ఒడిశా (Odisha) రైలు ప్రమాద బాధిత కుటుంబాలకు పరిహారం కింద టీఎంసీ రూ.2000 నోట్లను పంచుతోందని పశ్చిమ బెంగాల్ బీజేపీ అధ్యక్షుడు సుకాంత మంజుదార్ (Sukanta Manjudar) సంచలన ఆరోపణలు చేశారు. ఇందుకు సంబంధించి బాధితులు తమ చేతిలో రూ.2000 వేల నోట్లను పట్టుకున్న వీడియోలు సోషల్ మీడియా(Social media)లో వైరల్‌గా మారాయి. దీనిపై మంజుదార్ స్పందిస్తూ ఘాటు విమర్శలు చేశారు. బెంగాల్‌లోని అధికార టీఎంసీ (TMC)కి ప్రతిపక్ష బీజేపీకి మధ్య మాటల యుద్ధం తీవ్ర స్థాయికి చేరుకుంది. మమతా బెనర్జీ సూచనల మేరకు రాష్ట్ర మంత్రి ఒకరు తృణమూల్ పార్టీ తరపున బాధిత కుటుంబాలకు రూ. 2 లక్షల ఆర్థిక సాయం అందిస్తున్నారని ఆయన అన్నారు. పరిహారం ముసుగులో సీఎం మమతా (CM Mamata)బ్లాక్ మనీని వైట్‌గా మార్చుకుంటున్నారని ఆయన కామెంట్స్ చేశారు. కష్టకాలంలో ఉన్న వారికి రూ.2 వేల నోట్ల కట్టలను ఇవ్వడం ఏంటని నిలదీశారు. తమ వద్ద పోగైన నల్లధనాన్ని పెద్ద నోట్ల రూపంలో బాధిత కుటుంబాలకు ఇస్తున్నారని ధ్వజమెత్తారు. ఈ ఆరోపణలు ఇప్పుడు ఆ రాష్ట్ర రాజకీయాల్లో దుమారం రేపుతున్నాయి. మరో వైపు మంజుదార్ ట్వీట్‌పై నెటిజన్లు స్పందిస్తున్నారు. ప్రభుత్వం పరిహారం నగదు రూపంలో ఇవ్వదని చెక్ రూపంలోనే ఇస్తుందని నెటిజన్లు కామెంట్స్ చేస్తున్నారు. చెక్కులను మార్చుకున్నప్పుడు ఆర్బీఐ (RBI) నిబంధనల మేరకు బ్యాంకులు సైతం రూ.2 వేల నోట్లను ఎవరికి జారీ చేయడం లేదని కామెంట్స్ పెడుతున్నారు
చదవండి : NIMS : నిమ్స్ నూతన డైరెక్టర్‌‌గా బీరప్ప
