మంచివాడైన తెలంగాణ ముఖ్యమంత్రి కల్వకుంట్ల చంద్రశేఖర రావుకు దుష్టుడైన ఏపీ సీఎం జగన్మోహన్ రెడ్డితో స్నేహం ఏమాత్రం మంచిది కాదని వైసీపీ అసంతృప్త ఎంపీ రఘురామకృష్ణంరాజు సంచలన వ్యాఖ్యలు చేశారు. కేసీఆర్ తన ప్రాంతీయతత్వాన్ని వదిలి, జాతీయ దృక్పథంతో ముందుకు సాగాలని పార్టీని టీఆర్ఎస్ నుండి బీఆర్ఎస్‌గా మార్చుకున్నారని, అలాంటి మహానాయకుడైన మీరు జగన్‌కు మద్దతుగా నిలువవద్దని కోరారు. రాష్ట్రంలోని ఓ వర్గం పవన్ కళ్యాణ్‌కు అండగా నిలుస్తున్నారని భావిస్తున్న తరుణంలో, ఆ సామాజిక వర్గాన్ని విభజించాలని వైసీపీ భావిస్తోందని, ఇలాంటి దుష్ట పన్నాగానికి కేసీఆర్ సహకరించకూడదని కోరారు.
నిత్యం తమ పార్టీ నేతలు జనసేనానిపై పడి ఏడుస్తుంటారని, రణస్థలం యువశక్తి సభ తర్వాత పెడబొబ్బలు పెడుతున్నారని ఎద్దేవా చేశారు. ఏపీకి చెందిన పలువురు రిటైర్డ్ అధికారులు తెలంగాణ రాష్ట్ర ప్రభుత్వ ప్రధాన కార్యదర్శిగా శాంతకుమారిని నియమించినందుకు, తమ సామాజిక వర్గాన్ని కేసీఆర్ ప్రోత్సహిస్తున్నారంటూ ఆయనను కలిసి అభినందనలు తెలిజేయడం ఆశ్చర్యం కలిగించిందన్నారు. హత్యలు చేసిన వారికి, శవాలను పార్సిల్ చేసిన వారికి బెయిల్ లభిస్తోందని, కోడి కత్తి కేసులో అరెస్ట్ అయిన శ్రీనివాస్‌కు నాలుగేళ్లుగ బెయిల్ లభించకపోవడం దురదృష్టకరమన్నారు. గత ఎన్నికల్లో తమ పార్టీ గెలుపుపై ఈ ప్రభావం చూపిందన్నారు.
