Hemant Soren : జార్ఖండ్‌లోని హేమంత్ సోరెన్ నేతృత్వంలోని సంకీర్ణ ప్రభుత్వం సోమవారం అసెంబ్లీ ప్రత్యేక సమావేశంలో విశ్వాస పరీక్షను నెగ్గింది. ప్రస్తుత అసెంబ్లీలో ఉన్న 76 మంది సభ్యులలో 45 మంది ప్రభుత్వానికి అనుకూలంగా ఓటు వేశారు. అసెంబ్లీ ప్రస్తుత బలం ప్రకారం మెజారిటీకి కనీసం 39 ఓట్లు అవసరం. ఓటింగ్ సందర్భంగా ప్రభుత్వానికి వ్యతిరేకంగా పెద్ద ఎత్తున నినాదాలు చేస్తూ బీజేపీ, ఏజేఎస్‌యూ ఎమ్మెల్యేలు సభను బహిష్కరించారు. సీఎం హేమంత్ సోరెన్ ఉదయం 11.10 గంటలకు విశ్వాస తీర్మానాన్ని ప్రవేశపెట్టారు. దీనిపై చర్చ అనంతరం మధ్యాహ్నం 12.20 గంటలకు ఓటింగ్ జరిగింది. జార్ఖండ్ అసెంబ్లీలో జరిగిన విశ్వాస పరీక్షలో హేమంత్ సోరెన్ విజయం సాధించడం ఇది నాలుగోసారి.
చదవండి:Supreme Court: నెలసరి సెలవులపై సుప్రీంకోర్టు కీలక వ్యాఖ్యలు
ఆదివారం ప్రత్యేక అసెంబ్లీ సమావేశాల నిమిత్తం వ్యూహాలను రెడీ చేసుకోవడానికి అధికార కూటమి, ప్రతిపక్షాలు రెండూ వేర్వేరుగా సమావేశాలు నిర్వహించాయి. జేఎంఎం, కాంగ్రెస్‌, ఆర్జేడీ ఎమ్మెల్యేలు విశ్వాసపరీక్షపై విశ్వాసం వ్యక్తం చేశారు. జేవీఎం(ఎం)టిక్కెట్‌పై 2019 అసెంబ్లీ ఎన్నికల్లో గెలిచిన తర్వాత కాంగ్రెస్‌లో చేరిన ప్రదీప్ యాదవ్, విశ్వాస ఓటును గెలవడానికి తనకు సభలో తగినంత సంఖ్యా బలం ఉందని పేర్కొన్నారు. జేఎంఎం ఎమ్మెల్యే స్టీఫెన్ మరాండీ మాట్లాడుతూ.. కూటమిలోని ఎమ్మెల్యేలందరూ సభలోనే ఉండి బలపరీక్షలో పాల్గొనాలని పార్టీ ఆదేశించింది. మరోవైపు అధికార కూటమికి విశ్వాసపరీక్షలో నెగ్గడం అంత సులువు కాదని బీజేపీ పేర్కొంది.
చదవండి:Prabhas: ప్రభాస్‌కు విలన్‌గా సౌత్ కొరియన్ స్టార్?
కూటమిలో అంతర్గత పోరు ఉందా?
పార్టీ శాసనసభా పక్ష సమావేశం అనంతరం విపక్ష నేత అమర్‌ బౌరీ విలేకరులతో మాట్లాడుతూ.. అధికార కూటమిలో అంతర్గత పోరు సాగుతోందని ఆరోపించారు. సోమవారం జరిగే బలపరీక్షలో పాల్గొనాలని పార్టీ నిర్ణయించినట్లు తెలిపారు. చర్చ జరిగేలా చూడాలని, ప్రతిపక్షాలు మాట్లాడేందుకు అనుమతించాలని ప్రభుత్వాన్ని కోరుతున్నాం. మాజీ ముఖ్యమంత్రి చంపాయ్ సోరెన్ ఇప్పటికే పని చేస్తున్నప్పుడు, కొత్త ప్రభుత్వాన్ని ఏర్పాటు చేయాల్సిన అవసరం ఏమిటో ముఖ్యమంత్రి సభకు చెప్పాలని బిజెపి కోరుతుందని బౌరి అన్నారు.
