ప్రభాస్ నటిస్తున్న ఆదిపురుష్ టీజర్ రిలీజ్ అయి.. ఫ్లాప్ అయిన సంగతి తెలిసిందే. అందుకే జూన్ 16కి ఈ సినిమాను పోస్ట్ పోన్ చేశారు. దాంతో ప్రస్తుతం ఆదిపురుష్ సినిమాను మరిచిపోయినట్టే కనిపిస్తోంది.. ప్రభాస్ కూడా ఆదిపురుష్ గురించి ఎక్కడా ప్రస్తావించడం లేదు. దర్శకుడు ఓం రౌత్ అయితే ఎక్కడా కనిపించడం లేదు. ఇదిలా ఉంటే.. ఆదిపురుష్ సినిమాను మరో తెలుగు సినిమా ‘హనుమాన్’తో పోలుస్తున్నారు నెటిజన్స్. యంగ్ టాలెంటెడ్ డైరెక్టర్ ప్రశాంత్ వర్మ.. తేజ సజ్జ హీరోగా ‘హనుమాన్’ అనే చిత్రాన్ని తెరకెక్కిస్తున్న సంగతి తెలిసిందే. ఆదిపురుష్ టీజర్, హనుమాన్ టీజర్‌ను పోలుస్తూ.. అప్పట్లో పెద్ద ఎత్తున చర్చ జరిగింది. 500 కోట్ల బడ్జెట్ గ్రాఫిక్స్ కంటే.. మీడియం బడ్జెట్‌తో వస్తున్న హనుమాన్ గ్రాఫిక్స్ చాలా బెటర్ అంటూ.. ఆదిపురుష్‌ను తెగ ట్రోల్ చేశారు. దాంతో హనుమాన్ సినిమా పై ఒక్కసారిగా అంచనాలు పెరిగిపోయాయి. అందుకే ఈ సినిమాను వరల్డ్ వైడ్‌గా గ్రాండ్‌గా.. ఏకంగా 11 భాషల్లో రిలీజ్ చేయబోతున్నట్టు ప్రకటించారు. సినిమా కాన్సెప్ట్ యూనివర్సల్‌గా ఉండటంతో.. సమ్మర్ కానుకగా మే 12న.. తెలుగు, హిందీ, మరాఠీ, తమిళం, కన్నడ, మలయాళం, ఇంగ్లీష్, స్పానిష్, కొరియన్, చైనీస్ మరియు జపనీస్‌లో విడుదల చేయబోతున్నారు. ఈ సందర్భంగా రిలీజ్ చేసిన అనౌన్స్‌మెంట్ వీడియో ఆకట్టుకుంటోంది. ఇక ఈ సినిమాలో అమృత అయ్యర్ హీరోయిన్‌గా నటిస్తుండగా.. వరలక్ష్మి శరత్‌కుమార్ కీలక పాత్రలో నటిస్తోంది. మరి ఆదిపురుష్ కంటే ముందుగా వస్తున్న హనుమాన్.. ఎలాంటి విజయాన్ని అందుకుంటాడో చూడాలి.
