మిచౌంగ్ తుఫాన్ వల్ల ఇప్పటికే అనేక ప్రాంతాలు జలమయం అయ్యాయి. మూడు రోజుల నుంచి ఈ తుఫాన్ తీవ్రత అధికంగా ఉంది. భారీ వర్షాల నేపథ్యంలో ప్రముఖ పుణ్యక్షేత్రం అయిన తిరుమలలో కూడా పలు ప్రాంతాల్లో నీట మునిగాయి. ఈ తరుణంలో టీటీడీ కీలక నిర్ణయం తీసుకుంది. కొన్ని ప్రాంతాల్లో పర్యటించడానికి అనుమతులను రద్దు చేసింది. భారీ వర్షాలకు తిరుమలలోని ఏఎన్సీ కాటేజ్, బీఎస్ఎన్ఎల్ కార్యాలయం వద్ద పెద్ద పెద్ద చెట్లు విరిగిపడ్డాయి.
చదవండి: Murder Cases: దేశంలో 28,522 హత్యలు..రోజూ 78 మర్డర్లు..!
తిరుమలలోని ఏఎన్సీ వద్ద ఉన్న 412 కాటేజ్ వద్ద భారీ వృక్షం నేలకొరిగింది. దీంతో ట్రాఫిక్‌కు అంతరాయం కలిగింది. ఏఎన్సీ కాటేజ్ వైపు వాహనాలన్నీ రావడం లేదు. రాకపోకలు ఎక్కడికక్కడ నిలిచిపోయాయి. అటవీశాఖ అధికారులు ఆ ప్రాంతానికి చేరుకుని నేలకొరిగిన భారీ వృక్షాన్ని తొలగించారు. భక్తులెవరూ ఆ ప్రాంతంలో లేకపోవడంతో పెను ప్రమాదం తప్పింది. తుఫాను వల్ల తిరుమలలోని చాలా ప్రాంతాలు నీట మునిగాయని, పాపవినాశనం వైపు అయితే చాలా చెట్లు కూలిపోయినట్లు తెలుస్తోంది.
చదవండి: Michaung Cyclone : ఏపీలో కుండపోత వర్షాలతో హైటెన్షన్..హెల్ప్‌లైన్ నంబర్లు ప్రకటించిన సర్కార్
ఈ తరుణంలో టీటీడీ కీలక నిర్ణయం తీసుకుంది. పాపవినాశంకు భక్తుల అనుమతిని రద్దు చేసినట్లు ప్రకటించింది. అలాగే తిరుమలలో సందర్శనీయ ప్రదేశాలు అయిన శ్రీపాదాలు, శిలాతోరణం వైపు కూడా భక్తులు వెళ్లడానికి అనుమతిని రద్దు చేసింది. భక్తులు ఈ విషయాన్ని గమనించాలని తిరుమల తిరుపతి దేవస్థానం సూచించింది. భారీ వర్షాల నేపథ్యంలో కపిలతీర్థం వద్ద నీరు ఉధృతంగా ప్రవహిస్తూ ఉంది. ఈ తరుణంలో టీటీడీ ముందస్తు జాగ్రత్తల్లో భాగంగా భక్తులను పుష్కరిణి నీటిలో పుణ్యస్నానాలు ఆచరించే భక్తుల అనుమతిని రద్దు చేసింది. వర్షాలు తగ్గుముఖం పట్టిన తర్వాత ఆ ప్రాంతాల్లోకి భక్తులను అనుమతిస్తామని తెలిపింది.
