‘అన్నా మల్లోచ్చినా.. అన్నా నేను రైతు బిడ్డనన్నా అంటూ బిగ్‌బాస్ లోకి అడుగుపెట్టిన పల్లవి ప్రశాంత్ ఎన్నో అవమానాల తర్వాత టైటిల్ విన్నర్ అయ్యి రికార్డు నెలకొల్పాడు. మూడు నెలలకు పైగా తెలుగు రాష్ట్రాల ప్రజలను ఉర్రూతలూగించిన రియాలిటీ షో బిగ్ బాస్ సీజన్-7 ముగిసింది. ఈ సీజన్ టైటిల్ ను ‘రైతు బిడ్డ’ పల్లవి ప్రశాంత్ సొంతం చేసుకున్నాడు. గ్రాండ్ ఫినాలే చివర్లో బిగ్ బాస్ ఇంట్లో పల్లవి ప్రశాంత్, అమర్ దీప్ చౌదరిలను హోస్ట్ నాగార్జున స్టేజిపైకి తీసుకొచ్చారు.
పల్లవి ప్రశాంత్‌ను టైటిల్ విజేతగా అనౌన్స్ చేశారు. అమర్ దీప్ చౌదరిని రన్నరప్‌గా నాగార్జున ప్రకటించారు. బిగ్ బాస్ సీజన్-7 విన్నర్ అయిన పల్లవి ప్రశాంత్‌కు రూ.35 లక్షల ప్రైజ్ మనీ దక్కింది. అలాగే మారుతి సుజుకి బ్రెజా కారు, జోయాలుక్కాస్ నుంచి రూ.15 లక్షల గిఫ్ట్ వోచర్ కూడా పల్లవి ప్రశాంత్ సొంతం చేసుకున్నాడు. టైటిల్ గెలిచిన తర్వాత పల్లవి ప్రశాంత్ మాట్లాడుతూ.. తాను ముందుగా చెప్పినట్టుగా ప్రైజ్ మనీని గెలిచానని అన్నాడు. ప్రతి పైసా కష్టాల్లో ఉన్న రైతులకు ఇస్తానని బిగ్‌బాస్7 వేదికపై నుంచే తెలిపాడు. తనకు బహుమతిగా లభించిన కారును తన తండ్రికి ఇస్తానని, తల్లికి నెక్లెస్ ఇస్తానని ప్రకటించాడు.
బిగ్ బాస్ హౌస్ వద్ద భారీగా అభిమానులు చేరుకున్నారు. అటు పల్లవి ప్రశాంత్, ఇటు అమరదీప్ చౌదరి అభిమానుల మధ్య ఆ ప్రాంతం అంతా కిక్కిరిసింది. ఓటింగ్‌లో రైతు బిడ్డకు తిరుగులేని మద్దతు లభించింది. అదే తనను విజేతగా నిలిపింది. రెండో స్థానంలో సీరియల్‌ నటుడు అమర్ దీప్ నిలవగా, మూడో స్థానంలో శివాజీ నిలిచాడు. నాలుగో స్థానంలో ప్రిన్స్‌ యావర్, ఐదో స్థానంలో ప్రియాంక జైన్‌, ఆరో ప్లేస్‌లో అర్జున్ అంబటి నిలిచారు.
