SS: లేపాక్షి మండల కేంద్రంలో ఆదివారం అర్ధరాత్రి అన్నదమ్ముల మధ్య జరిగిన ఘర్షణలో ఒకరు మృతి చెందిన ఘటన సోమవారం వెలుగులోకి వచ్చింది. ఎస్సై నరేంద్ర వివరాల మేరకు.. వీఆర్ఏ రామాంజనేయులును అతని తమ్ముడు అశ్వర్థ మద్యం తాగి మెట్ల మీద నుంచి తోసేశాడు. దీంతో వీఆర్ఏ ఇంటిపై నుంచి కిందపడి తీవ్ర గాయాలపాలయై అక్కడికక్కడే మృతి చెందారు.
SS: గ్రామాల్లో నెలకొన్న సమస్యల పరిష్కారానికే తొలి ప్రాధాన్యత ఇస్తామని మంత్రి సవిత అన్నారు. సోమందేపల్లి మండలం నాగినాయన చెరువు, గుడిపల్లి, తుంగోడు, వెలిదడకల,నడింపల్లి పంచాయతీలోని నాయకులతో పెనుకొండలో సోమవారం మంత్రి సమావేశం నిర్వహించారు. గ్రామాల్లో ఉన్న సమస్యల గురించి ప్రస్తావించారు. గ్రామాల వారిగా ఎలాంటి సమస్యలు ఉన్నాయని మంత్రి ఆరా తీశారు.
JN: రంజాన్ పండుగను పురస్కరించుకుని కొడకండ్ల మండల కేంద్రంలో ఆసురఖాన అభివృద్ధికి రూ.7 లక్షలు, రామవరం గ్రామంలోని ఈద్గా అభివృద్ధికి రూ.3లక్షలను ఎమ్మెల్యే నిధుల నుంచి మంజూరు చేశారు. ఈ సందర్భంగా ఎమ్మెల్యే యశస్వినిరెడ్డి కొబ్బరికాయ కొట్టి పనులు ప్రారంభించారు. ఈ సందర్భంగా ఎమ్మెల్యే మాట్లాడుతూ.. సమాజంలో అన్ని మతాల అభివృద్ధే తన లక్ష్యమన్నారు.
PLD: నరసరావుపేట పట్టణంలో సోమవారం 42 డిగ్రీల ఉష్ణోగ్రత నమోదయింది. ఉదయం 20° వద్ద నుంచి ప్రారంభమైన ఉష్ణోగ్రత గంటకు పెరుగుతూ మధ్యాహ్నం రెండు గంటలకు 42 డిగ్రీల వద్దకు చేరుకుంది. రంజాన్ పర్వదినం కావడంతో ముస్లిం సోదరులు ప్రార్థనలకు వెళ్లి వచ్చేందుకు ఎండ తీవ్రతతో ఇబ్బంది పడ్డారు.
W.G: కేంద్ర ప్రభుత్వం నిరంకుశంగా చేపట్టనున్న వక్స్ సవరణ బిల్లును వ్యతిరేకిస్తూ నేడు ఏలూరు నగరంలోని తంగెళ్లమూడి వంతెన వద్ద ముస్లింలు నల్ల బ్యాడ్జీలు ధరించి నిరసన చేపట్టారు. ఈదుల్ ఫితర్ పండుగ నమాజ్ అనంతరం మసీదుల నుంచి ర్యాలీగా బయలుదేరి వంతెన వద్దకు చేరుకున్నారు. ఈ కార్యక్రమంలో ముస్లిం పెద్దలు ఎండీ ఇస్మాయిల్ షరీఫ్, ఇలియాస్ పాల్గొన్నారు.
KMR: లింగంపేట మండలం ముంబోజిపేట్ తండాలో సీఎంఆర్ఎఫ్ చెక్కును సోమవారం లబ్ధిదారునికి అందజేశారు. ఈ సందర్భంగా కాంగ్రెస్ పార్టీ మండల వర్కింగ్ ప్రెసిడెంట్ దశరథ నాయక్ మాట్లాడుతూ.. మంజ అనుబాయ్ అనే లబ్ధిదారునికి రూ. 27,000 చెక్కును అందించినట్లు తెలిపారు. ఈ కార్యక్రమంలో సభావత్ రవి, ప్రకాష్, మహేందర్, ఇతర నాయకులు పాల్గొన్నారు.
సత్యసాయి: ధర్మవరం నియోజకవర్గం గొట్లూరు గ్రామానికి చెందిన కౌలు రైతు హలీమా కుటుంబానికి డిప్యూటీ సీఎం పవన్ కళ్యాణ్ రంజాన్ కానుక అందజేశారు. పవన్ తరఫున పట్టుచీర, రూ.25,000లు ఆర్థిక చేయూత, పండ్లతో కూడిన రంజాన్ తోఫాను జనసేన జిల్లా అధ్యక్షుడు టీసీ వరుణ్, ఆ పార్టీ కార్యదర్శి చిలకం మధుసూదన్ రెడ్డి అందజేశారు. ఆ కుటుంబ సభ్యులు పవన్‌కు కృతజ్ఞతలు తెలిపారు.
BPT: వక్ఫ్ బోర్డు సవరణ బిల్లుకు వ్యతిరేకంగా సోమవారం కర్లపాలెం ఈద్గా వద్ద ముస్లిం సోదరులు నల్ల బ్యాడ్జ్‌లు ధరించి నిరసన తెలిపారు. ఈ సందర్భంగా వాళ్ళు మాట్లాడుతూ.. సవరణ బిల్లును కేంద్రం వెనక్కి తీసుకోవాలని కోరారు. భావితరాల భవిష్యత్తును దృష్టిలో ఉంచుకుని ధార్మిక కార్యక్రమాల కోసం దూరదృష్టితో పూర్వికులు తమ ఆస్తులను వక్ఫ్ చేశారని తెలిపారు.
KMR: ఎల్లారెడ్డి మండల కేంద్రంలోని ఈద్గాలో ముస్లిం మత పెద్దలను, ముస్లిం సోదరులను కలిసిను ఎమ్మెల్యే మదన్ మోహన్ శుభాకాంక్షలు తెలిపారు. అనంతరం పలు ముస్లిం సోదరుల ఆహ్వానం మేరకు వారి నివాసాలకు వెళ్లి ఆతిథ్యం స్వీకరించడం జరిగింది. రంజాన్ వేడుకలలో ముస్లిం సోదరులతో ఈద్గా కిక్కిరిసిపోయింది. అనంతరం ఒకరినొకరు ఆలింగనం తీసుకొని శుభాకాంక్షలు తెలిపారు.
NLG: చిట్యాల పట్టణంలో రోడ్డు ప్రమాదం జరిగింది. ఈ ప్రమాదంలో ఒకరు తీవ్రంగా గాయపడ్డారు. మునుగోడు మండలం చోల్లేడు గ్రామానికి చెందిన పరమేశ చిట్యాలలోని మార్కెట్ నుంచి దోసకాయల బస్తాలు తీసుకొని బైక్‌పై పోలీస్ స్టేషన్ వద్ద రోడ్డు దాటుతున్నాడు. ఇదే సమయంలో హైదరాబాద్ నుంచి నార్కెట్ పల్లి వైపు వెళ్తున్న కారు బైక్‌ను ఢీకొట్టింది.
KMR: కామారెడ్డి మున్సిపల్ పరిధిలోని దేవునిపల్లి గ్రామం 12వ వార్డులో రంజాన్ పండుగను పురస్కరించుకుని సోమవారం సుమారు 20మంది నిరుపేద ముస్లిం కుటుంబాలకు మాజీ కౌన్సిలర్ కాసర్ల గోదావరి స్వామి నిత్యావసర సరుకులను అందజేశారు. ఈ కార్యక్రమంలో పెద్దోల్ల శశిధర్ రావు, నీలం రాజలింగం, ద్యావరి నరేష్, బాలస్వామి, భాను, గణేష్, చిన్న నరేష్ తదితరులు పాల్గొన్నారు.
సత్యసాయి: మడకశిర ప్రాంతంలో వాహనదారులు రోడ్డు నిబంధనలు ఉల్లంఘిస్తే కఠిన చర్యలు తప్పవని అర్బన్ సీఐ నాగేశ్ బాబు హెచ్చరించారు. ఈ సందర్భంగా సీఐ మాట్లాడుతూ.. అదుపు చేయలేని వేగం, అవగాహన లేని డ్రైవింగ్ ప్రాణానికి ముప్పు తెస్తుందన్నారు. ద్విచక్రవాహనంపై ముగ్గురు పెళ్లరాదని, హెల్మెట్ ధరించాలని సూచించారు. డ్రైవర్లు తప్పనిసరిగా లైసెన్సు కలిగి ఉండాలన్నారు.
అన్నమయ్య: రాయచోటి నియోజకవర్గంలోని ప్రతి గ్రామంలో పశువులకు నీటి సమస్య తలెత్తకుండా నీటితోట్ల నిర్మిస్తున్నామని మంత్రి మండిపల్లి రాంప్రసాద్ రెడ్డి పేర్కొన్నారు. సోమవారం సందేపల్లి మండలం, కొండావాండ్లపల్లెలో పశువుల నీటి తొట్ల నిర్మాణానికి మంత్రి భూమి పూజ చేశారు. మంత్రి మాట్లాడుతూ.. పాడి రైతుల సంక్షేమానికి ప్రభుత్వం విశేష కృషి చేస్తుందని తెలిపారు.
MNCL: హైదరాబాద్ సెంట్రల్ యూనివర్సిటీ భూముల వేలాన్ని ఆపాలని విద్యార్థి సంఘాల ఆధ్వర్యంలో చేస్తున్న ఆందోళనను విచ్చిన్నం చేసి అక్రమ అరెస్టులు చేయడం హేయమైన చర్య అని AIFDS రాష్ట్ర సహాయ కార్యదర్శి సబ్బని రాజేంద్రప్రసాద్ అన్నారు. సోమవారం బెల్లంపల్లిలో మాట్లాడుతూ.. అరెస్టు చేసిన విద్యార్థి నాయకులను తక్షణమే విడుదల చేయాలన్నారు. HCU భూముల వేలాన్ని వెంటనే ఆపాలన్నారు.
NTR: జగ్గయ్యపేట పట్టణం బలుసుపాడు రోడ్డు ఈద్గా దర్గా నందు రంజాన్ పండగ సందర్బంగా ముస్లిం సోదరులతో కలిసి నమాజ్‌లో పాల్గొని ముస్లిం సోదరులందరికీ నియోజకవర్గ వైసీపీ ఇన్‌ఛార్జ్ తన్నీరు నాగేశ్వరరావు రంజాన్ శుభాకాంక్షలు తెలియజేశారు. ఉపవాస దీక్షలు ముగించుకొని, భక్తిశ్రద్ధలతో రంజాన్ పండుగ, ప్రతి ఒక్కరికి సన్మార్గాన్ని చూపించి, దేవుని యందు భక్తి విశ్వాసముండాలని తెలిపారు.
