18 ycp mlc candidates:ఎమ్మెల్సీ స్థానాలకు వైసీపీ (ycp) తమ అభ్యర్థులను ప్రకటించింది. స్థానిక సంస్థలు, గవర్నర్ కోటా, ఎమ్మెల్యే కోటా.. ఇలా మొత్తం 18 సీట్లకు అభ్యర్థులను ఖరారు చేసింది. అభ్యర్థులను ప్రభుత్వ సలహాదారు సజ్జల రామకృష్ణారెడ్డి (sajjala ramakrishna reddy) ప్రకటించారు. స్థానిక కోటాలో 9 మంది, ఎమ్మెల్యే కోటాలో ఏడుగురు, గవర్నర్ కోటాలో ఇద్దరి పేర్లను ప్రకటించారు. మొత్తం స్థానాల్లో బీసీలకు 11, ఓసీలకు 4, ఎస్సీలకు 2, ఎస్టీలకు 1 స్ధానాన్ని కేటాయించారు.
స్థానిక సంస్థల కోటాను పరిశీలిస్తే.. అనంతపురం జిల్లాకు చెందిన ఎస్. మంగమ్మ.. బీసీ. బోయ సామాజిక వర్గం నుంచి టికెట్ వచ్చింది. కర్నూలు నుంచి డాక్టర్ మధుసూదన్.. ఈయన కూడా బీసీ బోయ కులానికి చెందినవారే. కడప జిల్లా నుంచి రెడ్డి సామాజిక వర్గానికి చెందిన రామసుబ్బారెడ్డికి లభించింది. చిత్తూరు జిల్లా నుంచి డాక్టర్ సిపాయి సుబ్రహ్మణ్యం.. ఈయన బీసీ వెన్నెరెడ్డి సామాజిక వర్గానికి చెందినవారు. నెల్లూరు జిల్లా నుంచి ఎస్సీ మాల సామాజిక వర్గానికి చెందిన మేరుగ మురళీధర్. పశ్చిమ గోదావరి జిల్లా నుంచి బీసీ శెట్టి బలిజ నుంచి కావూరు శ్రీనివాస్. అదే జిల్లా నుంచి ఓసీ కాపునకు చెందిన వంకా రవీంద్రనాథ్, తూర్పుగోదావరి జిల్లా నుంచి బీసీ శెట్టి బలిజకు చెందిన కుడిపూడి సూర్యనారాయణ. శ్రీకాకుళం జిల్లా నుంచి బీసీ యాదవ సామాజిక వర్గం నుంచి సత్తు రామారావును ఎంపిక చేశారు.
ఇక ఎమ్మెల్యే కోటాను పరిశీలిస్తే.. గుంటూరు జిల్లా నుంచి బీసీ వడ్డెర నుంచి ఏసురత్నం. పశ్చిమగోదావరి జిల్లా నుంచి బీసీ వడ్డెరకు చెందిన జయమంగళ వెంకటరమణకు కేటాయించారు. ఈయన ఇటీవల వైసీపీలో చేరిన సంగతి తెలిసిందే. తూర్పు గోదావరి నుంచి ఎస్సీ మాదిగ నుంచి బొమ్మ ఇజ్రాయిల్. విశాఖ జిల్లా నుంచి వడబలిజ సామాజిక వర్గం నుంచి కోలా గురువులు. ప్రకాశం జిల్లా నుంచి బీసీ పద్మశాలికి చెందిన పోతుల సునీత. విజయనగరం జిల్లా నుంచి క్షత్రియ సామాజిక వర్గానికి చెందిన పెన్మత్స సూర్యనారాయణ రాజును ఖరారు చేశారు.
ఇక గవర్నర్ కోటాను పరిశీలిస్తే.. కాకినాడ నుంచి మత్స్యకార సామాజిక వర్గానికి చెందిన కర్రి పద్మశ్రీ. అల్లూరు జిల్లా నుంచి ఎస్టీ ఎరుకుల నుంచి కుంభా రవికి టికెట్ కన్ఫామ్ చేశారు.
