పవర్ స్టార్ అంటేనే హై ఓల్టేజ్ పవర్.. ముట్టుకుంటే మసే, పవర్ స్టార్ అంటే కణకణలాడే నిప్పు కణం.. ఎవ్వరైనా భస్మం కావాల్సిందే, పవర్ స్టార్ అంటే పవర్ ఫుల్ వెపన్.. తూటా లేకుండానే పేలిపోతుంది.. పవర్ స్టార్ అంటే రియల్ బాహుబలి.. ఆ శక్తిని తట్టుకోవడం కష్టం.. అందుకే బాహుబలి2లో ఇంటర్వెల్ బ్యాంగ్ పవర్ స్టార్ క్రేజ్‌తో రాసుకున్నారు.. ఇలా ఎంత చెప్పిన పవర్ స్టార్ పవన్ కళ్యాణ్ గురించి తక్కువే అవుతుంది. మొత్తంగా జనం మెచ్చే.. జనంతో నడిచే జనసేనాని.. అతనో ప్రభంజనం. అందుకే రాజకీయంగా జనాలకు తన వంతు ప్రయత్నంగా ఏదో చేయాలనే పట్టుదలతో ముందుకు సాగుతున్నాడు. కోట్లాది మంది ఆరాధించే పవర్ స్టార్‌కు జనమే సైన్యంలా వెంట నడుస్తున్నారు. అలాంటి పవర్ స్టార్ బర్త్ డే వస్తే.. అభిమానులకు దాన్ని మించిన పెద్ద పండగ లేదు. అందుకే సెప్టెంబర్ 2 కోసం వెయ్యి కళ్లతో ఎదురు చూస్తుంటారు. ఇక ఈ సమయం వస్తే అభిమానం హద్దులు దాటిపోతుంది. తమ రియల్ హీరో బర్త్ డే వేడుకలను అంతకు మించి అనేలా సెలబ్రేట్ చేసుకుంటారు. ప్రస్తుతం అదే జరుగుతోంది.
వారం, పది రోజుల ముందే పవన్ పుట్టిన రోజు వేడుకలు మొదలయ్యాయి. తమ్ముడు, జల్సా సినిమాల రీ రిలీజ్‌తో పాటు.. పలు సేవా కార్యక్రమాలతో తమ అభిమానాన్ని చాటుకుంటున్నారు పవర్ స్టార్ ఫ్యాన్స్. 1971 సెప్టెంబర్ 2న బాపట్లలో జన్మించిన పవన్ కళ్యాణ్.. నేడు 51వ జన్మదిన వేడుకను జరుపుకుంటున్నారు. దాంతో బర్త్ డే విషెష్‌తో సోషల్ మీడియా హోరెత్తి పోతోంది. మెగాస్టార్ సోదరుడిగా ‘అక్కడ అమ్మాయి ఇక్కడ అబ్బాయి’తో హీరోగా ఎంట్రీ ఇచ్చిన పవన్.. ఆ తర్వాత తన మ్యానరిజం, ఆటిట్యూడ్, స్టైల్‌తో.. మొన్న వచ్చిన భీమ్లా నాయక్ వరకు.. పవర్ స్టార్‌గా ఏ హీరోకి లేని క్రేజ్ సొంతం చేసుకున్నాడు. అందుకే భవిష్యత్‌లో ముఖ్యమంత్రిగా చూడాలని అనుకుంటున్నారు మెగా అభిమానులు. ఏదేమైనా పవర్ స్టార్ ఇలాంటి పుట్టినరోజులు మరెన్నో జరుపుకోవాలని.. జీవితంలో ఉన్నత స్థానానికి చేరుకోవాలని కోరుకుంటూ పవన్ కళ్యాణ్‌కు జన్మదిన శుభాకాంక్షలు తెలియజేద్దాం.
