సూపర స్టార్ కృష్ణ రెండు రోజుల క్రితం కన్నుమూసిన సంగతి తెలిసిందే. బుధవారం ఆయన పార్థివ దేహానికి తెలంగాణ బీజేపీ అధ్యక్షుడు బండి సంజయ్ నివాళులర్పించారు. ఈ సందర్భంగా ఆయన… కృష్ణ చేసిన సేవలను కొనియాడటంతో పాటు…ఆయన కుటుంబ సభ్యలకు హామీ ఇచ్చారు.
సినీ రంగానికి కృష్ణ చేసిన సేవలు చాలా గొప్పవని కొనియాడారు. ఆయన పేరు చరిత్రలో చిరస్థాయిగా నిలిచిపోతుందన్నారు బండి. బీజేపీ ప్రభుత్వం వచ్చాక ట్యాంక్ బండ్ పై కృష్ణ కాంస్య విగ్రహాన్ని ఏర్పాటు చేస్తామని ఆయన ప్రకటించారు. కృష్ణకు దాదా సాహెబ్ ఫాల్కే అవార్డు ఇవ్వాలని బీజేపీ తరపున కేంద్ర ప్రభుత్వానికి సిఫారసు చేస్తామని బండి సంజయ్ తెలిపారు. తెలుగు సినిమాకు హంగులు దిద్దిన నటుడు సూపర్ స్టార్ కృష్ణ అని అన్నారు. భయమనే పదానికి అర్థం తెలియకుండా కృష్ణ బతికారన్నారు.
సినిమా రంగంలో అనేక ప్రయోగాలు చేసిన ఏకైక హీరో కృష్ణ అని బండి సంజయ్ వ్యాఖ్యానించారు. నిర్మాతలను ఆదుకున్న వ్యక్తిగా ఆయనకు మంచి పేరుందన్నారు. ఒకే సంవత్సరంలో 19 సినిమాలు తీసి ఎంతో మందికి ప్రత్యక్షంగా, పరోక్షంగా ఉపాధి కల్పించిన వ్యక్తి కృష్ణ అని ప్రశంసించారు.
