NLR: విడవలూరు పట్టణంలోని శ్రీ అంకమ్మ తల్లి దేవస్థానంలో ఆదివారం సందర్భంగా ప్రత్యేక పూజ కార్యక్రమాలను నిర్వహించారు. అమ్మవారికి అభిషేకం తదితర పూజా కార్యక్రమాలు అంగరంగ వైభవంగా జరిగాయి. ప్రత్యేక పుష్ప అలంకరణలో శ్రీ అంకమ్మ తల్లి భక్తులకు దర్శనమిచ్చారు. భక్తులు విచ్చేసి అమ్మవారిని దర్శించుకున్నారు. తదుపరి తీర్థ ప్రసాదాలను స్వీకరించారు.
KRNL: కోడుమూరు గ్రామపంచాయతీ ఆఫీస్ నందు ఇండస్ ఇంటర్నేషనల్ స్కూల్ విద్యార్థిని హన్షిక ఉచిత వైద్య శిబిరాన్ని నిర్వహించారు. ఈ శిబిరం, స్థానిక పేద ప్రజలకు ఆరోగ్య సేవలను అందించడాన్ని లక్ష్యంగా పెట్టుకుంది. వైద్య శిబిరం, ఉచిత సేవల పరంగా జనరల్ హెల్త్ కన్సల్టేషన్లు, రక్తపోటు మరియు మధుమేహం స్క్రీనింగ్‌లు మరియు ప్రాథమిక వైద్య పరీక్షలను అందించారు.
SKLM: సిరిపురం గ్రామంలో శనివారం జరిగిన అగ్నిప్రమాదం హృదయాలను కలచివేసిందని ఎంపీ కె. అప్పలనాయుడు అన్నారు. ఈ విషయం తెలుసుకున్న ఎంపీ ఆదివారం అగ్ని ప్రమాద బాధితులను పరామర్శించారు. ఈ మేరకు వారికి అండగా ఎంపీ, MLA కొండ్రు మురళి కలిపి రూ. 3 లక్షల సహాయంతోపాటు, నిత్యవసర వస్తువులు అందజేశారు. పక్క ఇళ్లు శాంక్షన్ చేయిస్తామని బాధితులకు హామీ ఇచ్చారు.
KRNL: పగిడ్యాల మండలంలోని లక్ష్మాపురంలో జంగాల కాలనీలో మంచినీటితో ఇబ్బందులు పడుతున్న కాలనీవాసులు గ్రామ సర్పంచ్ సిరిగిరి సుజాతకు విన్నవించారు. ఆమె వెంటనే స్పందించి అధికారులతో మాట్లాడారు. అనంతరం జేసీబీతో తవ్వించి నూతన పైపు లైన్ ఏర్పాటు చేశారు. దీంతో కాలనీవాసులు అభినందనలు తెలిపారు.
KRNL: కానిస్టేబుల్ దేహదారుడ్య పరీక్షల (ట్రయల్ రన్ ) రీహర్సల్‌ను జిల్లా ఎస్పీ బిందు మాధవ్ పరిశీలించారు. రేపటి నుండి కర్నూలు ఏపిఎస్పీ 2వ బెటాలియన్ మైదానంలో జరిగే పీఎంటీ, పీఈటీ పరీక్షల నేపథ్యంలో పాల్గొనే పోలీసు అధికారులు, సిబ్బంది, కొంతమంది యువకులతో ఎస్పీ ఆదివారం ట్రయల్ రన్ నిర్వహించారు. ఈ ఈవెంట్స్‌ను పారదర్శకంగా నిర్వహించాలని ఆదేశాలు జారీ చేశారు.
కోనసీమ: మండపేట పట్టణంలో ఇటీవల ప్రమాదవశాత్తూ మరణించిన జనసేన పార్టీ క్రియాశీలక సభ్యుడు కొమ్మిశెట్టి వెంకటేష్ కుటుంబానికి 5లక్షల రూపాయల భీమా చెక్కును రాష్ట్ర పౌర సరఫరాల శాఖామాత్యులు, జనసేన పార్టీ PAC ఛైర్మన్ శ్రీ నాదెండ్ల మనోహర్ ఆదివారం అందజేశారు. బాధిత కుటుంబ సభ్యులకు ఆయన ధైర్యం చెప్పారు. పిల్లల చదువుల బాధ్యతను పార్టీ చూస్తుందని భరోసా ఇచ్చారు.
CTR: వరుస తుఫాన్లతో దెబ్బతిన్న పంటలకు నష్టపరిహారం అందేదెప్పుడు అంటూ చౌడేపల్లి మండలంలో రైతులు ఆందోళన వ్యక్తం చేస్తున్నారు. ఎడతెరిపి లేని వర్షాలకు చేతికందే పంటలు నాశనం అవ్వడంతో వారు ఆవేదన చెందారు. అధికారులు త్వరగా స్పందించి తమకు నష్టం పరిహారం అందేలా చేయాలని వారు కోరారు.
కోనసీమ: జనవరి 5న విజయవాడలో జరగనున్న హైందవ శంఖారావం కార్యక్రమానికి విశ్వహిందూ పరిషత్ సభ్యులు మంత్రి సుభాష్‌కి ఆదివారం ఆహ్వానం అందజేశారు. ఈ సందర్భంగా మంత్రి సుభాష్ మాట్లాడుతూ.. జనవరి 5న హైందవ శంఖారావ కార్యక్రమానికి ప్రతి హిందువు తరలిరావాలని పిలుపునిచ్చారు. ఈ కార్యక్రమంలో విశ్వహిందూ పరిషత్ సభ్యులు పాల్గొన్నారు.
కోనసీమ: జనవరి 5వ తేదీన విజయవాడలో నిర్వహించే హైందవ శంఖారావం సభను విజయవంతం చేయాలని RSS, విశ్వహిందూ పరిషత్ నాయకులు పిలుపునిచ్చారు. మామిడికుదురు మండలంలోని మగటపల్లి గ్రామంలో ఆదివారం మాజీ ZP ఛైర్మన్ నామన రాంబాబుకు RSS , విశ్వహిందూ పరిషత్ నాయకులు హైందవ శంఖారావం సభకు హాజరుకావాలని కోరుతూ ఆహ్వాన పత్రికను అందజేశారు.
ప్రకాశం: ఒంగోలు నగర పరిధిలోని పెళ్లూరు ఫ్లై ఓవర్ దగ్గర ఆదివారం ఉదయం టంగుటూరు నుండి వస్తున్న ఆటోను వెనుక వైపు నుంచి వేగంగా వస్తున్న కారు ఢీకొట్టింది. దీంతో ఆటోలో ప్రయాణిస్తున్న టంగుటూరుకి చెందిన లక్కే పద్మ మరణించింది. ఇద్దరికీ గాయాలయ్యయి. వీరు బొంతలు కుట్టటానికి ఒంగోలు వస్తుండగా ప్రమాదానికి గురయ్యారు.
AKP: రావికమతం మండలం చీమలపాడు పంచాయతీ చలిసింగం గ్రామ రోడ్డుకు ఫారెస్ట్ అనుమతులను తక్షణమే ఇవ్వాలని ఆదివారం గిరిజనులు గుర్రాలతో ర్యాలీ నిర్వహించి నిరసన చేపట్టారు. ఏపీ గిరిజన సంఘం 5వ షెడ్యూల్ సాధన కమిటీ జిల్లా గౌరవ అధ్యక్షులు కె. గోవిందరావు మాట్లాడుతూ.. ఫారెస్ట్ అనుమతులు లేక నేటికీ రోడ్డు నిర్మాణం కావడం లేదన్నారు. తక్షణమే కలెక్టర్ స్పందించాలని కోరారు.
SKLM: ఇచ్చాపురం(మం) డొంకూరు సముద్రంలో లంగరు వేసిన బోటు అలల తాకిడికి మునిగి ధ్వంసమైంది. గ్రామానికి చెందిన బడే చిన్నారావుతో పాటు మరి కొంతమంది మత్స్యకారులు కలిసి సముద్రంలో వేట ముగించుకుని ఆదివారం తెల్లవారుజామున తీరానికి చేరుకున్నారు. తీరానికి సమీప ప్రాంతం సముద్రంలో బోటును లంగరు వేసి ఇళ్లకు వచ్చేసారు. ఇంతలోనే రాకాసి అలలు తాకిడికి లంగరు వేసిన బోటు ధ్వంసమైంది.
PPM: యువగళం పాదయాత్రలో విద్యార్థులకు నారా లోకేశ్ ఇచ్చిన హామీలను నెరవేర్చాలని ఏఐఎస్ఎఫ్ జిల్లా ప్రధాన కార్యదర్శి రవికుమార్ డిమాండ్ చేశారు. ఆదివారం పార్వతీపురంలో ఆయన మాట్లాడుతూ.. పెండింగ్‌లో ఉన్న ఫీజు రీయింబర్స్మెంట్, స్కాలర్ షిప్ బకాయిలు విడుదల చేయాలని కోరుతూ.. సోమవారం విజయవాడలో జరిగే పోరు దీక్షకు విద్యార్థులు హాజరు కావాలని పిలుపునిచ్చారు.
సత్యసాయి: ధర్మవరం పట్టణంలో ద్విచక్ర వాహనదారులకు ఏఎస్సై పుట్టప్ప ఆధ్వర్యంలో పోలీసులు ఆదివారం రోడ్డు ప్రమాదాలు జరగకుండా అవగాహన కల్పించారు. ముఖ్యంగా మైనర్లకు ద్విచక్ర వాహనాలు ఇవ్వకూడదని తల్లిదండ్రులకు సూచించారు. ద్విచక్ర వాహనాలు నడిపే సమయంలో హెల్మెట్ ధరించి ట్రాఫిక్ నిబంధనలు పాటించాలన్నారు.
TPT: SV యునివర్సిటీ పరిధిలో జరుగుతున్న PG మొదటి సెమిస్టర్ పరీక్షలు వాయిదా పడినట్లు పరీక్షల నియంత్రణ అధికారి దామ్లా నాయక్ తెలిపారు. ఈ నెల 30నుంచి పరీక్షలు జరగాల్సి ఉండగా.. విద్యార్థుల అభ్యర్థన మేరకు జనవరి 3వ తేదీకి మార్చినట్లు ఆయన తెలిపారు. విద్యార్థులు ఈ విషయాన్ని గమనించాలని దామ్లా నాయక్ సూచించారు.
