స్టార్ డైరెక్టర్ శంకర్ చిత్రాల్లో భారతీయుడు ఎంత హిట్‌గా నిలిచిందో ప్రత్యేకంగా చెప్పనక్కర్లేదు. అందుకే దానికి సీక్వెల్‌గా రెండున్నర దశాబ్దాల తర్వాత ఇండియన్ 2 మొదలు పెట్టాడు శంకర్. అయితే ఈ ప్రాజెక్ట్ కొంతభాగం షూటింగ్ జరుపుకున్న తర్వాత.. షూటింగ్ స్పాట్‌లో మేజర్ యాక్సిడెంట్ అవడంతో పాటు.. కొన్ని ఇతర కారణాల వల్ల మధ్యలోనే ఆగిపోయింది. దాంతో ఇండియన్ 2ని వదిలిపెట్టి రామ్ చరణ్‌తో సినిమా మొదలు పెట్టాడు శంకర్. ఆర్సీ 15 వర్కింగ్ టైటిల్‌తో దిల్ రాజు నిర్మాణంలో.. భారీ స్థాయిలో ఈ సినిమా తెరకెక్కుతోంది. అయితే ఈ మధ్యలో కమల్ హాసన్ ‘విక్రమ్’ సినిమాతో సాలిడ్ హిట్ అందుకున్నాడు. దాంతో అదే జోష్‌లో మళ్లీ ఇండియన్ 2ని లైన్లోకి తీసుకొచ్చాడు కమల్. అనుకున్నదే ఆలస్యమన్నట్టు ఆర్సీ 15 కంప్లీట్ అవకముందే ఇండియన్ 2ని తిరిగి పట్టాలెక్కించాడు శంకర్.
అలాగే చరణ్ సినిమాను కూడా ఈక్వల్‌గా షూటింగ్ చేస్తున్నాడు. రీసెంట్‌గానే ఈ రెండు సినిమాల లేటెస్ట్ షెడ్యూల్స్ మొదలయ్యాయి. ఇక భారతీయుడు 2 నెక్స్ట్ షెడ్యూల్ ని ఈ నెల మూడో వారంలో మొదలు పెట్టబోతున్నారు. ఈ నేపథ్యంలో ఈ మూవీ రన్ టైం గురించి ఓ ఇంట్రెస్టింగ్ న్యూస్ వినిపిస్తోంది. ఇండియన్ 2కి రైటర్లలో ఒకరైన జయ మోహన్ ఓ ఇంటర్వ్యూలో మాట్లాడుతూ.. భారతీయుడు 2 రన్ టైం దాదాపుగా 3 గంటల 10 నిమిషాల వరకు ఉండే చాన్స్ ఉందని చెప్పినట్టు టాక్. ఒకవేళ ఇదే నిజమైతే ఇండియన్ 2 నిడివి కాస్త ఎక్కువేనని చెప్పొచ్చు. ఆడియెన్స్‌ని మూడు గంటలకు పైగా థియేటర్లో కూర్చోబెట్టాలంటే బలమైన కంటెంట్ కావాలి. ఈ మధ్య వస్తున్న సినిమాలన్నీ దాదాపుగా మూడు గంటల లోపు రన్ టైంతో వస్తున్నాయి. కాబట్టి ఇండియన్ 2 గురించి ఇప్పుడే ఏం చెప్పలేం. ఇకపోతే ఇండియన్2లో కాజల్ అగర్వాల్, రకుల్ ప్రీత్ సింగ్‌ హీరోయిన్లుగా నటిస్తుండగా.. సిద్ధార్థ్ కీలక పాత్రలో నటిస్తున్నాడు.
