వందేభారత్‌ (Vande Bharat) రైలుకు పెను ప్రమాదం తప్పింది. ఖమ్మం (Khammam) జిల్లా చింతకాని మండలం నాగులవంచ రైల్వేస్టేషన్‌ సమీపంలో రైలు ఎద్దును ఢీకొట్టింది. సికింద్రాబాద్‌(Secunderabad) నుంచి విశాఖపట్నం వెళ్తున్న సమయంలో ఈ ఘటన చోటు చేసుకుంది. ఈ ఘటనలో రైలు ముందు భాగం దెబ్బతింది. దీంతో ఘటనాస్థలిలోనే రైలును నిలిపివేశారు. ఆ తర్వాత సిబ్బంది మరమ్మతులు చేస్తున్నారు. మరమ్మతులు పూర్తయిన తర్వాతనే రైలు బయలుదేరి వెళ్తుందని అధికారులు వెల్లడించారు. షెడ్యూల్‌ సమయం ప్రకారం రైలు.. రాత్రి 11.30గంటలకు విశాఖ (Visakhapatnam)చేరుకోవాల్సి ఉంటుంది. అయితే, ఈ ఘటన నేపథ్యంలో ఆలస్యమవుతుందని రైల్వే అధికారులు వివరించారు.
