ఇటీవల ‘మేజర్’ సినిమాతో మంచి విజయాన్ని అందుకున్నాడు యంగ్ హీరో అడివి శేష్. ఇక ఇప్పుడు మరో సినిమాతో ప్రేక్షకుల ముందుకు రాబోతున్నాడు. 2020 లో విశ్వక్ సేన్ హీరోగా వచ్చిన ‘హిట్’ మూవీ మంచి హిట్‌గా నిలిచింది. శైలేష్ కొలను తెరకెక్కించిన ఈ మూవీని వాల్ పోస్టర్ సినిమా బ్యానర్ పై హీరో నాని నిర్మించారు. దాంతో ఇప్పుడు హిట్ 2ని తెరకెక్కించారు. అయితే ఈ సారి హీరో మారిపోయాడు. వాస్తవానికైతే సెకండ్ పార్ట్‌లో కూడా విశ్వక్ సేన్ హీరోగా నటిస్తారని అంతా అనుకున్నారు. అయితే కొన్ని కారణాల వల్ల ‘హిట్ 2 ది సెకండ్ కేస్‌’లో అడివి శేష్ హీరోగా ఫిక్స్ అయిపోయాడు.
ఈ మూవీని వాల్‌పోస్టర్‌ సినిమా పతాకంపై ప్రముఖ స్టైలిస్ట్ ప్రశాంతి త్రిపిరనేని నిర్మిస్తుండగా నాని సమర్పిస్తున్నాడు. మీనాక్షి చౌదరి ఇందులో హీరోయిన్‌గా నటిస్తోంది. ఇక ఈ సినిమాను ముందుగా జూలైలో రిలీజ్ చేయాలనుకున్నారు. కానీ కొన్ని కారణాల వల్ల వాయిదా పడుతూ వస్తోంది. అయితే తాజాగా ఈ హిట్ సీక్వెల్‌ రిలీజ్ డేట్‌ను లాక్ చేశారు. డిసెంబర్ 2న విడుదల చేయనున్నట్టు ఒక పోస్టర్ ద్వారా అఫీషియల్ ప్రకటించారు. ఇక మేజర్ సినిమాలో ముంబై ఉగ్ర దాడుల్లో అమరుడైన మేజర్ సందీప్ ఉన్ని కృష్ణన్‌గా నటించిన అడివి శేష్.. హిట్2లో కృష్ణదేవ్ అలియాస్ కేడీ అనే పోలీస్ ఆఫీసర్‌గా నటిస్తున్నాడు. దాంతో ఈ యంగ్ హీరో బ్యాక్ టు బ్యాక్ కాప్ స్టోరీస్‌తో అలరించబోతున్నాడని చెప్పొచ్చు. మరి మేజర్‌గా మెప్పించింన శేష్.. హిట్2తో ఎలాంటి హిట్ అందుకుంటాడో చూడాలి.
