బర్త్ డే పార్టీలో విషాదం చోటుచేసుకుంది. పుట్టినరోజు పార్టీలో అగ్నిప్రమాదం చోటుచేసుకోగా 11 మంది దుర్మరణం చెందారు. ఈ దారుణ ఘటన స్పెయిన్ లోని ముర్సియ నైట్ క్లబ్ (Nightclub Fire)లో ఆదివారం జరిగింది. స్థానికుల సమాచారం మేరకు సహాయక సిబ్బంది ఘటనా స్థలానికి చేరుకుని సహాయక చర్యలు చేపడుతున్నారు. ఈ ఘటనలో మృతుల సంఖ్య మరింత పెరగవచ్చని అధికారులు భావిస్తున్నారు. ట్విట్టర్ వేదికగా పోలీసులు ఈ విషయాన్ని వెల్లడించారు.
చదవండి: Tamil Nadu : లోయలోపడ్డ టూరిస్టు బస్సు.. 8 మంది దుర్మరణం
ఫాండా మిలగ్రోస్‌గా పిలిచే టీట్రే నైట్ క్లబ్‌లో ఈ అగ్ని ప్రమాదం చోటుచేసుకుంది. నైట్ క్లబ్ భవనం పైకప్పు నుంచి పొగ భీకరంగా వ్యాపించింది. శనివారం రాత్రి బర్త్ డే పార్టీ జరగ్గా ఆ వేడుకకు హాజరైన మరికొందరి ఆచూకీ ఇంకా గుర్తించలేదని పోలీసులు వెల్లడించారు. నైట్‌క్ల‌బ్ ఫ‌స్ట్ ఫ్లోర్‌లో అగ్నిప్రమాదం జ‌రిగింద‌ని పోలీసులు గుర్తించి సహాయక చర్యలు చేపట్టారు. ఈ ఘటనలో నలుగురు గాయాలపాలయ్యారు. మరికొందరు పొగను పీల్చడంతో అస్వస్థతకు గురయ్యారని, 40 అగ్నిమాప‌క యంత్రాలు, 12 అత్య‌వ‌స‌ర వాహనాలతో సహాయక చర్యలు చేపట్టినట్లు ముర్సియ మేయ‌ర్ జోస్ బ‌లెస్ట వెల్లడించారు.
