Alleti Maheshwar Reddy: తెలంగాణ బీజేపీ శాస‌న‌స‌భాప‌క్ష నేతగా నిర్మల్‌ ఎమ్మెల్యే ఏలేటి మహేశ్వర్‌రెడ్డిని బీజేపీ చీఫ్‌ కిషన్‌రెడ్డి నియమించారు. డిప్యూటీ ఎల్పీ నేతలుగా పాయల్ శంకర్, వెంకటరమణారెడ్డిని ప్రకటిస్తూ అసెంబ్లీ కార్యదర్శికి లేఖను అందించారు. చీఫ్‌ విప్‌గా పాల్వాయి హరీష్‌బాబు, విప్‌గా సూర్యనారాయణ గుప్తా, సెక్రటరీగా రామారావు పటేల్‌, ట్రెజరర్‌గా రాకేష్‌రెడ్డి పేరును బీజేపీ అధిష్టానం ఖరారు చేశారు.
చదవండి:Revanth Reddy: కేసీఆర్‌పై ఆగ్రహం వ్యక్తం చేసిన సీఎం రేవంత్
ప్రస్తుతం బీజేపీకి అసెంబ్లీలో ఎనిమిది మంది సభ్యులు ఉన్నారు. ఇందులో ఆరుగురు ఎమ్మెల్యేలు ఫస్ట్ టైం అసెంబ్లీలో అడుగుపెట్టిన వారే. రాజాసింగ్ ఒక్కరే హ్యాట్రిక్ ఎమ్మెల్యే కాగా.. మహేశ్వర్ రెడ్డి 2009లో ఓ సారి ఎమ్మెల్యేగా గెలిచారు. బీజేపీ ఫ్లోర్ లీడర్ పదవిని రాజాసింగ్‌తో పాటు పాయల్ శంకర్ కూడా ఆశించారు. అయితే అన్ని సమీకరణాలు పరిశీలించిన తర్వాత బీజేఎల్పీ లీడర్‌గా మహేశ్వర్ రెడ్డిని నియమించేందుకు అధిష్టానం మొగ్గు చూపినట్లు సమాచారం.
చదవండి:Superfitation: ఆరు నెలల వ్యవధిలో మరో బిడ్డకు జన్మనిచ్చిన మహిళ.. వైద్యశాస్త్రంలో అద్భుతం
ఉమ్మడి ఆదిలాబాద్ జిల్లాలో అత్యధికంగా నాలుగు స్థానాల్లో బీజేపీ విజయం సాధించడంతో ఆ జిల్లాకు చెందిన మహేశ్వర్ రెడ్డికే బీజేఎల్పీ నేతగా ఎక్కువ అవకాశాలున్నాయ‌ని గ‌తంలో వార్తలు వ‌చ్చిన విష‌యం విదిత‌మే. మహేశ్వర్ రెడ్డి 2009లో ప్రజారాజ్యం తరపున పోటీ చేసి తొలిసారి ఎమ్మెల్యేగా గెలిచారు. 2023 అసెంబ్లీ ఎన్నిక‌లకు కొన్ని నెలల ముందే మహేశ్వర్ రెడ్డి కాంగ్రెస్ పార్టీని వీడి బీజేపీలో చేరారు.
