యాక్సిడెంట్ నుంచి కోలుకున్న తర్వాత స్పీడ్ పెంచాడు మెగా మేనల్లుడు సాయి ధరమ్ తేజ్. ప్రస్తుతం విరూపాక్ష అనే సినిమా చేస్తున్నాడు. కెరియర్ పరంగా సాయిధరమ్‌కి ఇది 15వ సినిమా. శ్రీ వెంకటేశ్వర సినీ చిత్ర, సుకుమార్ రైటింగ్స్‌ కలిసి నిర్మిస్తున్న ఈ సినిమాకి.. సుకుమార్ శిష్యుడు కార్తీక్ దండు దర్శకత్వం వహిస్తుండగా.. సుకుమార్ స్క్రీన్ ప్లే అందిస్తున్నాడు. పాన్ ఇండియా స్థాయిలో తెరకెక్కుతున్న ఈ సినిమాను.. తెలుగుతో పాటు తమిళ, మలయాళ, కన్నడ, హిందీ భాషల్లో.. ఏప్రిల్ 21వ తేదీన గ్రాండ్‌గా విడుదల చేసేందుకు ప్లాన్ చేస్తున్నారు. అయితే ఈ సినిమా ప్రమోషన్స్‌ను భారీగా ప్లాన్ చేస్తున్నారు మేకర్స్. స్టార్ హీరోలతో భారీ హైప్ క్రియేట్ చేస్తున్నారు. ఇప్పటికే టైటిల్ గ్లింప్స్‌ను యంగ్ టైగర్ ఎన్టీఆర్ వాయిస్ ఓవర్‌తో రిలీజ్ చేశారు. తారక్ పవర్ ఫుల్ వాయిస్‌తో.. ఒక్కసారిగా ఈ సినిమాకు భారీ హైప్ క్రియేట్ అయింది. ఇక ఇప్పుడు పవర్ స్టార్ పవన్ కళ్యాణ్‌ను రంగంలోకి దింపుతున్నారు. ‘విరూపాక్ష’ సినిమా టీజర్‌ని పవన్ చేతుల మీదుగా రిలీజ్ చేయిస్తున్నట్టుగా తెలుస్తుంది. ఇంకా అధికారిక ప్రకటన రాకపోయినా.. మార్చి 1న టీజర్ రిలీజ్‌కు ప్లాన్ చేస్తున్నారట. ప్రస్తుతం పవన్ కళ్యాణ్, సాయి ధరమ్ తేజ్ కలిసి తమిళ్ మూవీ ‘వినోదయ సీతమ్’ రీమేక్‌లో నటిస్తున్నారు. దాంతో విరూపాక్షకు మరింత హైప్ రానుందని చెప్పొచ్చు. ఇక కాంతార ఫేమ్ అజనీష్ లోకనాథ్ సంగీతం అందిస్తున్న ఈ సినిమాలో.. సాయి ధరమ్ సరసన సంయుక్త మీనన్ హీరోయిన్‌గా నటిస్తోంది. మరి ఈ సినిమాతో సాయి ఎలాంటి విజయాన్ని అందుకుంటాడో చూడాలి.
