రీసెంట్‌గా ఆర్ఆర్ఆర్ నాటునాటుసాంగ్ కు గోల్డెన్ గ్లోబ్ అవార్డ్ వచ్చిన సంగతి తెలిసిందే. గోల్డెన్ గ్లోబ్ అవార్డ్ కోసం అమెరికాలో ఉన్న చరణ్, తారక్.. పలు హాలీవుడ్ మీడియాకు ఇంటర్వ్యూలు ఇస్తున్నారు. అయితే వెరైటీ మ్యాగజైన్‌కు చెందిన మార్క్ మాల్కిన్‌తో కొన్ని ఇంట్రెస్టింగ్ విషయాలను వెల్లడించాడు చరణ్. ప్రస్తుతం తాను 6 ప్రాజెక్టులకు సైన్ చేసానని చెప్పుకొచ్చాడు. ఈఏడాదిలో 3 సినిమాలు.. వచ్చే ఏడాదిలో 3 సినిమాలకు సైన్ చేసినట్లు చెప్పాడు. దాంతో చరణ్ ఇన్నీ ప్రాజెక్ట్స్ లైన్లో పెట్టాడా.. అని ఆశ్చర్యపోతున్నారు అభిమానులు.
ప్రస్తుతం శంకర్ దర్శకత్వంలో రామ్ చరణ్ ఆర్‌సీ15 చేస్తున్నాడు. అలాగే బుచ్చిబాబుతో ఓ ప్రాజెక్ట్ అనౌన్స్ చేశాడు. ప్రస్తుతానికి చరణ్ చేతిలో ఈ రెండు సినిమాలు మాత్రమే ఉన్నట్టు మనకు తెలుసు. కానీ ఏకంగా అరడజను సినిమాలు సైన్ చేశానని చెప్పడంతో.. మెగా ఫ్యాన్స్ ఖుషీ అవుతున్నారు. సుకుమార్, కన్నడ డైరెక్టర్ నర్తన్, లోకేష్ కనగరాజ్ లాంటి టాలెండెట్ డైరెక్టర్స్ చరణ్‌తో ట్రావెల్ అవుతున్నారు. కాబట్టి చరణ్ నెక్స్ట్ డైరెక్టర్స్ లిస్ట్‌లో వీళ్లు ఫిక్స్ అయ్యారని చెప్పొచ్చు. ఇక ఈ ప్రాజెక్ట్స్‌తో పాటు.. మార్వెల్ స్టూడియోస్ నుండి కాల్ వస్తే తప్పకుండా చేస్తాను అంటూ చెప్పుకొచ్చాడు చరణ్. అంతేకాదు.. ఇప్పటికే చరణ్‌కు ఓ హాలీవుడ్ ఆఫర్ కూడా వచ్చినట్టుగా తెలుస్తోంది. త్వరలోనే దీనిపై కూడా క్లారిటీ రానుందని అంటున్నారు. ఏదేమైనా ప్రభాస్ తర్వాత భారీ ప్రాజెక్ట్స్ ఉన్న హీరోల్లో రామ్ చరణ్ ముందు వరుసలో ఉన్నాడని చెప్పొచ్చు.
