నందమూరి బాలకృష్ణ…. సినిమా ద్వారా ప్రేక్షకులను, అభిమానులను అలరించిన ఈ నటసింహం ఇప్పుడు ఆహా ఓటీటీలో అన్‌స్టాపబుల్ టాకీ షో హోస్ట్‌గా అదరగొడుతున్నారు. ఈ షోకు వచ్చే సెలబ్రిటీలపై తనదైన శైలిలో ప్రశ్నలు వేస్తూ, వారి నుండి సమాధానం రాబట్టే ప్రయత్నం చేయడంతో పాటు, ప్రేక్షకులకు మంచి ఎంటర్‌టైన్మెంట్ ఇస్తున్నారు. పర్సనల్, రాజకీయం.. ఇలా అన్నింటిని సృషిస్తున్నారు. ఆహా-అన్‌స్టాపబుల్ సీజన్ 1 అందరి మన్ననలు చూరగొన్నది. ఇప్పుడు సీజన్ 2 త్వరలో స్ట్రీమింగ్ కానుంది.
బాలకృష్ణ హోస్ట్‌గా వ్యవహరిస్తున్న ఈ షోకు జనసేనాని పవన్ కళ్యాణ్ గెస్ట్‌గా వస్తున్నారు. ఇప్పటికే ఇందుకు సంబంధించిన షూటింగ్ పూర్తయింది. రాజకీయంగా చూస్తే బాలకృష్ణ టీడీపీ, పవన్ కళ్యాణ్ జనసేన అధినేత. దీంతో వైసీపీ ఈ షోలో పవన్ పాల్గొనడంపై విమర్శలు గుప్పిస్తోంది. మంత్రి పేర్ని నాని కూడా ఈ షో పైన ఆగ్రహం వ్యక్తం చేశారు. పవన్ కళ్యాణ్ నిత్యం చంద్రబాబుతో కలిసి తిరుగుతారని, ఇప్పుడు అదే టీడీపీ అధినేత బావమరిది బాలకృష్ణతో కలిసి తిరుగుతున్నారని, ఇందులో పెద్ద విషయం ఏముందని ఎద్దేవా చేశారు. ఈ షోకు సంబంధించి ఎవరి డైలాగ్‌లు వారికి ముందుగానే వెళ్తాయని, అది ఓ షో మాత్రమే అంటూనే విమర్శలు గుప్పించారు.
చంద్రబాబుకు అనుకూలంగా ఉన్న పార్టీలను పోగేసేందుకు బాలకృష్ణకు అవకాశం వచ్చిందని, తద్వారా తన బావ తప్పులను కప్పిపుచ్చేందుకు ఈ ప్లాట్‌ఫామ్ ఉపయోగపడుతోందని ఎద్దేవా చేశారు. రాజకీయాల్లో ఇప్పటికే బావతో తిరిగిన పవన్ కళ్యాణ్ ఇప్పుడు బావమరిదితో తిరిగితే తప్పులేదని, అక్కడకు వెళ్లి మాటలు చెప్పినందుకు డబ్బులు వస్తాయన్నారు. రాజకీయాల్లో సాధారణంగా అధికార, ప్రతిపక్ష పార్టీల మధ్య విమర్శలు, ఆరోపణలు ఉన్నప్పటికీ పేర్ని నాని మాత్రం పవన్ కళ్యాణ్ విషయంలోనే ఎక్కువగా బయటకు వస్తున్నాడని సోషల్ మీడియాలో పెద్ద ఎత్తున మండిపడుతున్నారు. వైసీపీ పదేపదే కావాలని పవన్‌ను టార్గెట్ చేస్తోందని అంటున్నారు.
ఇటీవల ప్రచార వాహనం వారాహి పైన కూడా వారు తమ అక్కసును వెళ్లగక్కారని గుర్తు చేస్తున్నారు. అయితే పేర్ని నాని కేవలం జగన్ మెప్పు కోసం పవన్ కళ్యాణ్ ఇష్యూలోనే బయటకు వస్తున్నారని, మొదట ఆయన తన నియోజకవర్గం అభివృద్ధిపై దృష్టి సారించాలని సెటైర్లు వేస్తున్నారు. పవన్ వస్తేనే ఇలాంటి వారు కనిపిస్తారని, జనసేనాని ప్రతి మూమెంట్‌కు రియాక్ట్ అవుతుంటారని, కానీ ప్రజల గురించి, రైతుల గురించి, రాష్ట్రంలో జరిగిన అభివృద్ధి గురించి మాత్రం మీడియా ముందుకు రావడం లేదంటున్నారు. బందర్ పోర్ట్ పనుల గురించి, చిన్నాభిన్నమైన స్థానిక రోడ్లను గురించి మాత్రం మాట్లాడటం లేదని గుర్తు చేస్తున్నారు. పేర్ని నాని ఇప్పటికైనా పవన్ కళ్యాణ్ మీద పెట్టే శ్రద్ధ తన నియోజకవర్గం, తన బాధ్యతలపై పెడితే బాగుంటుందని హితవు పలుకుతున్నారు.
