కన్నడ ఇండస్ట్రీ నుంచి ఇప్పుడు పలు భారీ ప్రాజెక్ట్స్ వస్తున్నాయి. ఇప్పటికే కెజియఫ్ సంచలనం సృష్టించిన సంగతి తెలిసిందే. ప్రపంచ వ్యాప్తంగా దాదాపు 1200 కోట్లకు పైగా వసూళ్లను రాబట్టి రికార్డు క్రియేట్ చేసింది కెజియఫ్ చాప్టర్ 2. దాంతో ఈ సినిమాను నిర్మించిన హోంబలే ఫిల్మ్స్‌కు దేశవ్యాప్తంగా మంచి పేరొచ్చింది. ప్రస్తుతం ప్రభాస్-ప్రశాంత్ నీల్‌తో ‘సలార్’ సినిమా తెరకెక్కిస్తోంది హోంబలే సంస్థ.
ఇక ఇప్పుడు ఈ సంస్థ నుంచి వచ్చిన ‘కాంతార’ అనే మరో సినిమా.. బాక్సాఫీస్ వద్ద దుమ్ముదులిపేస్తోంది. రిషబ్‌శెట్టి హీరోగా నటించి, దర్శకత్వం వహించిన కాంతార.. సెప్టెంబర్‌ 30వ తేదీన రిలీజైంది. ఇప్పటికే అక్కడ 70 కోట్లకు పైగా వసూలు సాధించి.. 100 కోట్ల దిశగా దూసుకుపోతోంది కాంతార. దాంతో కన్నడలో KGF 2 తర్వాత అత్యధిక వసూళ్లు సాధించిన చిత్రంగా ‘కాంతార’ నిలిచిందని అంటున్నారు. అందుకే కెజీయఫ్ క్రేజ్‌తో మిగతా భాషల్లోను కాంతార రిలీజ్ అయింది.
తెలుగులో ఈ చిత్రాన్ని ప్రముఖ నిర్మాత అల్లు అరవింద్‌.. అక్టోబర్ 15న ఆడియెన్స్ ముందు తీసుకొస్తున్నారు. ఇప్పటికే ప్రభాస్ ఈ సినిమాను చూసి చాలా బావుందని మెచ్చుకున్నట్లు తెలుస్తోంది. దాంతో తెలుగులోను ఈ సినిమాకు మంచి బజ్ ఏర్పడింది. పైగా ఈ వారం తెలుగులో అన్నీ చిన్న సినిమాలే రిలీజ్ అయ్యాయి. అందుకే ఇప్పుడు అందరి దృష్టి కాంతార పైనే ఉంది. మరి తెలుగులో ఈ సినిమా ఎలాంటి రిజల్ట్ అందుకుంటుందో చూడాలి.
ఇది కూడా చూడండి: శేఖర్ కమ్ముల నెక్ట్స్ హీరోయిన్ ఆమెనా!?
