బాహుబలి తర్వాత సౌత్ సినిమాల కోసం హిందీ జనాలు ఆసక్తికరంగా ఎదురు చూస్తునే ఉన్నారు. అందుకు తగ్గట్టే.. ప్రభాస్ తర్వాత.. కెజియఫ్ మూవీతో యష్, పుష్ప సినిమాతో అల్లు అర్జున్ బాక్సాఫీస్‌ను షేక్ చేసేశారు. అలాగే కాంతారతో రిషబ్ శెట్టి.. కార్తికేయ 2తో నిఖిల్.. పాన్ ఇండియా గుర్తింపు తెచ్చుకున్నారు. అందుకే సౌత్ నుంచి పాన్ ఇండియా సినిమా వస్తుందంటే చాలు.. బాలీవుడ్‌లో భారీ హైప్ క్రియేట్ అవుతోంది. లైగర్ విషయంలోను విజయ్ దేవరకొండకు బ్రహ్మరథం పట్టారు అక్కడి జనం. కాకపోతే సినిమా పోయింది. లేదంటే రౌడీకి కూడా ఈపాటికే పాన్ ఇండియా కటౌట్ పడిపోయేది. ఇప్పుడు న్యాచురల్ స్టార్ నాని కూడా పాన్ ఇండియా స్టార్ డమ్ అందుకునేందుకు రెడీ అవుతున్నాడు. ఇంకా చాలామంది ఈ లిస్ట్‌లో ఉన్నా.. నెక్స్ట్ మాత్రం నానినే ఉన్నాడు. నాని నటించిన లేటెస్ట్ ఫిల్మ్ ‘దసరా’ మార్చి 30న రిలీజ్ అయ్యేందుకు రెడీ అవుతోంది. ఇప్పటికే ట్రిపుల్ ఆర్, కెజియఫ్, కాంతార లెవల్లో దసరా సినిమా ఉంటుందని చెబుతున్నాడు నాని. దీన్ని బట్టి చూస్తే.. ఈ సినిమా పై నాని ఎంత కాన్ఫిడెంట్‌గా ఉన్నాడో అర్థం చేసుకోవచ్చు. టీజర్, సాంగ్స్‌ కూడా.. దసరా పై భారీ పాన్ ఇండియా బజ్ క్రియేట్ చేసింది. అందుకే నాని పాన్ ఇండియా రేంజ్‌లో ప్రమోషన్స్ స్టార్ట్ చేసేశాడు. తాజాగా ముంబైలో నానికి సాలిడ్ వెల్కమ్ చెప్పారు హిందీ జనాలు. అక్కడ హోళీ వేడుకల్లోను పాల్గొన్నాడు నాని. ఇంటర్వ్యూలు ఇస్తూ.. ఫ్యాన్స్‌తో రచ్చ చేస్తున్నాడు. దీనికి సంబంధించి వీడియోని నాని షేర్ చేయగా.. సోషల్ మీడియాలో వైరల్ గా మారింది. దాదాపు పది రోజులు నార్త్‌లో దసరా ప్రమోషన్స్ చేయనున్నాడట నాని. ఆ తర్వాత ఇక్కడ ఫోకస్ పెట్టనున్నాడు. మరి దసరా మూవీతో నాని పాన్ ఇండియా హిట్ కొడతాడేమో చూడాలి.
