America: అమెరికాలోని కాలిఫోర్నియా-నెవడా సరిహద్దుల్లో హెలికాప్టర్ కుప్పకూలింది. ఈ ఘటనలో నైజీరియాకు చెందిన అతిపెద్ద బ్యాంక్ సీఈవో సహా ఆరుగురు ప్రాణాలు కోల్పోయారు. యాక్సెస్‌ బ్యాంక్ సీఈవో హెర్బర్ట్‌ విగ్వే తన భార్య, కుమారుడు మరికొందరితో కలిసి యూరోకాప్టర్‌ ఈసీ 130లో మోజువా ఎడారిపై ప్రయాణిస్తుండగా శాన్‌ బ్రెనార్డినో కౌంటీ వద్ద శుక్రవారం రాత్రి ఈ ప్రమాదం జరిగింది. దాదాపు 3,000 అడుగుల ఎత్తు నుంచి అది కుప్పకూలడంతో.. అందులో ఉన్నవాళ్లందరూ చనిపోయారు. సమీపంలోని ఐ-15 జాతీయ రహదారిపై ప్రయాణిస్తున్న వారు ప్రమాదాన్ని గమనించి 911కు కాల్‌ చేశారు. ప్రమాదంపై ఎఫ్‌ఏఏ దర్యాప్తు చేపట్టింది.
ఇది కూడా చూడండి: Pet Insurance: పెంపుడు జంతువులకు బీమా!
మృతుల్లో నైజీరియాకు చెందిన ఎన్‌జీఎక్స్‌ గ్రూపు మాజీ ఛైర్మన్‌ అబింబోలా, ఇద్దరు పైలట్లు కూడా ఉన్నారు. ‘ఆఫ్రికా బ్యాంకింగ్‌ రంగానికి ఇది పెద్దషాక్‌’ అని వరల్డ్‌ ట్రేడ్‌ ఆర్గనైజేషన్‌ డైరెక్టర్‌ జనరల్‌ ఎవాలా ఎక్స్‌లో పోస్టు చేశారు. హెర్బర్ట్‌ విగ్వే గతంలో గ్యారెంటీ ట్రస్ట్‌ బ్యాంక్‌లో ఎగ్జిక్యూటివ్‌ డైరెక్టర్‌గా పనిచేశారు. నైజీరియా ‘యాక్సెస్‌ బ్యాంక్’ ఆఫ్రికాలోని పలు దేశాల్లో సేవలు అందిస్తోంది. ఇటీవలే అమెరికాలోని శాన్‌ డియాగో వద్ద ఓ సైనిక హెలికాప్టర్ కూలి ఐదుగురు మెరైన్‌కోర్‌ సిబ్బంది చనిపోయారు. ఆ తర్వాత కొన్ని రోజులకే ఈ ఘటన చోటు చేసుకుంది.
ఇది కూడా చూడండి: Karnataka: ఆసుపత్రిలో రీల్స్‌ చేసిన మెడికోలు.. 38 మంది వైద్య విద్యార్థులు సస్పెండ్
