తెలంగాణ రాష్ట్రంలో తమ బలం పెంచుకునేందుకు బీజేపీ చాలా ప్రయత్నాలే చేస్తోంది. అందరూ ఒకలా ఆలోచేస్తుంటే.. బీజేపీ మాత్రం మరోలా ఆలోచించి అడుగులు వేస్తోంది. రాజకీయంగా తమకు హైక్ తెచ్చుకోవడం కోసం సినీ ఇండస్ట్రీపై ఫోకస్ పెట్టినట్లు తెలుస్తోంది.
తెలంగాణ ప‌ర్య‌ట‌న‌కు వ‌స్తున్న బీజేపీ అధినాయ‌క‌త్వం తెలుగు సినీ ప‌రిశ్ర‌మ‌కు చెందిన ప్ర‌ముఖ న‌టుల‌తో వ‌రుస‌గా భేటీలు అవుతుండటం సర్వత్రా ఆసక్తి పెంచుతోంది. గ‌త‌వారం మునుగోడులో నిర్వ‌హించిన బీజేపీ బ‌హిరంగ స‌భ‌లో పాల్గొనేందుకు వ‌చ్చిన బీజేపీ కీల‌క నేత, కేంద్ర హోం శాఖ మంత్రి అమిత్ షా… టాలీవుడ్ యంగ్ టైగ‌ర్ జూనియ‌ర్ ఎన్టీఆర్‌తో భేటీ అయిన సంగ‌తి తెలిసిందే. దాదాపుగా అర‌గంట‌కు పైగా సాగిన ఈ భేటీలో జూనియ‌ర్ ఎన్టీఆర్‌తో అమిత్ షా ఏఏ అంశాల‌పై చ‌ర్చించార‌నే విషయం బయటకు రాకున్నా… ఈ భేటీపై ఇటు తెలంగాణ‌తో పాటు అటు ఏపీలోనూ పెద్ద చ‌ర్చే సాగుతోంది.
తాజాగా శ‌నివారం తెలంగాణ ప‌ర్య‌ట‌న‌కు రానున్న బీజేపీ జాతీయ అధ్య‌క్షుడు జేపీ న‌డ్డాతో టాలీవుడ్‌కు చెందిన మ‌రో హీరో నితిన్ భేటీ కానున్నట్టు సమాచారం. బీజేపీ తెలంగాణ అధ్య‌క్షుడు బండి సంజ‌య్ ప్ర‌జా సంగ్రామ యాత్ర పేరిట చేప‌ట్టిన మూడో ద‌శ యాత్ర రేపు వ‌రంగ‌ల్‌లో ముగియ‌నుంది. ఈ సంద‌ర్భంగా హ‌న్మ‌కొండ ఆర్ట్స్ కాలేజీలో బీజేపీ భారీ బ‌హిరంగ స‌భ ఏర్పాటు చేసింది. ఈ స‌భ‌కు హాజ‌ర‌య్యేందుకే జేపీ న‌డ్డా తెలంగాణ వ‌స్తున్నారు. ఈ ప‌ర్య‌ట‌న‌లో భాగంగా ఆయ‌న హీరో నితిన్‌తో భేటీ కానున్నట్టు తెలుస్తోంది.
అయితే.. ఇదంతా బీజేపీ దేని కోసం చేస్తోంది అనే విషయం బయటకు రానప్పటికీ.. వివిధ వాదనలు అయితే వినిపిస్తున్నాయి. మామూలుగా వచ్చి ప్రచారం చేసుకొని పోతే కన్నా… ఇలా చేయడం వల్ల.. తెలంగాణ ప్రజలకు త్వరగా చేరువ కావచ్చు అనుకున్నారో లేదా… ఆ హీరోలను తమ పార్టీకి ఉపయోగించుకోవాలని అనుకుంటున్నారో తెలీదు కానీ… ప్రస్తుతం ఈ విషయం మాత్రం హాట్ టాపిక్ గా నడుస్తోంది.
