కాంగ్రెస్ అధ్యక్షుడి పదవిని చేపట్టడానికి… రాహుల్ గాంధీ నిరాకరిస్తున్న సంగతి తెలిసిందే. ఈ క్రమంలో ఆ బాధ్యతలు ఎవరు చేపడతారు అనే విషయంలో సర్వత్రా ఆసక్తి నెలకొంది. అందరూ రాహుల్ గాంధీనే అధ్యక్ష పదవి చేపడితే బాగుంటుందని కోరుకుంటున్నప్పటికీ… ఆయన సముఖంగా లేకపోవడంతో.. ఇతరుల పేర్లు వినపడుతున్నాయి. ఎక్కువగా… రాజస్థాన్ ముఖ్యమంత్రి అశోక్ గెహ్లాట్ పేరు ఎక్కువగా వినపడుతుండటం గమనార్హం. ఈ క్రమంలోనే ఆయన సోనియా గాంధీ, కేంద్ర మాజీ మంత్రి శశిథరూర్ తో ఆయన సమావేశమైనట్లు తెలుస్తోంది.
అధ్యక్ష ఎన్నికల్లో పోటీ కోసమే ఆయన భేటీ అయ్యారని పార్టీవర్గాలు పేర్కొంటున్నాయి. ఎన్నికల్లో తాను ఎవరికీ మద్దతు ఇవ్వకుండా తటస్థంగా ఉంటానని ఎక్కువమంది పోటీ చేయడాన్ని ఆహ్వానిస్తానని సోనియా చెప్పినట్లు ఆ పార్టీ శ్రేణులు తెలిపాయి. రాజస్థాన్‌‌లో బీజేపీ ఆపరేషన్ లోటస్, సచిన్ పైలట్ తిరుగుబాటుతో సహా అనేక ముప్పులను ఎదుర్కొన్న అనుభవజ్ఞుడు అశోక్ గెహ్లాట్. అందుకే పార్టీ బాధ్యతలను చేపట్టవలసిందిగా సోనియా గాంధీ పదేపదే ఆయనను కోరుతున్నారు.
అయితే సచిన్ పైలట్‌కు ముఖ్యమంత్రి పదవిని వదులుకోవడంపై ఆయన ఆందోళన చెందుతున్నట్లు సమాచారం. మరోవైపు, చాలా సంవత్సరాలుగా ముఖ్యమంత్రి పదవి కోసం సచిన్ పైలట్ ఎదురుచూస్తున్నారు. ఎన్నికలకు ఏడాదే సమయం ఉన్నందున గెహ్లాట్ పార్టీ అధ్యక్షుడైతే తనకు అవకాశం వస్తుందని ఆశలు పెట్టుకున్నారు. అందుకే ఆయన సోమవారం ఢిల్లీకి చేరుకున్నారు.
సచిన్ పైలట్ అధిష్ఠానం దగ్గర తన డిమాండ్ బలంగా వినిపించినప్పుడల్లా గెహ్లాట్ ఇంకా పట్టుబడుతున్నారు. అయితే, తన స్థానంలో వచ్చిన వ్యక్తి తన విధేయుడుగా ఉండాలని ఆయన కోరుకుంటున్నారని పార్టీ వర్గాలు చెబుతున్నాయి. కాకపోతే, కాంగ్రెస్ వర్కింగ్ ప్రెసిడెంట్‌గా బాధ్యతలు చేపట్టి రెండు పాత్రలను కొనసాగించాలని ఆయన పట్టుబట్టవచ్చు. అయితే, మరో వర్గం మాత్రం సచిన్ పైలట్‌కు సీఎంగా ఎన్నికల ముందు అవకాశం లభిస్తుందని అంటోంది.
కాంగ్రెస్ అధ్యక్ష ఎన్నికలకు నోటిఫికేషన్ ఈ నెల 22న విడుదల కానుండగా.. 24 నుంచి 30 వరకు నామినేషన్లు స్వీకరించనున్నారు. అక్టోబర్ 17న ఎన్నిక నిర్వహించి 19న కొత్త అధ్యక్షుడిని ప్రకటించనున్నారు.
మరోవైపు, కాంగ్రెస్‌లో సంస్కరణల కోసం కొన్నేళ్లుగా ఒత్తిడి చేస్తున్న జీ-23 సీనియర్‌ నేతల్లో థరూర్ కూడా ఒకరు. కొత్త అధ్యక్షుడు ఉదయ్‌పూర్‌ డిక్లరేషన్‌ ప్రకారం పార్టీలో సంస్కరణలు తీసుకొస్తానని ప్రతిజ్ఞ చేయాలని 650 సంతకాలతో కాంగ్రెస్ యువజన సంఘం రాసిన లేఖపై తాను సంతకం చేసినట్లు శశిథరూర్ ట్వీట్ చేశారు. అంతేకాదు, తాను అధ్యక్షుడిగా ఎన్నికైతే తప్పకుండా వాటిని నెరవేర్చుతానని స్పష్టం చేశారు. దేశ ప్రజల ఆశలు, ఆకాంక్షలను నెరవేర్చేలా కాంగ్రెస్‌ను బలోపేతం చేయాలనే వారిలో మనం సభ్యులమని కేంద్ర మాజీ మంత్రి అన్నారు. అధ్యక్ష ఎన్నికలు నిర్వహించడాన్ని స్వాగతిస్తున్నానన్న థరూర్.. అది పార్టీకి ఎంతో మంచిదని భావిస్తున్నట్లు తెలిపారు.
