TSRTC Dussehra 2023 bumper offer Chance to win Rs 11 Lakhs cash prizes
తెలంగాణలో దసరా పండుగను పురస్కరించుకుని తెలంగాణ రాష్ట్ర రోడ్డు రవాణా సంస్థ (TSRTC) అదిరిపోయే ఆఫర్ ప్రకటించింది. ఈ పండుగల సందర్భంగా ఆర్టీసీలో ప్రయాణించిన ప్రజలకు నగదు బహుమతులు అందజేయనున్నట్లు తెలిపింది. ఇటివల రాఖీ పండుగ సందర్భంగా నిర్వహించిన లక్కీ డ్రాకు మంచి స్పందన రావడంతో దసరాకు కూడా అదే విధంగా ప్లాన్ చేస్తున్నారు. అయితే ఈ లక్కీ డ్రా క్యాష్ ప్రైజ్ కోసం ప్రయాణికులు తమ ప్రయాణం పూర్తైన తర్వాత టికెట్ వెనుక వారి పూర్తి పేరు, ఫోన్ నంబర్ రాసి ఆయా బస్టాండ్లలో ఏర్పాటు చేసిన డ్రాప్ బాక్సుల్లో వేయాలని సూచించారు. ఈ లక్కీ డ్రాలో గెల్చిన ప్రయాణికులకు రూ.11 లక్షల వరకు నగదు బహుమతులు అందజేయనున్నట్లు TSRTC ఎండీ సజ్జనార్ స్పష్టం చేశారు.
ఈ లక్కీ డ్రాలో భాగంగా ప్రతి రీజియన్ కు ఐదుగురు పురుషులు, ఐదుగురు మహిళల చొప్పిన మొత్తం 110 మందికి రూ.9900 చొప్పున నగదు బహుమతులు ఇస్తామని తెలిపారు. దీని కోసం అక్టోబర్ 21 నుంచి 23వ తేదీ వరకు, మళ్లీ అక్టోబర్ 28 నుంచి 30వ తేదీల్లో తెలంగాణలో ఆర్టీసీ బస్సుల్లో ప్రయాణించే వారందరూ ఈ లక్కీ డ్రాలో పాల్గొనవచ్చని వెల్లడించారు. దీంతోపాటు ముందుగా టిక్కెట్లను బుక్ చేసుకున్న వారికి డిస్కౌంట్ ధరలను కూడా అందిస్తున్నారు. ముందస్తు రిజర్వేషన్లు, మరింత సమాచారం కోసం www.tsrtconline.inని సందర్శించాలని సూచించారు.
ఇది కూడా చూడండి: Hyderabad: దేశంలోనే అత్యంత లగ్జరీ ఇళ్లు కలిగిన నగరంగా హైదరాబాద్..ముంబై రికార్డు బ్రేక్
