదీశారు. గత బడ్జెట్‌లో ప్రకటించిన పథకానికి ఇంతవరకు మార్గదర్శకాలు లేవన్నారు. రైతులకు 24 గంటలు ఉచిత విద్యుత్ సరఫరా చేస్తున్న మాట బూటకమని మండిపడ్డారు. గృహ వినియోగదారులపై ఏసీడీ పేరుతో అదనపు విద్యుత్ ఛార్జీల భారం మోపుతున్నారని ఆరోపించారు.
