త్రివిక్రమ్ దర్శకత్వంలో తెరకెక్కిన అతడు సినిమాలో.. పొలం కోసం ఓపెన్ ప్లేస్‌లో నాయుడుతో జరిగే ఫైట్ ఎంత హైలెట్‌గా నిలిచిందో అందరికీ తెలిసిందే. అలాగే ఖలేజా సినిమాలో కూడా ఇలాంటి ఓపెన్ ఫైట్ ఒకటుంది. ఇక అరవింద సమేతలో ఎన్టీఆర్‌తో సినిమా స్టార్టింగ్‌లోనే గూస్ బంప్స్ తెప్పించాడు త్రివిక్రమ్. దాంతో ముచ్చటగా మూడోసారి మహేష్ బాబు, త్రివిక్రమ్ కాంబోలో రాబోతున్న సినిమాలో.. అంతకుమించి అనేలా హై ఓల్టేజ్ యాక్షన్ సీక్వెన్స్ ప్లాన్ చేస్తున్నారట. సెప్టెంబర్ 8 నుండి SSMB28 సెట్స్ పైకి వెళ్లనుందని తెలుస్తోంది. ఫస్ట్ షెడ్యూల్‌ను దాదాపు నెల రోజుల పాటు చిత్రీక‌రించ‌బోతున్నార‌ట. అది కూడా భారీ యాక్షన్ సీక్వెన్స్‌తో స్టార్ట్ చేయబోతున్నారట. ఈ ఫైట్ రోడ్ల మీద ఉంటుందని.. అందుకే రామోజీ ఫిలిం సిటీలో ఫస్ట్ షెడ్యూల్ ప్లాన్ చేసినట్టు టాక్.
ఈ షెడ్యూల్‌లో హీరోయిన్‌ పూజా హెగ్డే ఉండదని తెలుస్తోంది. అయితే రెండో షెడ్యూల్ నుంచి పూజా బేబి షూటింగ్‌లో పాల్గొంటుందని సమాచారం. అయితే ముందు నుంచి ఈ సినిమా హై ఓల్టేజ్ యాక్షన్ ఎంటర్టైనర్‌గా రాబోతోందని వినిపిస్తోంది. ఇక ఇప్పుడు మొదట్లోనే యాక్షన్ ఎపిసోడ్‌తో స్టార్డ్ చేయడంతో.. అంచనాలు పెంచేసుకుంటున్నారు మహేష్ అభిమానులు. ఇక ఈ సినిమాను వచ్చే ఏడాది ఏప్రిల్ 28న రిలీజ్ చేసేందుకు సన్నాహాలు చేస్తున్నారు. దాంతో ఎస్ఎస్ఎంబీ28కి కేవలం ఎనిమిది నెలల సమయం మాత్రమే ఉంది. ఈ లోపు షూటింగ్ పూర్తి కావాలి.. పోస్ట్ ప్రొడక్షన్ పనులు పూర్తవ్వాలి. కాబట్టి త్రివిక్రమ్ ఈ సినిమాను పరుగులు పెట్టించడం పక్కా అని చెప్పొచ్చు. ఇక సెన్సేషనల్ మ్యూజిక్ డైరెక్టర్ తమన్ సంగీతం అందిస్తున్న ఈ సినిమాను.. హారికా హాసిని క్రియేషన్స్ బ్యానర్ పై భారీ బడ్జెట్‌తో తెరకెక్కిస్తున్నారు.
