stampede in waltair veerayya success meet in hanumakonda
మెగాస్టార్ చిరంజీవి నటించిన వాల్తేరు వీరయ్య మూవీ సంక్రాంతికి విడుదలై బాక్సాఫీసు వద్ద సూపర్ హిట్ టాక్ తెచ్చుకున్న విషయం తెలిసిందే. ఈ సందర్భంగా మూవీ యూనిట్ తెలంగాణలోని హనుమకొండలో సక్సెస్ మీట్ ను ఇవాళ ఏర్పాటు చేసింది. ఈ సక్సెస్ మీట్ కు భారీగా మెగా అభిమానులు తరలివచ్చారు. ఈనేపథ్యంలో గేట్ వద్ద తొక్కిసలాట చోటు చేసుకుంది. ఈ ఘటనలో పలువురు మెగా అభిమానులకు గాయాలయ్యాయి.
ఒక్కసారిగా అభిమానులంతా ముందుకు తోసుకొని గేటు వద్దకు రావడంతో తొక్కిసలాట జరిగింది. పోలీసులు అభిమానులు అడ్డుకునేందుకు ప్రయత్నించగా.. అభిమానులు ఒక్కసారిగా ముందుకు తోయడంతో తొక్కిసలాట జరిగినట్టు తెలుస్తోంది. వీఐపీ పాస్ ఉన్నవాళ్లు, పాస్ లేనివాళ్లు, ఫ్యామిలీతో వచ్చినవాళ్లు అందరినీ ఒకే గేటు నుంచి లోపలికి పంపించడం వల్ల తొక్కిసలాట జరగడంతో పలువురు మహిళలు, చిన్నారులు గాయపడ్డారు. గాయపడిన వారికి వెంటనే ప్రథమ చికిత్స చేసి ఆసుపత్రికి తరలించినట్టు తెలుస్తోంది. సక్సెస్ మీట్ ను హనుమకొండలోని ఆర్ట్స్ కాలేజీ గ్రౌండ్స్ లో ఏర్పాటు చేశారు.
