CTR: వేసవి దృష్ట్యా కనీసం 1,800 ట్రాన్స్ఫార్మర్లను నిల్వ ఉంచాలని చిత్తూరు ట్రాన్స్కో ఎస్ఈ ఇస్మాయిల్ అహ్మద్ అధికారులను ఆదేశించారు. ప్రస్తుతం నెలకు 400కిపైగా ట్రాన్స్ఫార్మర్లు మరమ్మతుకు వస్తుండగా, ఏప్రిల్లో ఈ సంఖ్య రెండింతలు పెరిగే అవకాశం ఉందన్నారు.
కోనసీమ: ఆత్రేయపురం మండలం వాడపల్లి శ్రీ వెంకటేశ్వర స్వామివారి ఆలయానికి తణుకు వాస్తవ్యులు పుణ్యమూర్తుల రామచంద్ర స్వామి కుటుంబసభ్యులు రూ. 60 లక్షలు విలువ చేసే 350 గ్రాముల బంగారంతో చేసిన మకర తోరణాన్ని శుక్రవారం సమర్పించారు. దాత కుటుంబ సభ్యులు ఈ మకర తోరణాన్ని ఆలయ డిప్యూటీ కమిషనర్ చక్రధర్ రావుకు అందజేశారు. ఆయన వారిని సత్కరించి స్వామివారి చిత్రపటాన్ని అందజేశారు.
తిరుపతి రూరల్ మండలం గాంధీపురం పంచాయతీ పరిధిలో నూతనంగా నిర్మించిన శ్రీకామాక్షి సమేత అగస్తీశ్వర స్వామి ఆలయంలో మహా కుంభాభిషేకం, నూతన విగ్రహ ప్రతిష్ఠాపన కార్యక్రమాలు ఘనంగా నిర్వహించారు. ఈ కార్యక్రమానికి వైసీపీ నేత చెవిరెడ్డి హర్షిత్ రెడ్డి హాజరై స్వామివారిని దర్శించుకోగా, ఆయనతో పాటు తిరుపతి రూరల్ ఎంపీపీ విడుదల మాధవ రెడ్డి పాల్గొన్నారు.
అన్నమయ్య: రైల్వే కోడూరులో ఎమ్మెల్యే అరవ శ్రీధర్పై ఆరోపణలు చేసిన మహిళా ఉద్యోగి హర్షవీణ ఇవాళ స్థానిక కోర్టుకు హాజరుకానున్నారు. ఎమ్మెల్యే తల్లి ప్రమీలమ్మ ఇచ్చిన ఫిర్యాదుతో నమోదైన కేసులో హైకోర్టు మార్చి 2న హర్షవీణకు షరతులతో కూడిన బెయిల్ మంజూరు చేసింది. హైకోర్టు ఆదేశాల మేరకు బెయిల్ షూరిటీలు స్థానిక కోర్టులో దాఖలు చేయనున్నారు.
GNTR: వ్యవసాయంతో గ్రామీణ అభివృద్ధిలో మార్పు అనే అంశంపై రైతులకు వెబినార్ సందేశం, సమావేశం శుక్రవారం ఫిరంగిపురం–1 రైతు సేవా కేంద్రంలో నిర్వహించారు. ఈ కార్యక్రమంలో సహాయ వ్యవసాయ సంచాలకులు ఎన్. మోహన్రావు మాట్లాడుతూ.. కేంద్ర ప్రభుత్వం రైతుల అభివృద్ధి కోసం అమలు చేస్తున్న వివిధ పథకాల గురించి వివరించారు.
PPM: రాష్ట్ర సమాచార పౌర సంబంధాల శాఖ రూపొందించిన ‘స్వర్ణాంధ్ర@2047’ క్యాలెండర్లను జిల్లా కలెక్టర్ డా. ఎన్.ప్రభాకర రెడ్డి కలెక్టర్ కార్యాలయ సమావేశ మందిరంలో ఆవిష్కరించారు. ఈ సందర్భంగా ఆయన మాట్లాడుతూ.. ప్రభుత్వ లక్ష్యాల సాధనలో జిల్లా అధికారుల చొరవ, సహకారంతో జిల్లా ముందంజలో ఉందని కితాబిచ్చారు. ఈ కార్యక్రమంలో జేసీ, ఇతర అధికారులు పాల్గొన్నారు.
W.G: పోడూరు మండలం చింతలగరువు స్కూల్లో ఇవాళ HM కొల్లాబత్తుల సూర్య కుమార్ అధ్యక్షతన జాతీయ దంత వైద్యుల దినోత్సవం జరిపారు. MIHP ఎం. అనిత మాట్లాడుతూ.. మన దంతాలు ఆరోగ్యంగా ఉంటేనే మనం ఆరోగ్యంగా ఉంటాం అన్నారు. దంతాల పట్ల విద్యార్థులు తీసికోవలసిన జాగ్రత్తలు గురించి వివరించారు. ANM వి.మాలిని, హెల్త్ అసిస్టెంట్ R.రాజేష్, ఆశా వర్కర్ M. నిర్మలాకుమారి పాల్గొన్నారు.
NDL: బండి ఆత్మకూరు మండలం ఈర్నపాడు గ్రామంలో ఇవాళ ఎంపీడీవో గాయత్రి పర్యటించారు. ఇంటి పన్ను, కులాయి పన్ను సక్రమంగా చెల్లించి గ్రామ అభివృద్ధికి సహకరించాలని ప్రజలకు సూచించారు. పారిశుద్ధ్య పనులు సరిగా జరగడం లేదని, దోమల బెడద అధికమైందని గ్రామస్తులు ఆమె దృష్టికి తెచ్చారు. సమస్యల పరిష్కారానికి చర్యలు తీసుకోవాలని అధికారులను ఆదేశించారు.
కృష్ణా: 15వ ఆర్థిక సంఘం నిధులతో సీసీ రోడ్ల నిర్మాణం చేపట్టినట్లు సర్పంచ్ పైడిపాముల కృష్ణకుమారి తెలిపారు. శుక్రవారం చల్లపల్లి అశోక్ నగరులో గ్రామ పంచాయతీ 15వ ఆర్థిక సంఘం నిధులు రూ. 4లక్షలతో నూతన సీసీ రోడ్డు నిర్మాణం పనులు చేపట్టారు. సర్పంచ్ పూజలు చేసి పనులు ప్రారంభించారు. కార్యక్రమంలో పంచాయతీ ఈఓ పీవీ మాధవేంద్రరావు, వార్డ్ సభ్యులు మీర్ రిజ్వాన్ పాల్గొన్నారు.
అన్నమయ్య: మదనపల్లె మార్కెట్లో శుక్రవారం టమాటా ధరలు భారీగా పడిపోయాయి. ఇవాళ మార్కెట్కు సుమారు 70 మెట్రిక్ టన్నుల టమాటాలను రైతులు తీసుకొచ్చారు. వ్యాపారులు మొదటి రకం 10 కిలోల బాక్స్ను రూ.110కు, రెండో రకం బాక్స్ను రూ. 90కు కొనుగోలు చేశారు. పంట దిగుబడి బాగున్నప్పటికీ గిట్టుబాటు ధర లేకపోవడంతో రైతులు తీవ్ర ఆందోళన వ్యక్తం చేస్తున్నారు.
KRNL: ఆదోనిలోని జాతీయ వ్యవసాయ మార్కెట్ యార్డుకు ఈ ఏడాది రికార్డు స్థాయిలో ఆదాయం వచ్చిందని శుక్రవారం యార్డు కార్యదర్శి గోవిందు తెలిపారు. 2025-26 సంవత్సరానికి ప్రభుత్వం రూ.18 కోట్ల ఆదాయ లక్ష్యం నిర్దేశించగా, ఇప్పటికే రూ.18.40 కోట్లు వసూలయ్యాయని చెప్పారు. రైతులకు పంటలు బాగా దిగుబడి రావడంతో యార్డులో క్రయవిక్రయాలు ఎక్కువగా జరిగాయని తెలిపారు.
కడప: నగరపాలక సంస్థ కమిషనర్ రాకేష్ చంద్ర నగరంలోని 6,7,8వ డివిజన్లలో జరుగుతున్న పారిశుద్ధ్య పనులను ఇవాళ పరిశీలించారు. కార్మికుల మస్టర్ అటెండెన్స్ తనిఖీ చేసి అధికారులు సమయానికి పనులు చేపట్టి నగర పరిశుభ్రతను మెరుగుపరచాలని ఆదేశించారు. జడ్పీ కార్యాలయం వద్ద ఉన్న అన్నా క్యాంటీన్ను తనిఖీ చేసి పరిశుభ్రత, ఆహార నాణ్యతపై సూచనలు చేశారు.
NTR: గత ప్రభుత్వ హయాంలో నమోదైన మూడు కేసుల విచారణలో మాజీ మంత్రి దేవినేని ఉమామహేశ్వర రావు ఊరట లభించింది. విజయవాడలోని చీఫ్ మెట్రోపాలిటన్ మెజిస్ట్రేట్ కోర్టులో శుక్రవారం జరిగిన వాదనలు విన్న అనంతరం కేసుల్లో సరైన ఆధారాలు లేవని గుర్తించిన న్యాయస్థానం మూడు కేసులను కొట్టివేస్తూ తీర్పు ఇచ్చింది. దీంతో దేవినేని ఉమాతోపాటు టీడీపీ నేతలకు ఊరట లభించింది.
AKP: ఇంటి పన్నుల వసూళ్లపై పంచాయతీ కార్యదర్శులు ప్రత్యేక దృష్టి పెట్టాలని జడ్పీ సీఈవో నారాయణమూర్తి ఆదేశించారు. ఈ మేరకు పాయకరావుపేట ఎంపీడీవో కార్యాలయంలో పంచాయతీ కార్యదర్శులతో ప్రత్యేక సమావేశం నిర్వహించారు. పన్నుల వసూళ్లలో నిర్లక్ష్యం వహిస్తే చర్యలు తప్పవని హెచ్చరించారు.
CTR: పుంగనూరు నియోజకవర్గం, రొంపిచర్ల మండలంలో శుక్రవారం నియోజకవర్గ టీడీపీ ఇంఛార్జ్ చల్లా బాబు ప్రజా ధర్బార్ నిర్వహించారు. సదుం, సోమల, పులిచెర్ల, రొంపిచర్ల మండలాల నుంచి వచ్చిన అర్జీదారుల నుంచి వినతులు స్వీకరించి, సమస్యల పరిష్కారానికి సంబంధిత అధికారులకు తగిన చర్యలు తీసుకోవాలని చల్లా బాబు సూచించారు. ఈ కార్యక్రమంలో పెద్ద సంఖ్యలో ప్రజలు పాల్గొన్నారు.
