నాటు నాటు సాంగ్‌ ఆస్కార్ నామినేషన్ నిలవడంతో బీజేపీ తెలంగాణ అధ్యక్షుడు బండి సంజయ్‌ సింగర్‌ రాహుల్‌ ను ఘనంగా సన్మానించారు. ఈ సందర్భంగా రాహుల్‌ సిప్లిగంజ్‌కు స్వీట్స్‌ తినిపించి పుష్పగుచ్ఛం అందజేశి శాలువాతో సత్కరించారు. దర్శక ధీరుడు ఎస్‌ఎస్‌ రాజమౌళి తెరకెక్కించిన ఆర్‌ఆర్‌ఆర్‌ చిత్రం అవార్డులు కొల్లగొడుతోంది. తాజాగా ఆ సినిమాలోని నాటు నాటు సాంగ్‌ ఆస్కార్ ఫైనల్స్‌కు నామినేట్‌ అయ్యింది. ఈక్రమంలో ప్రతిష్ఠాత్మక ఆస్కార్ పురస్కారానికి నామినేట్‌ అయిన తొలి తెలుగు సినిమాగా ఆర్‌ఆర్‌ఆర్‌ చరిత్ర సృష్టించింది.
దీంతో పలువురు టాలీవుడ్ ప్రముఖులు చిత్రబృందాన్ని అభినందిస్తున్నారు. తెలుగు సినిమాకు ఇది గర్వకారణమంటూ సినీ, రాజకీయ ప్రముఖులు ప్రశంసలు కురిపిస్తున్నారు. కాగా ఇప్పటికే నాటు నాటు పాటకు గోల్డెన్‌ గ్లోబ్‌ అవార్డు లభించింది. క్రిటిక్స్‌ ఛాయిస్‌ అవార్డుతో పాటు అనేక అవార్డులను సొంతం చేసుకుంది నాటు నాటు పాట. ఆర్‌ఆర్‌ఆర్‌ టీమ్‌కి కంగ్రాట్స్‌ చెప్తూ ప్రముఖుల ట్వీట్లు చేశారు. సోషల్‌ మీడియాలో కురుస్తోన్న ప్రశంసల జల్లులో చిత్ర బృందం తడిసి ముద్దవుతోంది.
