HYD: అవినీతికి కాదేదీ అనర్హం అన్నట్లుగా ఉంది GHMC తీరు. ఆఖరికి ప్రజారోగ్యానికి చేసే దోమల ఫాగింగ్లోనూ స్కాంకు పాల్పడుతున్నారు. తాజాగా మల్కాజ్గిరి సర్కిల్లో ఫాగింగ్కు వాడే డీజిల్ను సూపర్వైజర్లు, AE, SEల అండతో సిబ్బంది రూ. 10 కమీషన్ చొప్పున పెట్రోల్ బంకులకు అమ్ముకుంటోంది. పంపకాల్లో తేడాలు రావడంతో ఈ ‘దోమల దండు’ బాగోతం బయటపడింది.
MBNR: పేదల సొంతింటి కల నెరవేర్చడమే ప్రభుత్వ లక్ష్యమని ఎమ్మెల్యే మధుసూదన్ రెడ్డి అన్నారు. భూత్పూర్ మండలం షేర్ పల్లి, హస్నాపూర్ గ్రామాల్లో నూతన ఇందిరమ్మ ఇళ్ల గృహప్రవేశాల్లో ఆయన పాల్గొన్నారు. లబ్ధిదారులకు నూతన వస్త్రాలు అందజేసి శుభాకాంక్షలు తెలిపారు. రేవంత్ రెడ్డి సర్కార్ పేదలకు అండగా ఉంటూ సంక్షేమ పథకాలను అద్భుతంగా అమలు చేస్తోందని ఆయన పేర్కొన్నారు.
MDK: నిజాంపేట మండలం కల్వకుంట్ల గ్రామస్తుల కల నెరవేరింది. కొన్ని దశాబ్దాలుగా తమ గ్రామానికి ఆర్టీసీ బస్సు రాకపోవడంతో ఇబ్బందులు ఎదుర్కొంటున్న ప్రజలు ఎమ్మెల్యే రోహిత్ రావు, మాజీ ఎమ్మెల్యే మైనంపల్లి హనుమంతరావు దృష్టికి తీసుకెళ్లారు. ఎన్నికల సమయంలో ఇచ్చిన హామీ మేరకు శుక్రవారం నుండి ఆర్టీసీ బస్సు ప్రారంభం కావడంతో స్థానికులు హర్షం వ్యక్తం చేశారు,
HNK: అర్జున్ సురవరం, కేశవ, కిరాక్ పార్టీ, స్పై, స్వామిరారా తదితర చిత్రాల్లో నటించిన హీరో నిఖిల్ శుక్రవారం ఓరుగల్లుకు రానున్నారు. వరంగల్ నిట్లో జరుగుతున్న స్ప్రింగ్ స్ప్రీ వేడుకలకు ఆయన ముఖ్య అతిథిగా వస్తున్నారు. మధ్యాహ్నం 3 గంటలకు నిట్ ఓల్డ్ ఆడిటోరియంలో విద్యార్థులతో మమేకమై చర్చాగోష్ఠి నిర్వహిస్తారు. ఇందుకోసం ఆడిటోరియంలో తగిన ఏర్పాట్లు పూర్తి చేశారు.
SDPT: ఈ నెల 23 నుంచి 27 వరకు సిద్దిపేటలో ఐదు రోజులపాటు సర్పంచ్లకు శిక్షణ కార్యక్రమం నిర్వహిస్తున్నారు. బెజ్జంకి, జగదేవ్పూర్, వర్గల్, నంగునూరు మండలాలకు చెందిన 101 మంది సర్పంచులు పాల్గొన్నారు. పారిశుద్ధ్యం, చెట్ల పెంపకం, వీధి దీపాల ఏర్పాటు, అభివృద్ధి పనుల నిర్వహణ వంటి అంశాలపై రిసోర్స్ పర్సన్లు రామకృష్ణారెడ్డి, సమ్మిరెడ్డి, మల్లికార్జున్, శిక్షణ అందించారు.
BHPL: జిల్లా కేంద్రంలోని MLA క్యాంప్ కార్యాలయంలో ఇవాళ MLA గండ్ర సత్యనారాయణ రావును, బంజారా సంఘాల నేతలు, పలువురు ప్రముఖులు మర్యాదపూర్వకంగా కలిశారు. ఈ సందర్భంగా MLAకు రేపు జరగబోయే బంజారాల ఆరాధ్య దైవం సంత్ శ్రీ సేవాలాల్ మహారాజ్ జయంతి వేడుకలకు హాజరు కావాలని ఆహ్వాన పత్రం అందజేశారు. దీనికి MLA సానుకూలంగా స్పందించారు.
NZB: వేల్పూర్ మండలంలోని కుక్నూరు జిల్లా పరిషత్ ఉన్నత పాఠశాలను జిల్లా విద్యాశాఖ ప్యానల్ బృందం సందర్శించింది. DEO అశోక్ ఆదేశాల మేరకు అరవింద్ కుమార్ నేతృత్వంలో ఈ తనిఖీలు నిర్వహించారు. పాఠశాలలోని విద్యా ప్రమాణాలు, రికార్డులను పరిశీలించిన బృందం.. ఉపాధ్యాయులకు పలు సూచనలు చేసింది.
సంగారెడ్డి జిల్లా ఉపాధి కల్పన కార్యాలయం ఆధ్వర్యంలో నేడు ఉదయం 10:30 గంటలకు పాత డీఆర్డీఏ కార్యాలయ ఆవరణలో జాబ్ మేళా నిర్వహిస్తున్నట్లు ఉపాధి అధికారి ఎంవై నిర్మల తెలిపారు. అపోలో ఫార్మసీలో ఉద్యోగాల కోసం 10వ తరగతి ఇంటర్, డిగ్రీ అర్హత కలిగి, 28 నుంచి 35 ఏళ్ల వయస్సు ఉన్న వారు అర్హులని పేర్కొన్నారు. ఆసక్తి గల అభ్యర్థులు ఈ అవకాశాన్ని సద్వినియోగం చేసుకోవాలని ఆమె కోరారు.
VKB: అనంతగిరి రిజర్వ్ ఫారెస్ట్లో ఎండాకాలం ప్రభావంతో వన్యప్రాణులకు ఆహార కొరత తీవ్రంగా మారింది. అడవిలో తిండి దొరకక కోతులు గుంపులు గుంపులుగా రోడ్లపైకి చేరుతున్నాయి. జిల్లా కేంద్రానికి సమీపంలోని అటవీ మార్గాల్లో వాహనదారులు, పర్యాటకుల వద్ద ఆహారం కోసం అవి ఎదురుచూస్తున్న దృశ్యాలు కనిపిస్తున్నాయి. మూగజీవాల రక్షణకు చర్యలు తీసుకోవాలని జంతు ప్రేమికులు కోరుతున్నారు.
KNR :గంగాధర మండలం ఉప్పరమల్యాల గ్రామ పంచాయితీలో గురువారం రైతులకు ఫార్మర్ రిజిస్ట్రీ రైతు గుర్తింపు కార్డు గురించి వ్యవసాయ అధికారులు రైతులకు అవగాహన కలిపించారు. వ్యవసాయ భూమి కలిగిన ప్రతి రైతు ఫార్మర్ రిజిస్ట్రీని ఫిబ్రవరి 28 వరకు నమోదు చేసుకోవాలని రైతులకు వ్యవసాయ అధికారులు సూచించారు. ఈ కార్యక్రమంలో AEO వెంకట్, సర్పంచ్ ముద్దం నగేష్, రైతులు పాల్గొన్నారు.
MDCL: మేడిపల్లిలోని విష్ణుపురి కాలనీ పార్క్ నిరుపయోగంగా తయారైంది. పార్క్లో చిన్న పిల్లలు ఆడుకునే పరికరాలు విరిగిపోయి శిథిలావస్థకు చేరుకున్నాయి. పార్క్లో చెట్లకు నీరు లేక ఎండిపోయి, పార్క్ పరిసరాలు చెత్త చెదారంతో నిండిపోయి ఇబ్బందిగా తయారయ్యాయి. పార్క్ దుస్థితిని అధికారులు, పాలకులు పట్టించుకుని ప్రజలకు అందుబాటులోకి తీసుకురావాలని ప్రజలు కోరుతున్నారు.
SRD: సంగారెడ్డి జిల్లాలోని మైనార్టీ గురుకుల పాఠశాలలో 5వ తరగతి ప్రవేశం కోసం ఈ నెల 28వ తేదీ వరకు దరఖాస్తు చేసుకోవాలని జిల్లా కోఆర్డినేటర్ బహుమతి శుక్రవారం తెలిపారు. 4వ తరగతి చదువుతున్న విద్యార్థులు నేరుగా మైనార్టీ గురుకుల పాఠశాలలో దరఖాస్తులు చేసుకోవాలని చెప్పారు. 60 సీట్లు మైనార్టీలకు, 20 సీటు నాన్ మైనార్టీలకు కేటాయించినట్లు పేర్కొన్నారు.
SRPT: మునగాల మండలం గణపవరం గ్రామంలో గురువారం రాత్రి జరిగిన రోడ్డు ప్రారంభోత్సవ కార్యక్రమంలో మంత్రి ఉత్తమ్ కుమార్ రెడ్డి, ఎమ్మెల్యే పద్మావతి రెడ్డి పాల్గొన్నారు. ఈ కార్యక్రమానికి హాజరైన పలువురు నాయకులు వేదికపై కూర్చోగా.. కోదాడ ఆర్డివో సూర్యనారాయణకు మాత్రం కుర్చీ లేక వారి వెనక నిలబడాల్సి వచ్చింది. నాయకుల తీరుపై రెవెన్యూ అధికారులు నిరసన వ్యక్తం చేశారు.
NRPT: రోడ్డు ప్రమాదాల నివారణే లక్ష్యంగా మక్తల్లో ‘అరైవ్-అలైవ్’ రెండో విడత అవగాహన కార్యక్రమం నిర్వహించారు. ఎస్ఐ భాగ్యలక్ష్మి రెడ్డి ఆధ్వర్యంలో సుమారు 80 మంది ఆటో టాక్సీ డ్రైవర్లకు ఉచిత కంటి వైద్య పరీక్షలు చేశారు. డ్రైవర్లు ఆరోగ్యంపై ముఖ్యంగా కంటి చూపుపై శ్రద్ధ వహిస్తేనే ప్రమాదాలు తగ్గుతాయని ఎస్ఐ సూచించారు. భద్రతా నియమాలను కచ్చితంగా పాటించాలని ఆమె కోరారు.
BHNG: మోత్కూరు మండలంలోని బుజిలాపురం గ్రామ సమీప ప్రధాన రహదారిపై శుక్రవారం ఉదయం భారీ కొండచిలువ ప్రత్యక్షమై కలకలం రేపింది. సుమారు 20 కిలోల బరువున్న ఈ భారీ సర్పం రోడ్డుపై వెళ్తుండగా వాహనదారులు, స్థానికులు గమనించి భయాందోళనకు గురయ్యారు. ఈ సమాచారం అందుకున్న అధికారులు ఘటనా స్థలానికి చేరుకుని పరిస్థితిని సమీక్షించారు.
