నిర్మల్ జిల్లాలోని దిల్వార్పూర్ గ్రామ పరిధిలోని అంజనీ తండాకు చెందిన రాథోడ్ బాబు నాయక్ మద్యం మత్తులో వాహనం నడుపుతూ మూడోసారి పోలీసులకు పట్టుబడ్డాడు. ఈ కేసులో ఆయనను బుధవారం ద్వితీయ శ్రేణి న్యాయమూర్తి ఎదుట హాజరుపరచగా, న్యాయమూర్తి 10 రోజుల జైలు శిక్షతో పాటు రూ.1,000 జరిమానా విధించారు.
WGL: పెట్టుబడిదారీ వ్యవస్థకు కాలం చెల్లిందని, కమ్యూనిజమే ప్రత్యామ్నాయంగా ఎర్రజెండా వైపు ప్రపంచ యువత చూస్తున్నదని సీపీఐ రాష్ట్ర సహాయ కార్యదర్శి తక్కళ్లపల్లి శ్రీనివాస రావు అన్నారు. నల్లబెల్లి మండల కేంద్రంలో బుధవారం భారత కమ్యూనిస్టు పార్టీ వరంగల్ జిల్లా రాజకీయ శిక్షణ శిబిరాలను నిర్వహించారు.
PDPL: ప్రపంచ పర్యావరణ దినోత్సవం సందర్భంగా జిల్లాలో నిర్వహిస్తున్న స్వచ్ఛ గావ్, సురక్ష జలవాయు కార్యక్రమాలను పటిష్టంగా అమలు చేయాలని కలెక్టర్ శ్రీహర్ష సూచించారు. గ్రామాలలో వ్యర్ధాల నిర్వహణ, మొక్కల పెంపకం, నీటి సంరక్షణ, ప్లాస్టిక్ నివారణ తదితర అంశాలపై విస్తృత అవగాహన కల్పించాలని అధికారులను ఆదేశించారు. ప్రజల భాగస్వామ్యంతో లక్ష్యాలు సాధించాలని తెలిపారు.
MDK: వెల్దుర్తి మండలం మంగళ్పర్తిలో తమ భూమిలోకి సర్పంచ్ భర్త అక్రమంగా ప్రవేశిస్తూ దౌర్జన్యం చేస్తున్నాడని డోలు యశోద తూప్రాన్ ఆర్డీవో జయ చంద్రారెడ్డికి ఇచ్చిన ఫిర్యాదులో పేర్కొన్నారు. తాత డోలు సాయిలుకు 2.10 ఎకరాల ప్రభుత్వ లావాని భూమికి అసైన్డ్ పట్టా ఇచ్చినట్లు తెలిపారు. ఈ భూమి తనకు అమ్మకాలు చేసినట్లు రాంకిషన్ రావు దౌర్జన్యం చేస్తున్నట్లు తెలిపారు.
BDK: దమ్మపేట విద్యుత్ శాఖ కార్యాలయంలో బీజేపీ పార్టీ ఆధ్వర్యంలో ఇవాళ వినతి పత్రం అందజేశారు. నియోజకవర్గ నాయకులు తంబళ్ల రవి మాట్లాడుతూ.. నిరంతర విద్యుత్తు అంతరాయం వల్ల సామాన్య ప్రజలకి, వ్యాపారస్తులకి, చంటి పిల్లలకు, వృద్ధులు తీవ్ర ఇబ్బందులు పడుతున్నారని తెలిపారు. ఈ విద్యుత్ కోత సమస్యను వెంటనే పరిష్కరించాలని కోరారు.
HNK: KUC పోలీస్ స్టేషన్ను వరంగల్ పోలీస్ కమిషనర్ సన్ ప్రీత్ సింగ్ సందర్శించారు. స్టేషన్ పరిసరాలు, స్టోర్, కేసు ప్రాపర్టీ గదులు, స్టేషన్ పరిధిలోని వివిధ కేసుల్లో స్వాధీనం చేసుకున్న వాహనాలు, బాలమిత్ర పోలీస్ స్టేషన్ క్రీడా ప్రాంగణాన్ని CP పరిశీలించారు. విద్యా సంస్థల్లో సైబర్ నేరాలు, మత్తు పదార్థాలు, ట్రాఫిక్ నిబంధనలపై అవగాహన కల్పించాలన్నారు.
WNP: అమరచింతలో బుధవారం కాలువ దాటుతూ ప్రమాదవశాత్తు కిందపడి చిన్నిరెడ్డి అనే వ్యక్తికి తలకు తీవ్ర గాయాలయ్యాయని స్థానికులు తెలిపారు. గమనించిన స్థానికులు 108 వాహనంలో అతడిని ఆత్మకూరు ప్రభుత్వ ఆసుపత్రికి తరలించారు. అక్కడ ప్రథమ చికిత్స అనంతరం, మెరుగైన వైద్యం కోసం జిల్లా ఆసుపత్రికి తరలించాలని ఆత్మకూరు వైద్యులు సూచించారు.
JGL: ముఖ్యమంత్రి విదేశీ విద్యా పథకం కింద ఉపకార వేతనాలకు ఆన్లైన్ ద్వారా దరఖాస్తులను ఆహ్వానిస్తున్నట్లు జగిత్యాల జిల్లా మైనార్టీ సంక్షేమ అధికారి కిషోర్ తెలిపారు. విదేశాలలో ఉన్నత విద్యను అభ్యసించే విద్యార్థినీ విద్యార్థులు ఈనెల 30 లోపు www.telanganaepass.cgg.gov.in ద్వారా దరఖాస్తు చేసుకోవాలన్నారు. మే 31 వరకు సంబంధిత కాపీని కార్యాలయంలో అందజేయాలని సూచించారు.
SRCL: వేములవాడ గుడి చెరువు బండ్ పార్క్ను భక్తులు, పర్యాటకులను ఆకట్టుకునేలా అభివృద్ధి చేస్తున్నారు. పార్కులో 40 అడుగుల ఎత్తైన మహాశివుడి విగ్రహంతో పాటు సప్తమాత్రికల విగ్రహాల ఏర్పాటు పూర్తయింది. గుడి చెరువులో బోటింగ్ సదుపాయం కల్పించేందుకు చర్యలు కొనసాగుతున్నాయి. బుధవారం పార్కును పరిశీలించిన జిల్లా కలెక్టర్ గరిమ అగ్రవాల్ మిగిలిన పనులను పూర్తి చేయాలని అధికారులకు సూచించారు.
SRD: నాగల్గిద్ద మండలంలోని అన్ని గ్రామాల్లో సెన్సస్ మ్యాపింగ్ ప్రక్రియను వేగవంతంగా పూర్తి చేయాలని సబ్ కలెక్టర్ ఉమా హారతి అధికారులను ఆదేశించారు. ప్రభుత్వ సూచనల మేరకు జూన్ 4, 6, 8, 10 తేదీల్లో గ్రామ సభలు నిర్వహించేందుకు అధికారులను 4, 5 బృందాలుగా విభజించినట్లు తెలిపారు. గ్రామ సభల నిర్వహణపై అవసరమైన సలహాలు, సూచనలు అందిస్తూ ప్రతి గ్రామ సభలు నిర్వహించారు.
KMR: కామారెడ్డి మండలం చిన్నమల్లారెడ్డి, పాత రాజంపేట, సరంపల్లి తదితర చుట్టుపక్కల గ్రామాల్లో ఆకాశం మేఘావృతమై బుధవారం తేలికపాటి వర్షం కురిసింది. ఉక్కపోతతో ఉక్కిరిబిక్కిరి అవుతున్న జనాలకు కాస్త ఉపశమనం లభించింది. ఎండలు తగ్గుతుండటంతో చల్లటి వాతావరణం కోసం ఎదురుచూస్తున్నారు.
SDPT: కలెక్టర్ ఆదేశాల మేరకు బెజ్జంకి వ్యవసాయ మార్కెట్ కమిటీ గోదాములో వరి ధాన్యం నిల్వ కార్యక్రమాన్ని ప్రారంభించారు. 500 మెట్రిక్ టన్నుల నిల్వ లక్ష్యంతో ధాన్యాన్ని గోదాముకు తరలించి భద్రపరిచారు. ఈ కార్యక్రమంలో తహసీల్దార్ శ్రీకాంత్, ఏఎంసీ ఛైర్మన్ పులి కృష్ణ, ఐకేపీ ఏపీఎం పరుశరాములు పాల్గొని నిల్వల ప్రక్రియను పరిశీలించారు.
BHPL: రేగొండ మండల కేంద్రంలోని రైతు వేదికలో ఇవాళ BHPL డివిజన్ పరిధిలోని విత్తనాలు, ఎరువులు, పురుగుమందుల డీలర్లకు శిక్షణ, అవగాహన కార్యక్రమం నిర్వహించారు. ముఖ్య అతిథిగా జిల్లా వ్యవసాయ అధికారి జే. బాపూరావు హాజరై మాట్లాడారు. వానాకాల సీజన్ దృష్ట్యా రైతులకు విక్రయించే ప్రతి విత్తనానికి తప్పనిసరిగా రసీదు ఇవ్వాలని సూచించారు.
JN: దేవరుప్పుల మండలంలోని ఎంపీపీఎస్ మాదాపురం పాఠశాలకు 2026-27 విద్యా సంవత్సరానికి పూర్వ ప్రాథమిక విద్య (LKG, UKG) మంజూరైంది. ఈ మేరకు PPS ఇన్స్ట్రక్టర్, ఆయా పోస్టుల భర్తీకి విద్యాశాఖ నోటిఫికేషన్ విడుదల చేసింది. గ్రామీణ చిన్నారులకు నాణ్యమైన విద్య అందించడంలో ఇది కీలకమని గ్రామస్థులు హర్షం వ్యక్తం చేస్తున్నారు. అవకాశాన్ని సద్వినియోగం చేసుకోవాలన్నారు.
KMM: కాంగ్రెస్ అధికారంలోకి వచ్చి రెండేళ్లు కావస్తున్నా ఏ ఒక్క హామీని పూర్తిస్థాయిలో నెరవేర్చలేదని, ప్రభుత్వం ఇచ్చిన 6 గ్యారెంటీలను తక్షణమే అమలు చేయాలని సీపీఐ ఖమ్మం జిల్లా కార్యదర్శి దండి సురేష్ అన్నారు. బుధవారం ఖమ్మం నగరంలోని ఖానాపురం శాఖ సమావేశంలో మాట్లాడారు. రైతులకు రూ. 2 లక్షల రుణమాఫీ క్షేత్రస్థాయిలో ఇవ్వలేదని అన్నారు.
