విష జ్వరాల వల్ల ప్రజలు భయాందోళన చెందుతున్నారు. జ్వరాల బారిన పడి ఇప్పటికే కొందరు మృతిచెందారు. పలుచోట్ల ప్రభుత్వ ఆస్పత్రుల్లో సిబ్బంది ప్రవర్తించే తీరు రోగులను ఆందోళనకు గురిచేస్తోంది. చాలాచోట్ల డెంగ్యూతో ఆస్పత్రికి వెళితే అక్కడున్న సిబ్బంది అమానుషంగా ప్రవర్తిస్తున్నారు. అంబులెన్సులు ఉన్నప్పటికీ వాటిని ఇవ్వకుండా అమానవీయంగా ప్రవర్తిస్తున్న తీరు ప్రభుత్వ ఆస్పత్రుల్లో నెలకొంది. తాజాగా ఇటువంటి ఘటనే ఆంధ్రప్రదేశ్‌లో చోటుచేసుకుంది.
చదవండి: తిరుమలకు వెళ్లేవారికి గుడ్‌న్యూస్..గంటలోనే శ్రీవారి దర్శనం
డెంగ్యూతో ఓ బాలుడు మృతిచెందితే ప్రభుత్వ ఆస్పత్రి సిబ్బంది అంబులెన్స్ లేదన్నారు. దీంతో ఆ బాలుడి మృతదేహాన్ని బైక్‌పై ఇంటికి తీసుకెళ్లారు. ఈ అమానుష ఘటన శ్రీసత్యసాయి జిల్లా, మడకశిర నియోజకవర్గం, అమలాపురంలోని హనుమంతనపల్లి గ్రామంలో చోటుచేసుకుంది. గ్రామానికి చెందిన రాధమ్మ, పాత లింగప్పల 5 ఏళ్ల కొడుకు రుషి డెంగ్యూ ఫీవర్‌తో మృతిచెందాడు.
చదవండి: Bhuvaneshwari : పోలీసుల నోటీసులపై నారా భువనేశ్వరి ఫైర్..అమ్మను కలిస్తే చర్యలా?
మడకశిర ప్రభుత్వ ఆస్పత్రిలో చికిత్స పొందుతూ మంగళవారం రుషి మృతిచెందడంతో బాలుడి మృతదేహాన్ని తరలించేందుకు అంబులెన్స్ ఏర్పాటు చేయాలని తల్లిదండ్రులు కోరారు. అయితే అంబులెన్స్ ఇవ్వడానికి ఆస్పత్రి సిబ్బంది నిరాకరించారు. అంబులెన్స్ లేదని చెప్పడంతో చేసేదేమీ లేక రుషి మృతదేహాన్ని కుటుంబ సభ్యులు బైక్‌పై గ్రామానికి తీసుకెళ్లారు.
చదవండి: Kadapa: 16 కిలోమీటర్ల వరకూ వజ్రాల వేట.. పుష్పగిరి క్షేత్రానికి పోటెత్తిన జనం
బాలుడి మృతదేహాన్ని బైక్‌పై తీసుకెళ్తున్న సమయంలో ఆ తండ్రి గుండెలవిసేలా రోదించిన తీరు అందర్నీ కలచివేసింది. కొడుకు డెడ్‌బాడీని బైక్‌పై తరలిస్తున్నప్పుడు ఆ తల్లిదండ్రులు తల్లడిల్లిపోయారని, తమ కష్టం ఇంకెవ్వరికీ రాకూడదని వారు ఆవేదన వ్యక్తం చేశారు. ఈ ఘటన స్థానికంగా కలకలం రేపింది.
