మహిళల ప్రీమియర్ లీగ్ (WPL) మ్యాచ్ అదిరింది. పరుగుల వరద పారింది. దీంతో పాటే వికెట్ల మోత కూడా మోగింది. అయితే ఇదంతా చేసింది ముంబయి ఇండియన్సే (Mumbai indians) మెన్స్ ఐపీఎల్ లో అత్యంత విజయవంతమైన టీమ్ గా ఉన్న ముంబయి. మహిళల లీగ్ ఆరంభ మ్యాచ్ లోనూ తన అధిపత్యాన్ని చూపించింది. శనివారం జరిగిన మ్యాచ్‌లో హర్మన్‌ప్రీత్‌సేన (Harmanpreet).. బెత్‌ మూనీ కెప్టెన్సీలోని గుజరాత్ జెయింట్స్‌ను (Gujarat Giants) చిత్తుగా ఓడించేసింది. మొదట హర్మన్‌ (65;), హేలీ మాథ్యూస్‌ (47), అమేలియా కెర్ (45*) విజృంభించడంతో ముంబయి 5 వికెట్లకు 207 పరుగుల భారీ స్కోరు చేసింది. 208 పరుగుల భారీ లక్ష్యఛేదనలో గుజరాత్ 15.1 ఓవర్లలో కేవలం 64 పరుగులు మాత్రమే చేసి దారుణ పరాజయాన్ని చవిచూసింది. ఆ జట్టులో నలుగురు బ్యాటర్లు డకౌట్ అయ్యారు. దయాలన్ హేమలత చేసిన 29 పరుగులే అత్యధిక వ్యక్తిగత స్కోరు.
చదవండి : రెండు రోజులు వైన్ షాపులు బంద్
ముంబయి ఇండియన్స్ (Mumbai indians) బౌలర్లలో సలికా ఇషాక్ (Salika Ishaq)4 వికెట్లు తీయగా, నాట్ షివర్ 2, అమేలియా కెర్ 2, ఇస్సీ వాంగ్ 1 వికెట్ తీశారు.మొదట టాస్‌ గెలిచి ఫీల్డింగ్‌ ఎంచుకున్న గుజరాత్.. ప్రారంభంలోనే యాస్తిక (1) వికెట్ పడగొట్టి జోష్తో ముందుకెళ్లింది. కానీ ఆ ఆనందం ఎక్కువ సేపు నిలవలేదు. ముందుగా హేలీ మాథ్యూస్‌, (Hayley Matthews) నాట్ సీవర్‌ బాగా ఆడగా.. ఆ తర్వాత హర్మన్‌ ఆకాశమే హద్దుగా చెలరేగి స్కోరు బోర్డును పరుగులు పెట్టించింది. 12 ఓవర్లకే ఆ జట్టు స్కోరు 100కు చేరుకుంది. అందులోనూ హర్మన్‌ కేవలం 22 బంతుల్లోనే హాఫ్ సెంచరీ పూర్తి చేసి ఆకట్టుకుంది. 17వ ఓవర్లో ఆమె పెవిలియన్ చేరేసరికి స్కోరు 166. చివరి ఓవర్లలో అమేలియా, పూజ (15) కూడా బాగానే రాణించడంతో స్కోరు 200 దాటిపోయింది. ఆ తర్వాత భారీ లక్ష్యంతో బరిలోకి దిగిన గుజరాత్.. ముంబయి బౌలర్ల ధాటికి ఇన్నింగ్స్ చేయలేక చతికిల పడింది.
చదవండి : కొత్త పార్టీ వెనుక బిజెపి ఉందా? వారి చేతుల్లోనే..
