»18 People Died In Bihar Due To Lightning Cm Announced Rs 4 Lakh Compensation
Breaking: బీహార్లో పిడుగులు పడి 18 మంది మృతి..రూ.4 లక్షల పరిహారం ప్రకటించిన సీఎం
ఉరుమురు, మెరుపులతో కూడిన వర్షాల వల్ల చాలా ప్రాంతాల్లో భారీ ఆస్తి, ప్రాణ నష్టం వాటిల్లుతోంది. తాజాగా 24 గంటల్లో పిడుగులు పడి 18 మంది మృతిచెందారు. ఈ దారుణ ఘటనలు బీహార్లో చోటుచేసుకున్నాయి.
బీహార్లో దారుణం జరిగింది. పిడుగులు(Lightning) పడి గత 24 గంటల్లో 18 మంది ప్రాణాలు కోల్పోయిన ఘటన చోటుచేసుకుంది. వర్షాకాలం వల్ల గత కొన్ని రోజులుగా బీహార్లో మెరుపులు, ఉరుములతో కూడిన భారీ వర్షం కురుస్తోంది. బీహార్ లోని పలు జిల్లాల్లో ఒక్క రోజే పిడుగులు పడి 18 మంది ప్రాణాలు కోల్పోయారు. రోహతాస్ జిల్లాల్లో అయిదుగురు, అర్వాల్లో నలుగురు, శరన్లో ముగ్గురు, ఔరంగబాద్లో ఇద్దరు, బంకా-వైశాలి జిల్లాల్లో ఒక్కొక్కరు పిడుగుపాటుకు మరణించారు.
పిడుగుల వల్ల మృతిచెందిన బాధితులకు రూ.4 లక్షల పరిహారాన్ని ఇవ్వనున్నట్లు బీహార్ ప్రభుత్వం వెల్లడించింది. ఉరుములు, మెరుపులు ఎక్కువగా ఉన్న తరుణంలో డిజాస్టర్ మేనేజ్మెంట్ ఏజెన్సీ ప్రజలను అలర్ట్ చేసింది. గ్రామాల్లోని ప్రజలు వర్షం కురుస్తున్నప్పుడు వ్యవసాయ క్షేత్రాల్లోకి, పొలాల్లోకి వెళ్లొద్దని హెచ్చరించింది. కరెంటు పోల్స్, మట్టి ఇండ్ల వద్ద కూడా జాగ్రత్తగా ఉండాలని సూచనలు చేసింది. వర్షం పడుతున్న సమయంలో కిటికీల వద్ద ఉండొద్దని తెలిపింది. అలాగే ఏసీలు, ఫ్రిడ్జ్లు, ఎలక్ట్రిక్ పరికరాలను వర్షం వేళ తాకొద్దని పలు సూచనలు చేసింది.