కామారెడ్డి పట్టణంలో బీజేపీ ఆధ్వర్యంలో ‘దీన్ దయాళ్ ఉపాధ్యాయ’ శిక్షణ కార్యశాల నిర్వహించనున్నారు. ఈ కార్యక్రమానికి తెలంగాణలోని 12 జిల్లాల నుంచి పార్టీ నాయకులు, కార్యకర్తలు తరలిరానున్నారు. కేంద్ర మంత్రి బండి సంజయ్, రాష్ట్ర అధ్య క్షుడు రామచంద్రరావు హాజరై పార్టీ సిద్ధాంతాలు, సంస్థాగత బలోపేతంపై శ్రేణులకు దిశానిర్దేశం చేయనున్నారు.
SDPT: కేసీఆర్ సీఎంగా ఉన్నప్పుడు ప్రభుత్వ పాఠశాలల్లో చదువుకునే విద్యార్థులు 48 శాతం ఉండే అని ఈ రోజు అది 38 శాతానికి పడిపోయిందని రెండేళ్లలో ప్రభుత్వ పాఠశాలల్లో పదిశాతం మంది పిల్లలు తగ్గారని ఎమ్మెల్యే హరీష్ రావు తెలిపారు. చిన్నకోడూరు మండలం మల్లారం గ్రామంలోని ప్రాథమికోన్నత పాఠశాలలో నిర్వహించిన పాఠశాల వార్షికోత్సవానికి హాజరయ్యారు.
HYD: బంజారాహిల్స్ పరిధి సాగర్ సొసైటీ ఏరియాల్లో అనుమతులకు మించిన అంతస్తుల నిర్మాణం జరుగుతుందని అక్కడ ప్రజలు ఆరోపిస్తూ జీహెచ్ఎంసీ అధికారులకు ఫిర్యాదు చేశారు. పలుమార్లు టౌన్ ప్లానింగ్ అధికారులకు ఫిర్యాదు చేసినప్పటికీ పట్టించుకోవడం లేదని, నిర్మాణాలపై ఎందుకింత నిర్లక్ష్యం వహిస్తున్నారని ప్రశ్నించారు.
JGL: SC వర్గీకరణ కోసం ప్రాణాలర్పించిన మాదిగ అమరవీరుల దినోత్సవం సందర్భంగా బుగ్గారం మండల కేంద్రంలో MRPS, MSP ఆధ్వర్యంలో కొవ్వొత్తులతో నివాళులు అర్పించారు. అమరవీరుల త్యాగాలను స్మరించుకుంటూ SC వర్గీకరణను వెంటనే అమలు చేయాలని ప్రభుత్వాన్ని డిమాండ్ చేశారు. కార్యక్రమంలో MRPS ధర్మపురి నియోజకవర్గ అధ్యక్షుడు చిర్ర లక్ష్మణ్ మాదిగ, మండల అధ్యక్షుడు పాల్గొన్నారు.
MLG: యునెస్కో ప్రపంచ వారసత్వ గుర్తింపు పొందిన రామప్ప ఆలయం తూర్పు ముఖ ద్వారం రోడ్డులో ఏర్పాటు చేసిన సెంట్రల్ లైటింగ్ వ్యవస్థ రాత్రి వేళల్లో పనిచేయకపోవడంతో పర్యాటకులు, స్థానికులు తీవ్ర ఇబ్బందులు పడుతున్నారు. లక్షలు వెచ్చించి అలంకారప్రాయంగా ఏర్పాటు చేసిన దీపాలు చీకటిలో మాత్రమే కనిపిస్తున్నాయి. వెంటనే మరమ్మతులు చేపట్టాలని పర్యాటకులు అధికారులను కోరారు.
WNP: వరంగల్లో జరిగిన తెలంగాణ మెడికల్ కాంట్రాక్ట్ ఎంప్లాయిస్ అండ్ వర్కర్స్ యూనియన్ (AITUC) 4వ రాష్ట్ర మహాసభలో పీ.సురేష్ రెండోసారి రాష్ట్ర కార్యదర్శిగా ఏకగ్రీవంగా ఎన్నికయ్యారు. ఏఐటీయూసీ రాష్ట్ర అధ్యక్షుడు ఎమ్మెల్యే యూసుఫ్, ప్రధాన కార్యదర్శి నరసింహ సమక్షంలో ఈ ఎన్నిక జరిగింది. యూనియన్ బలోపేతానికి సురేష్ కృషి చేస్తారని నేతలు ఆశాభావం వ్యక్తం చేశారు.
ఖమ్మం వెలుగుమట్ల భూదాన్ భూములలో ఇళ్లు కోల్పోయిన పేదలకు ఈ నెల 15లోగా నివాస స్థలంతో పాటు ఇందిరమ్మ ఇళ్లు నిర్మించి ఇస్తామని మంత్రి తుమ్మల నాగేశ్వరరావు ఆదివారం స్పష్టం చేశారు. అంతేకాకుండా పేదల నుంచి డబ్బులు వసూలు చేసిన దళారుల నుంచి ఆ సొమ్ము రికవరీ చేసి బాధితులకు అప్పజెప్పే ప్రక్రియను ప్రభుత్వం చేపట్టిందని తెలిపారు.
MDCL: బాచుపల్లి ఏరియాల్లో రాత్రికి రాత్రి వివిధ కంపెనీలు గాలిలోకి విషపూరిత వ్యర్ధాలు విడుదల చేస్తున్నాయని, కెమికల్ వ్యర్ధాల వాసన భరించలేకపోతున్నట్లు అక్కడ ప్రజల ఆవేదన వ్యక్తం చేస్తున్నారు. అనేకసార్లు పొల్యూషన్ కంట్రోల్ బుడ్డ అధికారులకు కాల్ చేసి ట్రై చేశామని, అయినప్పటికీ స్పందన లేదన్నారు. ప్రభుత్వం కాలుష్యాన్ని కంట్రోల్ చేయాలన్నారు.
JN: జిల్లా కేంద్రంలోని భ్రమరాంబ కన్వెన్షన్ హాల్లో ఆదివారం రాత్రి లయన్స్ క్లబ్ ఇంటర్నేషనల్ జిల్లా 320F, 7వ రీజియన్ చంద్రగిరి సేవా సమ్మేళన కార్యక్రమం నిర్వహించారు. ముఖ్య అతిథిగా వర్ధన్నపేట MLA KR నాగరాజు హాజరై, పద్మశ్రీ గడ్డం సమ్మయ్యను, లయన్స్ సభ్యులను సత్కరించారు. కరోనా సమయంలో లయన్స్ చేసిన సేవలు అనేక ప్రాణాలను కాపాడాయని MLA నాగరాజు కొనియాడారు.
WGL: చంద్రగ్రహణం సందర్భంగా 3వ తేదీన నల్లబెల్లి మండల కేంద్రంలోని శ్రీ రాజరాజేశ్వరి స్వామి దేవాలయం మూసివేస్తున్నట్లు ఆలయ గౌరవ అధ్యక్షుడు గందె శ్రీనివాస్ గుప్తా తెలిపారు. గ్రహణ సమయం ముగిసిన అనంతరం ఆలయాన్ని శుద్ధి కార్యక్రమాలు నిర్వహించి తిరిగి దర్శనార్థం తెరవనున్నట్లు వెల్లడించారు. భక్తులు ఈ విషయాన్ని గమనించి సహకరించాలని కోరారు.
నిజామాబాద్ రూరల్ లోని మల్కాపూర్ తండాలో వాలీబాల్ కారణంగా ఇరు వర్గాల మధ్య ఘర్షణ వాతావరణం నెలకొన్నట్లు రూరల్ SHO శ్రీనివాస్ తెలిపారు. FEB 27న తండాకు చెందిన యువకులు వాలీబాల్ ఆడుతుండగా విక్రమ్ వాలీబాల్ను కొట్టగా అక్కడే ఉన్న బుజ్జి బాయి అనే వృద్ధురాలికి తగిలింది. దీంతో ఇరు వర్గాల మధ్య ఘర్షణ నెలకొంది. ఆదివారం ఇరువర్గాల వారు ఫిర్యాదు చేయడంతో కేసు నమోదు చేశారు.
NLG: చండూరు మండలం కస్తాలకి చెందిన కట్టా చరణ్ తేజ చార్టర్డ్ అకౌంటెన్సీ ఫలితాల్లో సత్తా చాటాడు. ఇటీవల విడుదలైన సీఏ ఫైనల్ పరీక్షల్లో ఉత్తీర్ణత సాధించి తన ప్రతిభను నిరూపించుకున్నాడు. కష్టపడి చదివి ఈ ఘనత సాధించిన చరణ్ను తల్లిదండ్రులు, మిత్రులు అభినందనలతో ముంచెత్తుతున్నారు. భవిష్యత్తులో మరిన్ని ఉన్నత శిఖరాలు అధిరోహించాలని వారు ఆకాంక్షించారు.
BHPL: మండలం గొల్లబుద్ధారం గ్రామంలో ఆదివారం సాయంత్రం CPI మండల కమిటీ ఆధ్వర్యంలో సభ్యత్వ నమోదు కార్యక్రమం చేపట్టారు. ఈ సందర్భంగా జిల్లా కార్యదర్శి రాజ్ కుమార్ మాట్లాడుతూ, అటవీ ప్రాంతంలోని ప్రతి గ్రామంలో సీపీఐ కమిటీలను పటిష్ఠం చేసి పార్టీ బలోపేతం చేయాలని పిలుపునిచ్చారు. ఈ కార్యక్రమంలో CPI పార్టీ నేతలు, గ్రామస్తులు ఉన్నారు.
NLG: జిల్లా కుమ్మెరలో అగ్రవర్ణాల దురహంకారానికి బలైపోయిన రెండు నెలల రజక పసిపాప మృతికి నిరసనగా పజ్జూర్లో కొవ్వొత్తుల ర్యాలీ నిర్వహించారు. పాప ఆత్మకు శాంతి చేకూరాలని, నిందితులను కఠినంగా శిక్షించాలని గ్రామస్థులు డిమాండ్ చేశారు. ఈ కార్యక్రమంలో లింగస్వామి, రవితేజ, శ్రవణ్, సైదులు, శ్రీను తదితరులు పాల్గొన్నారు.
NGKL: కల్వకుర్తి నియోజకవర్గంలోని వెల్దండ మండలం అజిలాపూర్ గ్రామ పరిధిలోని అంతిరెడ్డిపల్లిలో ఆదివారం తాళం వేసిన ఇంట్లో చోరీ జరిగింది. గోరటి అలివేలు అనే మహిళ ఫిబ్రవరి 27న ఇంటికి తాళం వేసి హైదరాబాద్ వెళ్లారు. ఆదివారం తిరిగి వచ్చి చూడగా, ఇంటి తాళం పగులగొట్టి, బీరువాలోని అర్ధ తులం బంగారం, రెండు వెండి మొలతాడులు, రూ. 10 వేల నగదును అపహరించారని తెలిపారు.
