NZB: భారత గ్రాండ్ మాస్టర్, తెలుగు తేజం కోనేరు హంపి ఫీడే మహిళల వరల్డ్ ర్యాపిడ్ చెస్ ఛాంపియన్‌గా నిలిచారు. ఈ నేపథ్యంలో నిజామాబాద్ ఎంపీ ధర్మపురి అర్వింద్ కోనేరు హంపీకి ‘X’ వేదికగా అభినందనలు తెలిపారు. ఈ వేదికగా ఆమె ఫోటోను జోడించిన ఎంపీ అర్వింద్ ఈ అపూర్వ విజయంతో ఆమె దేశమంతటికి గర్వకారణంగా నిలిచిందని ప్రశంసించారు.
WGL: నల్లబెల్లి మండలం రుద్రగూడెంలో వివాహిత పిండి మానస (30) తన కూతురు సాత్విక(3)కు విషమిచ్చి తాను ఆత్మహత్యాయత్నం చేసిన విషయం తెలిసిందే. కాగా మానసను కుటుంబీకులు చికిత్స నిమిత్తం నర్సంపేటలోని ప్రైవేట్ ఆసుపత్రికి తరలించగా.. కుమార్తె పరిస్థితి విషమంగా ఉండడంతో HYDకు తీసుకెళ్లారు. చికిత్స పొందుతూ ఆదివారం రాత్రి మానస మరణించారు .పోలీసులు కేసు నమోదు చేశారు.
SRD: ప్రేమ విఫలమై యువతి ఆత్మహత్య చేసుకున్న సంఘటన సంగారెడ్డి పట్టణంలోని వీరభద్ర నగర్‌లో చోటుచేసుకుంది. సీఐ రమేష్ కథనం ప్రకారం.. ప్రేమ విఫలం కావడంతో ఇంట్లో ఫ్యాన్‌కు యువతి ఉరివేసుకుంది. గమనించిన కుటుంబ సభ్యులు యువతీని సంగారెడ్డి ప్రభుత్వ ఆసుపత్రికి తరలిస్తుండగా మార్గమధ్యంలో మరణించింది. తల్లిదండ్రుల ఫిర్యాదు వరకు కేసు నమోదు చేసినట్లు సీఐ తెలిపారు.
NLG: NLG పరిధిలోని కేశరాజుపల్లికి చెందిన వెంకటయ్య-యాదమ్మల కుమారుడు రమేష్ 4 ప్రభుత్వ ఉద్యోగాలు సాధించారు. 2024-25 సంవత్సర కాలంలో జూనియర్ కళాశాల లెక్చరర్, గురుకుల కళాశాల లెక్చరర్, డిగ్రీ కళాశాల లెక్చరర్, పాలిటెక్నిక్ కళాశాల లెక్చరర్‌గా 4 ప్రభుత్వ ఉద్యోగాలు సాధించడంతో రమేష్‌ను ఆదివారం నీలగిరి కళాశాల ప్రిన్సిపల్, TLF జిల్లా అధ్యక్షుడు మధ సన్మానించారు.
ADB: సీఎం కప్ 2024 భాగంగా జిల్లా స్థాయిలో గెలిచి రాష్ట్రస్థాయి పోటీల్లో పాల్గొనటానికి క్రీడాకారులు సోమవారం ఉదయం బయలుదేరారు. కార్యక్రమంలో భాగంగా జిల్లా పాలనాధికారి రాజర్షి షా జెండా ఊపి బస్సులను ప్రారంభించారు. అంతకుముందు క్రీడాకారులకు అల్పాహారం అందజేశారు. క్రీడాకారులు ఉత్తమ ప్రతిభ కనబరిచి రాష్ట్రస్థాయిలో సైతం రాణించాలని ఆయన ఆకాంక్షించారు.
MDK: ప్రజా సమస్యల పరిష్కారం కోసం మెదక్ ఎమ్మెల్యే డా. మైనంపల్లి రోహిత్ కొత్త నిర్ణయం తీసుకున్నారు. సమస్యలు తెలుసుకొని పరిష్కరించేందుకు గ్రామ దర్బార్ కార్యక్రమాన్ని చేపట్టనున్నారు. త్వరలోనే మెదక్ నియోజకవర్గంలో గ్రామ దర్బార్ కార్యక్రమానికి శ్రీకారం చుట్టనున్నట్లు ప్రకటించారు. క్యాంపు ఆఫీస్‌కే పరిమితం కాకుండా ప్రజల్లోకి వెళ్లనున్నట్లు తెలిపారు.
NZB: తెలంగాణ రాష్ట్ర బీసీ అధ్యాపకుల సంఘం రాష్ట్ర అధ్యక్షుడిగా లింగంపేటకు చెందిన కాముని సుదర్శన్ ఏకగ్రీవంగా ఎన్నికయ్యారు. హైదరాబాదులో ఆదివారం జరిగిన కోర్ కమిటీ సమావేశంలో బీసీ సంఘాల జాతీయ అధ్యక్షుడు ఆర్ కృష్ణయ్య నియమించారు. ఉపాధ్యక్షుడిగా పరిశరాములు, రాజేష్, రవి కార్యదర్శిగా మామిడి విట్టల్, కోశాధికారిగా కొండయ్య, సంయుక్త కార్యదర్శిగా ఎన్నికయ్యారు.
HYD: సీతాఫల్మండి డివిజన్ మధురానగర్ కమ్యూనిటీ హాలులో పార్శిగుట్ట సంజీవపురం పద్మశాలి సంఘ స్వర్ణోత్సవ వేడుకలు ఆదివారం సందడిగా జరిగాయి. స్వర్ణోత్సవ వేడుకల్లో పలువురు పద్మశాలి సంఘ నాయకులు పాల్గొని మాట్లాడారు. పద్మశాలిలు సంఘటితమై రాజకీయ రిజర్వేషన్లు, హక్కులు సాధించుకోవాలని, పద్మశాలీల అభ్యున్నతి, అభివృద్ధికి కలసికట్టుగా పోరాడాలని కోరారు.
NLG: నూతన సంవత్సర వేడుకల్లో డిజేలు వినియోగిస్తే కఠిన చర్యలు తప్పవని డీజే యాజమానులను హెచ్చరించారు. సీఐ చరమంద రాజు సోమవారం హుజూర్నగర్‌లోని సీఐ కార్యాలయంలో ఒక ప్రకటనలో ఆయన మాట్లాడుతూ.. హుజూర్నగర్‌ నియోజకవర్గ వ్యాప్తంగా గంజాయిపై ప్రత్యేక నిఘ ఏర్పాటు చేశామని, డీజే లకు ఎలాంటి పర్మిషన్ లేదని తెలియజేశారు.
ASF: రెబ్బెన మండలం కొండపల్లి జాతీయ రహదారిపై ఆదివారం రాత్రి రోడ్డు ప్రమాదం జరిగింది. రాత్రి 8 గంటల సమయంలో కొండపల్లి బస్టాంట్ వద్ద ఉన్న చికెన్ కొట్టు దగ్గర నిలబడినబాపురావును కైరుగాం నుంచి రాంగ్ రూట్‌లో వచ్చినబొ లెరో ఢీకొంది. దీంతో అతడు అక్కడిక్కడే మృతి చెందినట్లు స్థానికులు తెలిపారు.
NZB: బిక్కనూర్ మండలం పెద్దమల్లారెడ్డి గ్రామానికి చెందిన బోరెడ్డి అరవింద్ రెడ్డి కెనడా క్రికెట్ జట్టులో ఆడుతూ రాణిస్తున్నాడు. ఉన్నత చదువుల కోసం కెనడా వెళ్లిన అరవింద్ రెడ్డి చదువుతో పాటు ఆ దేశ డొమెస్టిక్ జట్టు తరఫున ఎంపికై అద్భుత ప్రదర్శనతో ఆకట్టుకుంటున్నాడు. దీంతో అతడిని తల్లిదండ్రులు బోరెడ్డి బాలకిషన్ రెడ్డి, మంజులతో పాటు పలువురు అభినందించారు.
KMM: మధిర మండల పరిధిలోని మహాదేవపురం గ్రామంలో విశ్వసనీయ సమాచార మేరకు పేకాట స్థావరాలపై మధిర టౌన్ సబ్ ఇన్‌స్పెక్టర్ సంధ్య దాడి చేసి పేకాట ఆడుతున్న కనపర్తి నరసయ్య, కనపర్తి నారాయణ, ఎల్లయ్య, జినుగు కృష్ణమూర్తిని పట్టుకొని వారికి సంబంధించిన మూడు సెల్ ఫోన్స్, రూ. 1810 సీజ్ చేసి వారిపై కేసు నమోదు చేయడం జరిగింది.
KMM: మధిర మండల పరిధిలోని రాయపట్నం గ్రామ ఇసుక రేవు నుండి గత కొన్ని రోజులుగా ప్రతిరోజు రాత్రి సమయాలలో కొందరు అక్రమంగా ఇసుక రవాణా చేస్తున్నారని స్థానిక ప్రజలు వాపోతున్నారు. కావున తక్షణమే సంబంధిత అధికారులు స్పందించి విషయంపై తగు చర్యలు చేపట్టాలని కోరుతున్నారు.
MDK: భక్తుల కొంగుబంగారమైన కొమురవెల్లి మల్లికార్జునస్వామి కళ్యాణం అత్యంత వైభవంగా జరిగింది. ఏటా మార్గశిరం చివరి ఆదివారం స్వామివారి కల్యాణం నిర్వహించడం ఆనవాయితీగా వస్తోంది. ఇందులో భాగంగా మల్లికార్జునుడు, బలిజ మేడలమ్మ, కేతమ్మల వివాహ మహోత్సవం వైభవంగా నిర్వహించారు. కాశీలోని జంగంవాడి మఠం అధిపతి మల్లికార్జున శివాచార్య వేద పర్యవేక్షణలో ఈ కార్యక్రమం జరిగింది.
MBNR: అమనగల్లు మండలంలో వాహనాలు నడిపే ప్రతీ ఒక్కరూ తప్పని సరిగా డ్రైవింగ్ లైసెన్సు కలిగి ఉండాలని, లేని పక్షంలో జరిమానా తప్పదని అమనగల్లు ఎస్సై వెంకటేష్ ఆదివారం హెచ్చరించారు. లైసెన్సు, హెల్మెట్ లేకుండా వాహనాలు నడిపితే కఠిన చర్యలు తీసుకుంటామన్నారు. మైనర్లకు వాహనాలు ఇస్తే ఓనర్స్ బాధ్యత వహించాల్సి ఉంటుందని ఎస్సై వెంకటేష్ అన్నారు.
