ఆంధ్రప్రదేశ్ మంత్రి బొత్స సత్యనారాయణకు సర్జరీ జరిగింది. శనివారం ఆయనకు ఓపెన్ హార్ట్ సర్జరీ జరిగినట్లు వైసీపీ వర్గాలు వెల్లడించాయి. నవంబర్ 6వ తేది శృంగవరపు కోటలో వైసీపీ బస్సు యాత్ర నిర్వహించింది. ఆ యాత్రలో మంత్రి బొత్స పాల్గొన్నారు. యాత్ర సమయంలోనే ఆయన అస్వస్థతకు గురయ్యారు. దీంతో ఆయన్ని హుటాహుటిన విశాఖపట్నంలోని ఆస్పత్రికి తరలించి చికిత్స అందించారు.
చదవండి: Diwali: పూజలో ఈ 5 తప్పులు చేస్తే కష్టాలు..లక్ష్మీ దేవి అనుగ్రహం పొందండిలా
ఆస్పత్రిలో బొత్స సత్యనారాయణను పరీక్షించిన వైద్యులు గుండెకు మూడు చోట్ల పూడికలు ఉన్నట్లుగా గుర్తించి వెంటనే ఆపరేషన్ చేయాలని తెలిపారు. దీంతో కుటుంబ సభ్యులు ఆయన్ని హైదరాబాద్ లోని ఓ ప్రైవేటు ఆస్పత్రికి తరలించారు. వైద్యులు ఆయనకు బైపాస్ సర్జరీని పూర్తి చేశారు. ఉదయం 10 గంటల నుంచి మధ్యాహ్నం వరకూ వైద్యుల పర్యవేక్షణలో ఆపరేషన్ జరిగింది.
చదవండి: Joint Committee : ఆరుగురు సభ్యులతో టీడీపీ -జనసేన ఉమ్మడి మేనిఫెస్టో కమిటీ
బొత్సకు ఆపరేషన్ విజయవంతంగా పూర్తయ్యిందని, ప్రస్తుతం ఆయన ఆరోగ్యం నిలకడగా ఉందని వైద్యులు వెల్లడించారు. నెల రోజుల వరకూ పూర్తి విశ్రాంతి తీసుకోవాలని వైద్యులు సూచించారు. ఈ నేపథ్యంలో కుటుంబీకులు ఆయనే వద్దే ఉంటూ బాగోగులు చూసుకుంటున్నారు. విశ్రాంతి వల్ల ఆయన కొన్ని రోజుల పాటు తన విధులకు దూరం అయ్యే అవకాశం ఉంది. అలాగే పలు పార్టీ కార్యక్రమాలకు కూడా ఆయన హాజరయ్యే అవకాశం లేదని తెలుస్తోంది.
