బుల్లితెరపై దూసుకుపోతున్న సుడిగాలి సుధీర్.. ఇప్పుడు హీరోగాను దుమ్ముదులిపేశాడు. ‘సాఫ్ట్‌వేర్ సుధీర్’, ‘త్రీ మంకీస్’, ‘వాంటెడ్ పండుగాడ్’ సినిమాలతో పర్వాలేదనిపించిన సుధీర్.. రీసెంట్‌గా వచ్చిన గాలోడు మూవీతో బ్లాక్ బస్టర్ అందుకున్నాడు. నవంబర్ 18న విడుదలైన ‘గాలోడు’ సినిమాలో సుధీర్ డ్యాన్సులు, ఫైట్లు ఇరగదీశాడని అంటున్నారు. అందుకే ‘గాలోడు’కు భారీ వసూళ్లు వచ్చాయి. పది రోజుల్లోనే ఈ సినిమా సుమారు 8 కోట్ల గ్రాస్ కలెక్ట్ చేసినట్టు ట్రేడ్ టాక్. దాంతో నిర్మాతలకు కోటిన్నరకు పైగా లాభం వచ్చినట్లు తెలుస్తోంది. అయితే ఇప్పటికీ థియేటర్లో సక్సెస్ ఫుల్‌గా రన్ అవుతోంది ‘గాలోడు’ మూవీ. పోయిన వారం అల్లరి నరేష్ ‘ఇట్లు మారేడుమిల్లి ప్రజానీకం’తో పాటు, ‘తోడేలు’, లవ్ టుడే వంటి డబ్బింగ్ సినిమాలు కూడా రిలీజ్ అయ్యాయి. అయినా కూడా సుధీర్ సినిమాకే మంచి ఆక్యుపెన్సీ ఉన్నట్టు తెలుస్తోంది. ముఖ్యంగా బి, సి సెంటర్లలో ‘గాలోడు’కు మంచి ఆదరణ లభిస్తోందని అంటున్నారు. దాంతో పోయిన ఆదివారం కొన్ని ఏరియాల్లో నరేష్ సినిమాతో పాటు తోడేలు సినిమాను తీసేసి మరీ.. ఆ థియేటర్లు ‘గాలోడు’కు ఇచ్చారట. ఈ లెక్కన సుధీర్ క్రేజ్ ఎలా ఉందో అర్థం చేసుకోవచ్చు. అయితే మాస్ ఫాలోయింగ్ ఉండడం వల్లే సుధీర్ సినిమాకు ఇంత మంచి రెస్పాన్స్ వస్తోందని చెప్పొచ్చు. ప్రస్తుతం సుధీర్ గాలోడు సక్సెస్‌ను ఫుల్లుగా ఎంజాయ్ చేస్తున్నాడు. దీని తర్వాత ‘కాలింగ్ సహస్ర’ అనే సినిమాలో నటిస్తున్నాడు. ఏదేమైనా సుధీర్‌కి మంచి మాస్ ఫాలోయింగ్ ఉందని నిరూపించింది ‘గాలోడు’ మూవీ.
