రామ జన్మభూమి అయిన అయోధ్య (Ayodhya)లో దారుణ ఘటన చోటుచేసుకుంది. ప్రఖ్యాత హనుమాన్ గర్హి ఆలయంలోని (Hanuman Garhi Temple) పూజారిని గుర్తు తెలియని వ్యక్తులు గొంతు కోసి దారుణంగా హత్య చేశారు. ఈ మేరకు సీనియర్ పోలీస్ సూపరింటెండెంట్ రాజ్ కరణ్ నయ్యర్ ఈ ఘటనకు సంబంధించిన వివరాలను వెల్లడించారు. స్థానిక హనుమాన్ గర్హి ఆలయంలో 44 ఏళ్ల రామ్ సహరే దాస్ (Ram Sahare Das) అనే పూజారి విధులు నిర్వహిస్తున్నారు. తన ఇద్దరు శిష్యులతో కలిసి ఆయన ఆలయానికి పక్కనే ఉన్న ఓ గదిలో నివశిస్తున్నారు.
చదవండి: Visakapatnam: విషాదం..ఆర్కే బీచ్‌లో ఇద్దరు గల్లంతు
హై సెక్యూరిటీ జోన్‌గా ఆ ప్రాంతంలో రామ్ సహరే (Ram Sahare Das) విగతజీవిగా కనిపించడం అందరినీ ఉలిక్కిపడేలా చేసింది. రామ జన్మభూమిలో ఈ దారుణ ఘటన కలకలం రేపింది. పోలీసులు సంఘటనా స్థలానికి చేరుకుని విచారణ చేశారు. పూజారిని గొంతు కోసి హత్య చేసినట్లు పోలీసులు వెల్లడించారు. గురువారం ఉదయం ఈ దారుణ ఘటన జరిగిందని తెలిపారు. దుండగులు పదునైన ఆయుధంతో దాడి చేశారని గుర్తించారు.
చదవండి: Journalist Sowmya: అయిదుగురు దోషులుగా.. హత్య కేసులో కోర్టు కీలక తీర్పు
గత రాత్రి పూజారికి, ఆయన శిష్యులకు మధ్య తీవ్ర ఘర్షణలు జరిగినట్లు ప్రత్యక్ష సాక్షులు తెలియజేయడంతో వారి కోసం పోలీసులు గాలిస్తున్నారు. ఓ శిష్యుడు పట్టుబడగా మరో శిష్యుడు పరారీలో ఉన్నాడు. దీంతో పోలీసులు బృందాలుగా ఏర్పడి ఆ శిష్యుడి కోసం గాలింపు చర్యలు చేపట్టారు. రామ మందిర ప్రాంతంలో ఈ హత్య హైసెక్యూరిటీ జోన్ మధ్య జరగడంతో పోలీసులు ఈ కేసును సీరియస్‌గా తీసుకున్నారు. ఈ దారుణానికి పాల్పడిన నిందితులకు కఠిన శిక్ష పడేలా చేస్తామని తెలిపారు.
