మన స్టార్ హీరోలు రీమేక్ సినిమాలు చేయడం కొత్తేం కాదు. ప్రస్తుతం సెట్స్ పై ఉన్న కొన్ని బడా సినిమాలు రీమేక్‌గానే తెరకెక్కుతున్నాయి. ఇటీవల వచ్చిన పవర్ స్టార్ ‘భీమ్లా నాయక్’, రాబోతున్న మెగాస్టార్ ‘గాడ్ ఫాదర్’ మూవీ కూడా మళయాళ హిట్ సినిమాల రీమేక్‌లే. ఇవే కాదు ఇంకొన్ని రీమేక్ సినిమాలు కూడా లైన్లో ఉన్నాయి. రీమేక్‌తో పెద్దగా రిస్క్ లేకపోవడంతో.. టాలీవుడ్ బడా నిర్మాణ సంస్థలు పరభాషల్లో హిట్ అయిన సినిమాల రీమేక్ రైట్స్ దక్కించుకోవడానికి ఆసక్తి చూపిస్తుంటాయి. అయితే ఒక్కోసారి ఇంగ్లీష్ సినిమాలను కూడా మనోళ్లు ఫ్రీమేక్ చేస్తుంటారు. గతంలో అఫిషీయల్‌గా రీమేక్ అని తెలియకపోయినా.. హాలీవుడ్ సినిమాల్లోని మెయిన్ పాయింట్‌ను తీసుకొని.. మన నేటివిటికి తగ్గ మార్పులు చేసి సినిమాలు చేసిన సందర్భాలున్నాయి. ఇక ఇప్పుడు మాస్ మహారాజా రవితేజ అప్ కమింగ్ ఫిల్మ్ కూడా ఓ హాలీవుడ్ మూవీకి ఫ్రీమేక్ అని తెలుస్తోంది.
ప్రస్తుతం ధమాకా, రావణాసుర, టైగర్ నాగేశ్వరరావు, వాల్తేరు వీరయ్య సినిమాలతో బిజీగా ఉన్నా మాస్ రాజా.. సినిమాటోగ్రాఫ‌ర్ కార్తీక్ ఘ‌ట్ట‌మ‌నేనితో ఓ సినిమా చేయబోతున్నాడని వినిపిస్తోంది. రీసెంట్‌గా కార్తిక్ చెప్పిన క‌థ‌కు రవితేజ గ్రీన్ సిగ్నల్ ఇచ్చినట్టు టాక్. అయితే తాజాగా 2014లో విడుద‌లైన హాలీవుడ్ మూవీ ‘జాన్ విక్’ సినిమాకు ఇది రీమేక్ అని తెలుస్తోంది. కానీ ఇది అఫీషియల్ రీమేక్ అని మాత్రం చెప్పలేం. కార్తిక్ ఘట్టమనేని తనదైన స్టైల్లో ‘జాన్ విక్’ కథను అడాప్ట్ చేసుకొని ఫ్రీమేక్‌గా తెరపైకి తీసుకురాబోతున్నట్టు టాక్. ఇక ఈ సినిమాకు ‘ఈగ‌ల్’ అనే టైటిల్ వినిపిస్తుండగా.. అనుపమా పరమేశ్వరన్ హీరోయిన్‌ అని తెలుస్తోంది.
