NLR: ముత్తుకూరు మండలం నేలటూరులోని శ్రీదామోదరం సంజీవయ్య ఏపీజెన్‌కో ప్రాజెక్టులో మూడు యూనిట్ల నుంచి విద్యుదుత్పత్తి జరుగుతున్నట్టు ఆ ప్రాజెక్టు ఇంజినీర్లు ఒక ప్రకటనలో తెలిపారు. ఇందులో భాగంగా 1వ యూనిట్లో 460, 2వ యూనిట్లో 565, 3వ యూనిట్లో 630 మెగావాట్ల విద్యుదుత్పత్తి జరుగుతున్నట్టు పేర్కొన్నారు.
ATP: గుత్తిలో బుధవారం పొట్టి శ్రీరాములు పార్క్‌ను ఆర్యవైశ్య సంఘం జిల్లా అధ్యక్షులు వెంకటేష్, కార్యదర్శి మనోజ్, యువజన సంఘం జిల్లా అధ్యక్షులు శబరి పొట్టి శ్రీరాములు, మాజీ ఎమ్మెల్యే మధుసూదన్ గుప్తా పార్క్‌ను ప్రారంభించారు. ఆర్యవైశ్య సంఘం మండల అధ్యక్షులు మాట్లాడుతూ.. ఈ పార్కును పట్టణ ప్రజలు సద్వినియోగం చేసుకోవాలన్నారు.
NLR: ప్రైవేట్ ట్రావెల్స్ తీరుతో ఉదయగిరి వాసులు ఇబ్బంది పడ్డారు. 30మంది ప్రయాణికులతో రాత్రి హైదరాబాద్ నుంచి ఓ బస్సు ఉదయగిరి బయల్దేరింది. మార్గమధ్యలో నాగార్జునసాగర్ వద్ద రాత్రి 2గంటల సమయంలో పొగలు రావడంతో బస్సును నిలిపివేశారు. మరో వాహనం ఏర్పాటు చేయకుండా బస్ డ్రైవర్ సమీప ప్రాంతంలో మద్యం తాగుతూ తమను పట్టించుకోలేదని ప్రయాణికులు వాపోయారు.
నెల్లూరు దర్గామిట్ట పోలీస్ స్టేషన్ పరిధి ప్రగతి నగర్‌లో ఈ నెల 9న పామూరు ప్రాంతానికి చెందిన కారు డ్రైవర్ వాసు అనే యువకుడిని కిరాతకంగా హత్య చేసి డంపింగ్ యార్డ్‌లో పడేశారు. ఈ కేసు నిందితులను పోలీసులు కస్టడీలోకి తీసుకుని విచారణ చేపట్టారు. కారు డ్రైవర్ వాసు హత్య కేసులో 9మంది నిందితులను కోర్టు అనుమతితో పోలీస్ స్టేషన్‌కు తరలించారు.
VZM: లేబర్ కోడ్ చట్టాలకు వ్యతిరేకంగా మే 20న జరగనున్న దేశవ్యాప్త సమ్మెలో పాల్గొంటామని మున్సిపల్ కార్మికులు చెప్పారు. బొబ్బిలిలోని శ్రీవేణుగోపాలస్వామి ఆలయం వద్ద బుధవారం మున్సిపల్ కార్మికులతో సమావేశమయ్యారు. సార్వత్రిక సమ్మెకు మద్దతు ఇవ్వాలని పారిశుద్ధ్య కార్మికులను సీఐటీయూ జిల్లా అధ్యక్షుడు శంకరరావు కోరారు.
PPM: గుమ్మలక్ష్మీపురం మండలం బద్రగిరి ప్రభుత్వ ఐటీఐ కళాశాలలో ప్రవేశాలకు దరఖాస్తులు కోరుతున్నట్లు ప్రిన్సిపల్ సీహెచ్ సునీల్ కుమార్ బుధవారం తెలిపారు. ఏడాది తొలి విడత ప్రవేశాలకు ఈ నెల 28 నుంచి మే 24 వరకు దరఖాస్తులు చేసుకోవాలన్నారు. ఎలక్ట్రిషియన్ 20, ఫిట్టర్ 20, కంప్యూటర్ 48, వెల్డర్ 20, డ్రెస్ మేకింగ్ 40 సీట్లు చొప్పున భర్తీ చేయనున్నట్లు పేర్కొన్నారు.
KRNL: మద్దికెర మండలంలో రేషన్ కార్డులు ఉన్న లబ్ధిదారులు తప్పనిసరిగా నేటి లోగా ఈ-కేవైసీ చేయించుకోవాలని తహసీల్దార్ హుస్సేన్సా హెబ్ తెలిపారు. మండలంలోని ఆయా గ్రామాల్లో చౌకదుకాణాల్లో ప్రభుత్వం అందించే సబ్సిడీ సరుకులు పొందేందుకు ఈ-కేవైసీ తప్పనిసరి అన్నారు. రేషన్ డీలర్ల వద్ద వేలిము ద్రలు వేయాలని తెలిపారు. లేకుంటే రేషన్ నిలిపివేస్తారని చెప్పారు.
SKLM: సింహాచలం దేవస్థానంలో జరిగిన విషాధకర ఘటనపై టెక్కలి ఎమ్మెల్యే, రాష్ట్ర మంత్రి కింజరాపు అచ్చెన్నాయుడు దిగ్భ్రాంతి వ్యక్తం చేశారు. గోడ కూలడానికి గల కారణాలను అడిగి తెలుసుకున్నారు. ఘటనలో మృతిచెందిన కుటుంబాలను ప్రభుత్వం ఆదుకుంటుందని తెలిపారు. ఘటనపై విశాఖ జిల్లా కలెక్టర్, ఆరోగ్యశాఖ అధికారులతో మాట్లాడి క్షతగాత్రులకు మెరుగైన వైద్య సేవలు అందించాలని కోరారు.
KDP: ప్రొద్దుటూరు రూరల్ పోలీస్ స్టేషన్ పరిధిలోని ఒక సప్లయర్ దుకాణంలో పనిచేస్తున్న వ్యక్తి హోటల్లో పని చేస్తున్న బాలికను మాయమాటలు చెప్పి గర్భవతిని చేశాడు. బాలిక తల్లిదండ్రులు ఫిర్యాదు చేయడంతో రూరల్ పోలీస్ స్టేషన్‌లో ఫోక్సో కేసు నమోదు చేశారు. బాలికను వైద్య పరీక్షల నిమిత్తం జిల్లా ప్రభుత్వ ఆసుపత్రికి పంపగా 6 నెలల గర్భిణిగా వైద్యులు నిర్ధారించినట్లు సమాచారం.
KRNL: కృష్ణగిరి మండలంలోని పెనుమాడ గ్రామ సమీపంలో చిరుత సంచరిస్తున్నట్లు వచ్చిన సమాచారం నేపథ్యంలో అటవీ శాఖ స్పందించారు. మంగళవారం ఫారెస్ట్ అధికారులు కాళిదాసు, రామచంద్రుడు గ్రామస్తులతో కలిసి పరిశీలనకు వెళ్లి, పొలాల్లో కనిపించిన చిరుత అనుమానిత పాదముద్రలను సేకరించారు. అవి నిజమైనవేనా అన్నది నిర్ధారించేందుకు నివేదికను ఉన్నతాధికారులకు పంపనున్నట్లు తెలిపారు.
KDP: పోరుమామిళ్ల పట్టణంలోని మేజర్ పంచాయతీ అభివృద్ధికి ఎంపీ రమేశ్ ఎంపీ ల్యాడ్స్ కింద పంచాయతీకి రూ.30 లక్షల రిలీజ్ చేశారు. ఈ నిధులతో పట్టణ మేజర్ పంచాయతీ సర్పంచ్ ఆధ్వర్యంలో బలిజ కోటలోని వీధులన్నిటికీ నాణ్యమైన సీసీ రోడ్లు వేయించారు. రోడ్లను పరిశీలించేందుకు సెంట్రల్ టీం అధికారి మంగళవారం పోరుమామిళ్లలోని బలిజ కోటలో సీసీ రోడ్లను పరిశీలించారు.
ప్రకాశం: పాత సింగరాయకొండ గ్రామంలో ఉన్న ప్రసిద్ధిగాంచిన లక్ష్మీనరసింహస్వామి ఆలయంలో బుధవారం అక్షయ తృతీయ వేడుకలు జరగనున్నాయి. ఉదయం 9 గంటలకు స్వామివారికి చందనాలంకారం, లక్ష తులసి పూజ నిర్వహిస్తారు. భక్తులు అధిక సంఖ్యలో పాల్గొనాలని ఆలయ అధికారులు కోరారు. స్వామివారి దర్శనానికి ఏర్పాట్లు పూర్తి చేశారు.
ప్రకాశం: జిల్లాలో నేడు పాలిసెట్ పరీక్ష నిర్వహిస్తున్నట్లుగా ఒంగోలు ప్రభుత్వ పాలిటెక్నిక్ కళాశాల ప్రిన్సిపల్ శివప్రసాద్ తెలిపారు. ఒంగోలులో ఏడు పరీక్ష కేంద్రాలు, మార్కాపురంలో నాలుగు పరీక్ష కేంద్రాలను ఏర్పాటు చేశామన్నారు. మొత్తం 4,600 మంది విద్యార్థులు పాలిసెట్ పరీక్ష రాస్తున్నట్లుగా తెలిపారు.
PPM: గిరిజన గురుకుల రెసిడెన్సియల్ కళాశాలల్లో ఇంటర్మీడియట్ మొదటి సంవత్సరం ప్రవేశానికి దరఖాస్తులు ఆహ్వానిస్తున్నామని ఐటీడీఏ ఇన్‌ఛార్జ్ ప్రాజెక్టు అధికారి ఎస్. ఎస్. శోభిక తెలిపారు. ఐటీడీఎ పార్వతీపురం ఆద్వర్యంలో గిరిజన గురుకుల రెసిడెన్సియల్ కళాశాలల్లో ఇంటర్మీడియట్ మొదటి సంవత్సరంలో ప్రవేశానికి మే 18వ తేదీలోగా ఆన్‌లైన్ ద్వారా దరఖాస్తు చేసుకావాలి అన్నారు.
ప్రకాశం: హనుమంతునిపాడు మండలంలో బుధవారం ఉదయం 8 గంటల నుంచి సాయంత్రం 6 గంటల వరకు విద్యుత్ సరఫరా నిలిపివేయనున్నట్లు ఏఈ మణికంఠ ఓ ప్రకటనలో తెలిపారు. గ్రామంలో ఆర్ డి ఎస్ ఎస్ పనుల్లో భాగంగా నూతన లైన్లు, నూతన ట్రాన్స్‌ఫార్మర్ ఏర్పాటు వల్ల అంతరాయం ఉంటుందని ఆయన తెలియజేశారు. విద్యుత్ వినియోగదారులు అధికారులకు సహకరించాలని కోరారు.
