ఎస్ఎస్ రాజమౌళి విజువల్ వండర్ ఆర్ఆర్ఆర్. ఈ మూవీలో గల ‘నాటు నాటు’ పాటకు గోల్డెన్ గ్లోబ్ అవార్డు వరించింది. ఆ మూవీ టీమ్‌కు అభినందనలు వెల్లువెత్తుతున్నాయి. అవార్డు రావడంపై ప్రధాని నరేంద్ర మోడీ హర్షం వ్యక్తం చేశారు. ఈ అవార్డు గెలుచుకొని భారతీయులను గర్వపడేలా చేశారని ట్వీట్ చేశారు. మ్యూజిక్ డైరెక్టర్ ఎంఎం కీరవాణి, సింగర్స్ కాలభైరవ, రాహుల్ సిప్లిగంజ్, కొరియోగ్రాఫర్ ప్రేమ్ రక్షిత్, గేయ రచయిత చంద్రబోస్, సినిమా దర్శకుడు రాజమౌళి, నటులు ఎన్టీఆర్, రాంచరణ్ పేర్లను రాసి మరీ విష్ చేశారు. మొత్తం సినిమా టీమ్‌కు ప్రత్యేక అభినందనలు తెలియజేశారు. అవార్డుతో అంతర్జాతీయ స్టేజ్‌పై దేశానికి మంచి పేరు వచ్చిందని కామెంట్ చేశారు. మరిన్ని అవార్డులను గెలుచుకోవాలని ఆకాంక్షించారు.
ఆర్ఆర్ఆర్ మూవీ టీమ్‌కు మాజీ ఉప రాష్ట్రపతి వెంకయ్యనాయుడు కూడా అభినందనలు తెలియజేశారు. ‘నాటు నాటు’ పాటకు గోల్డెన్ గ్లోబ్ అవార్డు రావడం ప్రతీ భారతీయుడికి గర్వకారణం అని అభిప్రాయపడ్డారు. అవార్డు స్వీకరించిన సంగీత దర్శకులు కీరవాణిని వెంకయ్యనాయుడు ప్రత్యేకంగా అభినందించారు. మెగాస్టార్ చిరంజీవ్, ప్రిన్స్ మహేశ్ బాబు ఇతర ప్రముఖులు కూడా ఆర్ఆర్ఆర్ మూవీ టీమ్‌కు అభినందనలు తెలిపారు. జక్కన్న రాజమౌళి ఆర్ఆర్ఆర్ మూవీకి ప్రతిష్టాత్మక అవార్డు వరించడంతో యావత్ తెలుగు సినీ ఫిల్మ్ ఇండస్ట్రీకి చెందిన ప్రముఖులు అభినందనలు తెలియజేస్తున్నారు.
ఇంతలో జక్కన్న మరో ఇంట్రెస్టింగ్ విషయం చెప్పారు. మూవీకి సీక్వెల్ ఉంటుందని చెప్పి అందరినీ సర్ ప్రైజ్ చేశారు. తొలుత సీక్వెల్ లేదని అన్నారు. కానీ సినిమాకు ప్రపంచ వ్యాప్తంగా మంచి గుర్తింపు రావడం.. ఇప్పుడు అవార్డు కూడా దక్కడంతో చేస్తానని చెప్పారు. సీక్వెల్ లైన్ దొరికిందని, స్క్రిప్ట్ తయారు చేస్తున్నానని చెప్పి ఫ్యాన్స్‌ను సంభ్రమాశ్చర్యాల్లో ముంచెత్తారు. సో..ఆర్ఆర్ఆర్-2 కూడా ఉంటుందట. ప్రస్తుతం రాజమౌళి మహేశ్ బాబుతో మూవీ చేస్తోన్న సంగతి తెలిసిందే. మరీ ఆ సినిమా తర్వాత చేస్తారా..? లేదా ముందే చేస్తారనే అంశంపై మాత్రం క్లారిటీ లేదు.
