ప్రస్తుతం ఉన్న టాలీవుడ్ యంగ్ హీరోల్లో అడివి శేష్ రూటే సపరేటు. కెరీర్ స్టార్టింగ్ నుంచి వైవిధ్యంగా.. వరుస విజయాలతో దూసుకుపోతున్నాడు. క్షణంతో మొదలైన అడివిశేష్ బాక్సాఫీస్ హంట్.. ఇప్పుడు పాన్ ఇండియా స్థాయికి చేరకుంది. ఈ ఏడాది మేజర్ సినిమాతో బ్లాక్ బస్టర్ కొట్టాడు శేష్. అలాగే నాని నిర్మాతగా శైలేష్ కొలను దర్శకత్వంలో తెరకెక్కిన హిట్ ఫ్రాంచైజ్ హిట్ 2తో మరో సాలిడ్ హిట్ అందుకున్నాడు. ఇక ఈ సినిమా తర్వాత మరో బ్లాక్ బస్టర్ ఇచ్చేందుకు రెడీ అవుతున్నాడు. నాలుగేళ్ల క్రితం శేష్ నుంచి వచ్చిన ‘గూఢచారి’ బ్లాక్ బస్టర్‌గా నిలిచిన సంగతి తెలిసిదే. అప్పుడే ఆ సినిమాకు సీక్వెల్ ఉంటుందని ప్రకటించారు. ఇక ఇప్పుడు ఈ హిట్ సీక్వెల్‌కు రంగం సిద్దమైంది. ఈ ప్రాజెక్ట్‌ను ‘జీ2’గా అనౌన్స్ చేశారు. పాన్ ఇండియా రేంజ్‌లో భారీ స్థాయిలో ఈ ప్రాజెక్ట్ రాబోతోంది. అందుకోసం ఏకంగా మూడు నిర్మాణ సంస్థలు రంగంలోకి దిగాయి. పీపుల్ మీడియా ఫ్యాక్టరీ, అభిషేక్ అగర్వాల్ ఆర్ట్స్, ఏకే ఎంటర్టైన్మెంట్స్ సంస్థలు సంయుక్తంగా భారీ బడ్జెట్‌తో ఈ ప్రాజెక్ట్‌ను నిర్మిస్తున్నాయి. అయితే ఈ సినిమాకు డైరెక్టర్ మారిపోయాడు. గూఢచారి డైరెక్టర్ శశి కిరన్ తిక్కా ఈ ప్రాజెక్ట్ నుంచి తప్పుకున్నాడు. ‘మేజర్’ చిత్రానికి ఎడిటర్‌గా పనిచేసిన వినయ్ కుమార్ సిరిగినీడి ఈ సినిమాతో దర్శకుడిగా పరిచయం అవుతున్నాడు. ఈ సినిమా ఆల్ ఇండియా అనౌన్స్మెంట్‌ను జనవరి 9న గ్రాండ్‌గా ప్లాన్ చేస్తున్నారు. ఆ రోజే ఈ సినిమాలోని మిగతా నటీ నటులు, హీరోయిన్ విషయంలో క్లారిటీ రానుంది.
