ఏపీ మంత్రి అంబటి రాంబాబు, మెగా బ్రదర్ నాగబాబు మధ్య మరోసారి ట్విట్టర్ ఫైట్ జరిగింది. ఇటీవల శ్రీకాకుళం జిల్లా రణస్థలంలో జనసేన అధినేత పవన్ కళ్యాణ్ తన సుదీర్ఘ ప్రసంగంలో అంబటిపై విమర్శలు గుప్పించారు. ఈ సందర్భంగా ఏమయ్యా సంబరాల రాంబాబు అంటూ ఎద్దేవా చేశారు. జనసేనాని ఈ మాటలు అన్న ఒకటి రెండు రోజులకే మంత్రికి సంబంధించిన డ్యాన్స్ వీడియో హల్‌చల్ అయింది. బోగి సందర్భంగా అంబటి డ్యాన్స్ చేశారు. టీషర్ట్ వేసుకొని, బోగి మంటల చుట్టూ డ్యాన్స్ చేస్తూ తిరిగిన వీడియో నెటిజన్లకు కనువిందు చేసింది.
ఈ వీడియోను అంబటి రాంబాబు కూడా తన ట్విట్టర్ అకౌంట్‌లో పోస్ట్ చేశారు. ఈ వీడియోను నాగబాబు ట్వీట్ చేస్తూ, సంబరాల రాంబాబు గారు.. మీరు డ్యాన్స్ మహత్తరంగా చేశారు.. పోలవరం పూర్తి చేసి డ్యాన్స్ చేసి ఉంటే ఇంకా మహత్తరంగా ఉండేది అంటూ పేర్కొన్నారు. మెగా బ్రదర్ ట్వీట్ పైన అంబటి సోమవారం అదే ట్విట్టర్ వేదికగా స్పందించారు. నువ్వు, మీ తమ్ముడు అన్నట్లు నేను సంబరాల రాంబాబునే, కానీ ముఖానికి రంగు వేయను, ప్యాకేజీ కోసం డ్యాన్స్ చేయనని జనసేనాని ఉద్దేశించి సెటైర్ వేశారు. పోలవరంపై కూడా స్పందించారు. పోలవరం ప్రాజెక్టును మేమే పూర్తి చేస్తామని, చంద్రబాబు, పవన్ బాబు, నాగబాబుతో డ్యాన్స్ చేయిస్తామన్నారు.
