ప్రస్తుతం థియేటర్లోకి రాబోతున్న సినిమాల్లో మణిరత్నం డ్రీమ్ ప్రాజెక్ట్ ‘పొన్నియన్ సెల్వన్’ పై భారీ అంచనాలున్నాయి. బాహుబలి తర్వాత సౌత్ నుంచి వస్తున్న అతి పెద్ద సినిమాగా ఇదే అని చెబుతున్నారు. సెప్టెంబర్ 30న ఈ చిత్రం ప్రేక్షకుల ముందుకు రాబోతోంది. దాంతో ఇప్పటికే ప్రమోషన్స్ స్టార్డ్ చేసింది చిత్ర యూనిట్. పాన్ ఇండియా సినిమా కావడంతో.. అతి త్వరలో దేశమంతా చుట్టేందుకు ప్లాన్ చేస్తున్నారు. ఈ నేపథ్యంలో తెలుగులో కూడా గట్టిగానే ప్రమోట్ చేస్తున్నారు. అందుకే గ్రాండ్‌గా ప్రీ రిలీజ్ ఈవెంట్ నిర్వహించబోతున్నారు. తాజాగా అందుకు ముహూర్తం ఫిక్స్ చేశారు.
పొన్నియిన్ సెల్వన్ ప్రీ రిలీజ్ ఈవెంట్‌ను సెప్టెంబరు 23, సాయంత్రం 6 గంటలకు, హైదరాబాద్ జేఆర్సీ కన్వెన్షన్స్‌లో భారీ ఎత్తున నిర్వహించనున్నారు. ఓ పోస్టర్‌ ద్వారా ఈ ఈవెంట్‌ను ప్రకటించారు మేకర్స్. అయితే చీఫ్ గెస్ట్ ఎవరనే విషయంలో మాత్రం క్లారిటీ ఇవ్వలేదు. కానీ టాలీవుడ్ నుంచి బడా స్టార్స్ ఈ ఈవెంట్‌కు అటెండ్ అయ్యే ఛాన్స్ ఉంది. దాంతో పొన్నియన్ సెల్వన్ పై భారీ హైప్ క్రియేట్ అవనుందని చెప్పొచ్చు. ఇక ఈ పీరియాడికల్ యాక్షన్ డ్రామాలో జయం రవి, విక్రమ్, కార్తీ, ఐశ్వర్య రాయ్, త్రిష వంటి వారు కీలక పాత్రల్లో నటించారు. మద్రాస్ టాకీస్ మరియు లైకా ప్రొడక్షన్స్ కలిసి భారీ బడ్జెట్‌తో నిర్మించిన ఈ చిత్రానికి.. ఎఆర్ రెహమాన్ సంగీతం అందించారు. మరి పీఎస్1 బాక్సాఫీస్ దగ్గర ఎలాంటి వండర్స్ క్రియేట్ చేస్తుందో చూడాలి.
