pragnan from karimnagar acted in negative role in kaala barbarian
బాలీవుడ్ అనగానే ఆ ఇండస్ట్రీ రేంజ్ ఎక్కడో ఉంటుంది. ఇప్పుడిప్పుడు తెలుగు ఇండస్ట్రీ కూడా బాలీవుడ్ తో పోటీ పడుతోంది కానీ.. ఒకప్పుడు బాలీవుడ్ కు ఉన్నంత క్రేజ్ మరే ఇండస్ట్రీకి ఉండేది కాదు. ప్రస్తుతం ఏ ఇండస్ట్రీలో అయినా సరే సినిమా అంటే అది పాన్ ఇండియా లేవల్ లో వస్తోంది. టాలెంట్ ఉంటే.. సత్తా ఉంటే ప్రపంచం మొత్తాన్ని కూడా తమవైపునకు తిప్పుకోవచ్చు. తాజాగా తెలంగాణలోని కరీంనగర్ కు చెందిన ఓ కుర్రాడు.. ఏకంగా బాలీవుడ్ మూవీలో మెయిల్ విలన్ గా నటించే చాన్స్ కొట్టేశాడు.
ఆ సినిమా పేరు కాలా బార్బేరియన్ చాప్టర్ వన్. ఈ సినిమా ట్రైలర్ ఇటీవల విడుదలైంది. ఈ సినిమాలో ప్రజ్ఞాన్ అనే కుర్రాడు విలన్ గా చేశాడు. టాలీవుడ్ లో బాల నటుడిగా పలు సినిమాల్లో నటించిన ప్రజ్ఞాన్.. నటన మీద ఉన్న ఆసక్తితో పూణె వెళ్లి.. అక్కడ పూణె ఫిలిం ఇన్ స్టిట్యూట్ లో శిక్షణ పొందాడు. ఆ తర్వాత కాలా బార్బేరియన్ అనే సినిమాలో విలన్ గా చేసే చాన్స్ దక్కింది ప్రజ్ఞాన్ కు.
ఈ సినిమాను హిందీతో పాటు తెలుగులోనూ విడుదల చేయనున్నారు. ఇటీవల విడుదలైన ట్రైలర్ సోషల్ మీడియాలో దూసుకుపోతోంది. ట్రైలర్ లో ప్రజ్ఞాన్ నటనకు మంచి మార్కులే పడ్డాయి. ఈ సినిమా ట్రైలర్ ను ప్రముఖ దర్శకులు ఎన్ శంకర్ లాంచ్ చేశారు. ఈ సందర్భంగా ఈ సినిమాలో తన పాత్ర గురించి మాట్లాడిన ప్రజ్ఞాన్.. సైకో, మల్టీ పర్సనాలిటీ డిజార్డర్ ఉన్న వ్యక్తిగా, విలన్ గా ఈ సినిమాలో నటించానని.. చాలా వేరియేషన్స్ ఉన్న పాత్ర అని ప్రజ్ఞాన్ చెప్పుకొచ్చాడు.
