jharkhand train accident : జార్ఖండ్‌లో జరిగిన రైలు ప్రమాదంలో 12 మంది వరకు మృతి చెందినట్లు గత రాత్రి వార్తలు వెలువడ్డాయి. అయితే ఈ ఘటనలో ఇద్దరు మృతి చెందారని రైల్వే అధికారులు వెల్లడించారు. బుధవారం సాయంత్రం జార్ఖండ్‌(jharkhand)లోని జంతారా జిల్లా కళా ఝారియా రైల్వే స్టేషన్‌ వద్దకు రైలు వస్తుండగా ఈ ప్రమాదం జరిగింది. కొందరు వ్యక్తులు రైలు పట్టాలపై నిలబడి ఉన్న సమయంలో వేగంగా వచ్చిన ఎక్స్‌ప్రెస్‌ రైలు వారిని ఢీకొట్టింది. దీంతో ఇద్దరు అక్కడికక్కడే ప్రాణాలు విడిచినట్లు తెలుస్తోంది.
చదవండి : భోజనాలతో ప్రారంభమైన అనంత్‌ అంబానీ ప్రీ వెడ్డింగ్‌ వేడుకలు
అసాన్సోల్‌ – ఝాఝా మధ్య నడిచే ఎక్స్‌ప్రెస్‌ రైలు(train) ఢీ కొట్టడంతో ఈ ప్రమాదం జరిగినట్లు రైల్వే అధికారులు వెల్లడించారు. కాలాజహరియా రైల్వే క్రాసింగ్‌ వద్ద ఆగి ఉన్న ఓ రైలు నుంచి కొందరు ప్రయాణికులు కిందికి దిగి పట్టాలపై నిలబడ్డారని తెలుస్తోంది. అప్పుడే మరో రైలు పట్టాలపై పరుగులు తీయడంతో ఈ ప్రమాదం జరిగిందని అధికారులు వెల్లడించారు.
చదవండి : ఈ లక్షణాలు కనిపిస్తే మీ ఫోన్‌ హ్యాకైనట్లే!
పోలీసులు, వైద్య బృందాలు వెను వెంటనే ఘటనా స్థలానికి చేరుకున్నారు. క్షతగాత్రులను దగ్గరలోని ఆసుపత్రికి తరలించారు. పలువురు క్షతగాత్రులు ప్రస్తుతం ఆసుపత్రిలో చికిత్స పొందుతున్నారు. మెరుగైన చికిత్స కోసం కొందరు క్షతగాత్రులను దగ్గరలో ఉన్న పెద్ద ఆసుపత్రులకు పంపించినట్లు తెలుస్తోంది. అయితే ఈ ఘటనలో మృతుల సంఖ్యపై భిన్న వార్తలు వెలువడుతుండటం గమనార్హం.
